Dé nos jours lé sé est assez bouôn et i'n'y'en a pas eune êcarcité, mais un temps fut qu'il avait eune grand' valeu commèrciale et les gens lé traitait auve grand respect. J'vos asseûthe qué les cheins d'nous tch'étaient ichin duthant l'Otchupâtion appréciaient lé p'tit qu'nou pouvait ravêtchi 'chîn et là ou qu'nou-s-avait auprès aver bouoilli dé l'ieau d'mé.
Les docteurs nos disent qué l'sé né fait pas d'bein et qu'i'y'en a assez naturellement dans not' maintchein sans en ajouôter d'autre. Quand même, quant à mé j'en aime eune pînchie auve man dîner - v'là tch'amende lé gout, bein seux.
I'y'a acouo des parties du monde où est qu' lé sé est eune c'mmodité rare et hardi précieuse. Parmi l's Arabes, par exempl'ye, ch'est d'tchi d'valeu. Lé temps pâssé, dévant l'arrivée du 'congélateur' lé sé 'tait l'seul moyen d'présèrver la viande, lé lard, lé paîsson et tchiques lédgeunmes, et dans les fèrmes sustout i'y'avait tréjous un saleux. Et pis comme nou sait tous bein, lé sé purifie et possède des qualités méd'cinnales par exempl'ye, nou gargarise auve dé l'ieau et du sé pour lé ma à la gorge, et eune pouongnie d'sé dans l'ieau du bain aîgue à dgéthi les copes auprès eune opéthation.
Les soudards Romains d'la dgèrnison en Grande Brétagne èrchevaient eune partie d'lus gages en sé, et ch'est dé là qué l'mot 'salaithe' est dérivé. Quand un ouvriyi est un failli travailleux nou dit acouo qu'i'n'vaut pas san sé.
Et pis, finnalement, i'y'a hardi d'supèrstitions associées auve lé sé et n'en v'chin deux'trais:
Lé sé a tréjous 'té un symbole d'amiêtchi et si des gens mangeaient ensembl'yes d'la nouôrrituthe cont'nant du sé, v'la tchi signifait qué l'hôte et s'n invité étaient bouons anmîns.
Quand eune personne env'yie du sé bas sus la tabl'ye, oulle en prend eune pînchie auve sa main drouaite et l'env'yie par dessus s'n êpaule gauche pour êviter la mauvaise chance. Nou porte du sé sus sa pèrsonne contre la chorchell'lie.
Mais, étout, quand nou craint tchitch'uns - les chorchièrs, les cheins tch'ont du scîn, comme nou dit - nou sème tchiques pînchies d'sé en d'hors dé siez ieux et i'n'vouos peuvent rein.
Et pis quand nou rencontre un chorchi nou touônne sa pouchette à l'envèrs pour n'êt' pon enchorchélé.
Si nou s'compte enchorchélé, faut env'yer un lopin d'sé sus l'feu. Quand la fliambe bliuit, lé chorchi n'a pus d'pouver.
Et ch'est d'même tch'i' faut faithe étout contre tchitch'un tch'a eune haine contre sé.
Eh bein, bouonnes gens, né v'là, mais né prannaient pas les supèrstitions entour lé sé trop à tchoeu car, auprès tout, ch'n'est qu' des supèrstitions!
LLH
Viyiz étout: