I' faut:
Nou vèrse l'ieau dans l'ticl'ye et l'met à bouoilli. Lé temps pâssé, les gens m'ttaient lé ticl'ye sus l'feu, mais ach'teu la mâjorité des gens a un ticl'ye êlectrique.
L'mus est d'caûffer lé pot' à thée auve dé l'ieau caude, et pis y mett' lé thée - eune tchul'lée pouor châque pèrsonne, et pis ieune pouor l'pot. Mais ach'teu bein des gens font sèrvi des pouques à thée. Nou dit qué l'goût n'est pon aussi bouôn, mais ch'est p't'-êt' pus pratique, sustout quand nou veurt faithe eune tâssée d'thée tout sîmpliément.
Qunad l'iéau est à bouoilli, nou vèrse l'ieau dans l'pot' à thée, nou r'mue l'thée auve eune tchulyi à seule fîn qu'les fielles (ou les pouques) peuvent bein cirtchuler, et pis nou met lé chapé du pot' à thée pouor lé garder bein caud.
Nou laîsse lé thée pouor deux'trais minnutes. Ch'est eune faute d'baithe lé thée trop tôt - il est trop faibl'ye et n'a pon un bouôn goût. I' faut lé laîssi.
Quand l'thée est prêt nou vèrse lé thée dans un mogue ou eune tâsse. Y'a des gens tchi disent qu'i' faut mett' lé lait dans la tâsse avant l'thée, et y'a d'aut's gens tchi disent qu'i' faut ajouôter l'lait auprès l'thée. Jé n'crai pon qu'i'y' ait eune grande difféthence - et mé, j'bais man thée sans lait!
Les cheins tchi aiment lé chucre, en ajouôtent eune tchul'lée (ou deux), mais i' faut bein l'èrmuer auve la tchulyi.
Y'a des gens tchi baivent lus thée auve du limon - ch'est la tradition en Russie, mais là-bas il' aiment étout ajouôter d'la g'lée.
Mais i' n'y' a rein d'miyeu qu'eune bouonne modgie d'thée lé matîn.
Et y'a un vièr diton Jèrriais tchi dit:
Du thée dait êt' fort coumme lé dgiâbl'ye, caud coumme l'enfé, nièr coumme la niet, doux coumme l'amour!