Moussieu l'Editeu,
Pour deux séthées d'siéte, la Merrienne, assise aupi d'san feu, et la catte sûs ses g'nors, s'était minse à liéthe les rapports des Etats dans la gâzette. Hier au sé, dans les neuves heuthes, ou happit l'papi, le fliantchit souos la tablye, et - J'n'y vais qu'bliâse dans tout chonna! ou s'êcriyit. J'ai liut toutes chais distchussions bein attentivement et j'étharais fait mû d'allé m'couochi. Pour deux jours l's'Etats ont siégi, et j's'y aussi savante comme j'étais au qu'mench'ment.
Y'en a bein d'autres comme té, Merrienne, j'l'y dit, mais y'a une chose, et ch'est qu'accordant au Chancellier, ch'est-à-dithe le Député Candlin, la position n'est pas trop brillante.
J'ai comprint chonna, ou dit. Par les chiffres tch'il a produit, je sommes à-r'tou d'une immense somme, et comment qu'nou pouôrra péyi chonna, je n'sais vraiement pas.
Si ch'tait là la vraie position, Merrienne, j'l'y dit. je sait daccord avec té, mais y n'faut pas s'gêné trop, car ch'est seux et cértain que quand veindra l'mais d'Avri, les chiffres montrethont une grande difféthence. Ch'est d'même touos l's'ans. Le Budget nos donne une balanche du bouon bord, mais ch'n'est pas pour dithe que dans l'entretemps le Comité des Finances ne s'en vont pas considethé la tchéstchon d'tchiques nouvelles taxes. Si nous êcoutait l'Député Cyril Le Mérquand, y'en éthait bein vite, car y n'vait pas les choses comme Moussieu Candlin, tch'est en faveur d'emprunté pour péyi nos déttes. Le Cyril, au contraithe, veur dithe que la seule manièthe de nos hallé d'embarras ch'est d'péyi comme j'allons.
Je n'y connais pas grand'chose, ou dit, mais si toutes les fais que j'avons yeu une mauvaise année, j'avions emprunté, ya longtemps que je s'saimes à l'hopita, té et mé. Dans chais occasions-là, y n'y'avait qu'une chose à faithe, et ch'tait d'êconomîsé.
Vèthe, j'm'accordit, Je m'souveins d'une bordée que tu m'fit abandonné ma pipe.
Et mé donc, ou dit, une tâsse de tais sans chucre deux fais par jour. Crais-tu qu'je n'souffrais pas? Quant à ta pipe, je n'te viyais pas quand tu tais dans les clios.
Et mé, j'l'y dit, je n'te viyais pas quand tu tais toute-seule dans la maison, mais toutes les fais que j'rentrais le ticlye 'tait sûs l'feu. Mais enfin, j'eûmes une bouonne saison la préchaine année, et je n'vimes pas le Joe Balleine ou l'Pierre Soyi dans l'bél. Ach'teu, Merrienne, dans l's'Etats le Député Cyril a suggéthé que che s'sait une bouonne affaithe de hauchi la taxe sûs les cigaréttes et la litcheu. Tchèsque tu'en crais de ch't'idée-là?
Chein qu'j'en crais, ou raiponnit, ch'est que l'Député Cyril n'a jamais yu une mitheuse idée: Les deux mains en haut pour l'y.
Sans doute, v'là tchi l'y f'tha pliaisi, quand y l'vêrra dans Les Chroniques. Mais, êcoute, Merrienne, ch'est tout bein bon d'en approuvé, d'chais taxes, mais as-tu caltchulé que les gens tch'y n'fument pas et tch'y n'touchent pas à la litcheu n'en paiethont pas un sou? Y n'ya q'des pouôres balloques comme mé tch'y s'sont astitchies. Et tu crais qu'ch'est juste!
Si ch'tait mé, ou dit, un patchet d'cigaréttes couot'tait tant que pérsonne ne pouôrrait en acaté. Quant à la litcheu, eh bein, d'gouts d'cognac ne font pas d'ma quand nou souffre d'indigestion. Un vêrre caud, dans chais circonstances-là est une bouonne méd'cine.
De-même, j'l'y dit, tu veur être libre de béthe tes vêrres cauds sans avé à péyi pûs, mais tu voudrais hauchi la taxe sûs les cigaréttes, parsque tu n'en fume pas. Crais-tu, vraiement, Merrienne, que ch'est juste?
Ne m'embête pas, ou s'fit. Mets l'ticlye sûs l'feu. J'veur une tâsse de tais.
Ph'lip
1956
Viyiz étout: