"Mais pourtchi qu'i' rit autant?"
Dit la maîtresse des Pliatons.

"Est-che qu'il a la tête cratchie?"
S'fait la couôsinne d'la Bouctéthie.

"Il a r'chu eune rente d'Aurigny",
Offre un moussieu du Mont Sohyi.

"Disais pon d'ité bavin!"
Rit l'grand-péthe d'St. Martîn.

"Vaut mus rithe qué d'êt' foutu",
S'fait eune femme d'la Faldou.

"Jé pense qu'il a eune attaque dé nèrs",
Répond un homme d'la Grève de Lé.

"Tappez-lé dans l'dos!"
Dit eune fil'ye d'la Tou lcho.

"Ch'est mus d'rithe qué d'plieuthé",
Ajouôte eune hardelle du Hâvre d'Gouôrray.

"Laissiz-lé rithe comme i' veurt",
Dit la tante d'la Ville-au-Neveu.

"Eh bein! V'la justement dé tchi bel",
Souôrit la vaîsinne dé Carmel.

"Jé m'en vais vos dithe pourtchi qu'i' rit",
Offre un moussieu du Vau Rouogi.

"I' s'est avisé et dêcidé
Qué, aniet, i' f'rait les tchuthieux pâler."