Les Pages Jèrriaises

Lé Pipl'ye Scroûbieux

The Scroobious Pip

Lé Pipl'ye Scroûbieux s'en dêhalit
quand la bliête 'tait vèrte et l'ciel 'tait gris.
Pis des bêtes, i' y'en vîntent un amas
quand l'Pipl'ye Scroûbieux y fit s'n assias.
La brébis, l'cat, l'tchian et l'kangarou,
lé couochon d'la Dginnée, la vaque étout -
lé loup hueûlit, lé j'va hîngnit.
lé p'tit quétot honnit et l'âne briyit,
et quand l'lion c'menchit à faithe des rouaux
ch'tait bein assez pouor vos faithe ouï haut.
Et châque annima 'tait hardi tchuthieux
pouor èrgarder d'près l'Pipl'ye Scroûbieux.
Et i' dîtent enfîn au R'nard - "Dé liain
tu'es l'pus esprité d'touos nous! Tu l'sai bein!
Apprèche-té du Pipl'ye Scroûbieux et di,
Tchi manniéthe dé tchi qu'tu'es et pouortchi?
Pouor achteu j'sommes, nous, à nos gratter la tête
si tu'es Paîsson ou Însecte ou Ouaîthé ou Bête."
Lé Pipl'ye Scroûbieux les r'gardit, distrait,
et chantit ches patholes atout un ronnais:
Tchi pétite flieu! Fis, pétit tchoeu!
Lé seul nom qué j'ai est l'Pipl'ye Scroûbieux.

Lé Pipl'ye Scroûbieux dans un bouais, au copé,
viyit au liain la Bollée dé G'lée -
Pis du ouaîth'lîn, i' y'en vîntent un fliotchet
lé travèrs du ciel dans des dgaîngues à voler.
Lé vautour et l'aigl'ye, la glinne épis l'co,
l'autruche, raîté, bécassinne et picot;
lé pèrrot prêchit, lé mêle tuitit,
mais l'cahouain esprité n'fit pon un brit.
et quand l'paon c'menchit à piailli bein fort
y'eut un camas tchi cach'chait bein tout l'monde hors.
Et châque ouaîthé 'tait grandement tchuthieux
pouor êcouter d'près l'Pipl'ye Scroûbieux.
Enfîn - "Dé liain," qu'i' dîtent au Cahouain,
"tu'es l'pus esprité d's ouaîthieaux! Tu l'sai bein!
Avole près du Pipl'ye Scroûbieux et di,
Tchi manniéthe dé tchi qu'tu'es et pouortchi?
Pouor achteu, nous, j'attendons fête pouor saver
si tu'es Paîsson ou Însecte ou Bête ou Ouaîthé."
Lé Pipl'ye Scroûbieux les r'gardit, bein dgai,
et chantit ches patholes atout eune bâsse vouaix:
Fis, pétit tchoeu! Tchi pétite flieu!
Lé seul nom qué j'ai est l'Pipl'ye Scroûbieux.

Lé Pipl'ye Scroûbieux s'en fut à la mé,
au bein bieau bord dé la Bollée dé G'lée.
Pis des paîssons, i' y'en vîntent toute eune scole
auve dé l'êcatchîn fo et d'l'êcliaqu'thie folle.
L'êsprot, lé héthan et l'teurbot, ma fé,
lé cheurque, la sole et l'bliu maqu'thé,
la fliandre fliaûnit, lé pourpais fit d's ouîns,
lé haû hêlit lé halibot et l'scolpîn.
Et quand l'bal'not c'menchit sa soûffliéthie,
Tchi tinné tch'êcliatchit tout l'tou, mouôn dgi!
Et châque paîsson 'tait raide tchuthieux
pouor dgetter d'pus près l'Pipl'ye Scroûbieux.
Enfîn i' dîtent au Bal'not "Dé liain,
tu'es l'pus grand des paîssons! Tu l'sai bein!
Noue don près du Pipl'ye Scroûbieux et di,
Tchi manniéthe dé tchi qu'tu'es et pouortchi?
Pouor achteu j'voudrêmes eune explyicâtion
si tu'es Bête ou Însecte ou Ouaîthé ou Paîsson?"
Lé Pipl'ye Scroûbieux les r'gardit, en paix,
et chantit ches patholes sus un air parfait:
Fai-mé d'tchi pliutcheux, Fai-mé d'tchi pliutcheux!
Lé seul nom qué j'ai est l'Pipl'ye Scroûbieux.

Lé Pipl'ye Scroûbieux restait, abrié
souos un bouais dans l'pays d'la Bollée dé G'lée.
Pis d's însectes, i' y'en êss'mîtent eune rueûtchie
tout l'tou du Pipl'ye Scroûbieux d'un clyîn dg'yi.
D's êtchèrbots et des pêtres à pourpres ièrs,
des bibets, des bourdons, des bliues moûques à vèrs,
des j'vaux d'Saint George, papillotes, moûques à myi,
vêpres, bliues d'mouaîselles et moûtchets rîlyis.
Et quand les bibets vîntent à bourdonner,
les branques tapîtent pouor tabouothinner,
Et châque însecte tâchit d'faithe bein seux
d'pouver vaie d'près l'Pipl'ye Scroûbieux.
Enfîn i' dîtent au Freunmion "Dé liain,
tu'es l'pus brillant d's însectes! Tu l'sai bein!
Sîl'ye-té près du Pipl'ye Scroûbieux et di,
Tchi manniéthe dé tchi qu'tu'es et pouortchi?
Pouor achteu j'avons eune tchestchion tch'èrpèqu'te,
si tu'es Bête ou Paîsson ou Ouaîthé ou Însecte?"
Lé Pipl'ye Scroûbieux les r'gardit vitement,
et chantit ches patholes en sûffliotant:
Vai-mé envieux, Vai-mé envieux!
Lé seul nom qué j'ai est l'Pipl'ye Scroûbieux.

Épis toutes les bêtes tchi lus pronmènent dans l'aithe
dansîtent eune ronde bein cirtchulaithe,
et tout l'ouaîth'lîn tchi volent là-haut dans l'ciel
fîtent des cèrcl'yes auve un bieau battement d'ailes,
et touos les paîssons dans la Bollée dé G'lée
nouîtent en touônnée d'chutte grande bliue mé,
et toutes les însectes tchi crépissent 'chîn-bas
bourdonnîtent dans eune ronde 'chîn et là.
Et i' hueûlîtent et sûfflyîtent à tigue dé corps
jusqu'à ch'qu'nou les ouïyait par touos les bords -
Tchi p'tit pieux! Tchi p'tit pieux!
Lé seul nom qu'il a est l'Pipl'ye Scroûbieux

Edward Lear
Vèrsion Jèrriaise dé Geraint Jennings


 

Viyiz étout:

 

Les Pages Jèrriaises