Les Pages Jèrriaises

La fontaine dgéthisseuse dé Saint Hellier

Duthant mes vacanches au mais d'Août, j'm'en fus à la grand' tèrre pouor faithe eune manniéthe dé pèlerinnage (sus ma bike) à la fontaine dé Saint Hellier. Véthe, ch'est bein "Hellier" auve deux 'l's, mais ch'est l'même Saint Hélyi qué j'connaîssons siez nous en Jèrri.

Dans la vallée d'la riviéthe Varenne, ès bords d'la Forêt d'Éawy dans la Haute-Nouormandie, y'a un village tch'a nom St. Hellier. Bein seu, y'a eune églyise - mais les gens veinnent ichîn sustout pouor vîsiter la chapelle et sa fontaine dgéthisseuse.

I' faut d'mander pèrmission à Moussieu et Madanme Gemeline, tchi vos mouontréthont la p'tite chapelle dans l'clios driéthe lus maîson.

Saint-Hellier

Au mitan d'la chapelle, y'a un creux dans l'aithe auve deux'trais d'grès pouor d'cendre à la r'ssource. En êffet, ch'est un p'tit russé tchi couort souos la chapelle et tchi sort par d'ssous les portes.

Nou dit qué St. Hélyi, ayant tchitté sa ville dé naîssance, Tongres en Belgique, pâssait par la forêt - tchi 'tait bein pus grande à chu temps-là - et i' s'arrêtit souos un ênorme tchêne. I' pathaît qu'les habitants païens d'la contrée louangeaient chu bouais, mais St. Hélyi tapit la tèrre et dé l'ieau c'menchit à couler. Les gens dêcouvrîtent qué l'ieau d'la fontaine dgéthissait des maux d'pé et d's ièrs et eune chapelle et, pus tard, un village auve eune églyise 'taient bâtis là.

La chapelle fut r'bâtie en 1852 et y'a acouo des vielles gens tchi disent coumme tchi lus pathents et grand-pathents les m'nîtent à la chapelle pouor êt' lavées dans l'ieau à seule fîn d'les dgéthi - et chennechîn ès années trente. Mais i' sembl'ye qué, p't-êt' duthant la dgèrre ou dans les années auprès la dgèrre, la chapelle fût abandonnée. Ès années huiptante, la chapelle 'tait en d'lacres et nou la faîsait sèrvi coumme êtabl'ye pouor lé bestchias. Mais l'vièr pèlerinnage n'tait pon compliètement oublié et les méthes soulaient acouo apporter lus êfants à la fontaine pouor les laver, parmi les vaques, auve l'espé dé dgéthîson.

Y'a eune statue d'Saint Hélyi dans la chapelle, de tabliettes d'èrconnaîssance sus la muthâle, et un tas d'mouochets laîssis par les gens tch'ont lavé lus parties afflyigies dans l'ieau.

Ch'fut l'Sieur Gemeline tchi restaurit la chapelle y'a tchiques années - et s'i' y'a des Jèrriais tchi pâssent par chu bord-là et tchi veulent vîsiter la chapelle, i' s'sont les beinv'nus.

 

Geraint Jennings
2001

 

Viyiz étout:  

Les Pages Jèrriaises