Les Pages Jèrriaises

La Sainte Hélène



Sav'-ous où'est qu'est la Sainte Hélène? Comme la mâjorité d'gens, j'avais l'idée împrécise d'eune île dans l'Atlantique, tchique bord au seur-vouêt d'Afrique, où'est qu'Napoléon Bonaparte patchit ses vailes. Mais j'n'avais janmais rencontré un “Saint” – ch'est comme chenna qu'nou-s'appelle l's habitants – d'vant la conféthence dé l'Associâtion Parlémentaithe du Commonwealth, tchi prînt pliaiche dans not' île au mais d'Juîn. Ilà j'avais la chance d'rencontrer la Ségrétaithe du Gouvèrnément d'la Sainte Hélène, et ou m'explyitchit qu'l'île est à peu prés la même grandeu qu'Jèrri auve quarante-sept milles cârrés, mais tch'i' n'y a qu' siêx mille habitants.

L'île a un caractéthe tout-à-fait difféthent d'Jèrri. Ou s'trouve à mille chîn chent milles au nor'-vouêt du Cap, et ch'est eune île dé contrastes – i' y a des d'sèrts, des montangnes dé deux mille chîn chents pids d'haut, d'la pâtuthe et des vallées remplyies d'pliantes des Tropiques.

Pour achteu i' n'y'a pon d'hâvre, ni d'caûchie, ni d'aéroport, et la seule manniéthe d'y aller est par baté – pour chîn jours en mé! Les “Saints” lus en vont bâti un aéroport, et i' m'disent qu'i' dait être prêt pour 2010 ou 2011; en même temps il' ont l'idée d'construithe un grand hôtel et un tèrrain d'golf. Y'a des gens tchi sont gênés pour l'av'nîn viyant qu'i' y des pliantes et annimaux euniques tchi pouôrraient être m'nichis par les changements. La pliaiche éyou qu'nou veurt bâti l'aéroport est nommé La Pliaine d'la Baie d'Prospéthité – i' faut espéther qu'la prospéthité n' dêtruit pon l' bonheu des “Saints.”

Tony Scott Warren
2005
 

Viyiz étout:

 

Les Pages Jèrriaises