Ch'est la bonté même que man Piteur, la puspart du temps, et j'fut bin contrariée d'vaie ch'que Lonôre avait èscrit entouôre l'affaithe de notr' hay-box. Si Piteur oublyi l'réspé qu'i' dét a sa femme, chutte fais la, i' m'a embréchi bin des fais d'pis, et l'enflieumme est quazi toute horte de m'n yi. Et pis, tchès qu'chést qu'eunne petite cliamuze ou deux de temps en temps entre houmme et femme? Nos pouôres soudards en vaient bin d'autres!
Quand donc Lonôre me dit qu'ou pépiait pour allé vaie les "Living Pictures" au Oddfellows, et quand ou m'eut asseuthé que ch'tait en aîde d'eunne bouonne cause, j'dounni man consent'ment. "Des Tableaux Vivants," que j'dit: "tchès que ch'peut bin être? Eunne méthe peut i y'emné sa fille sans crainte de y'èsmotchi l's'esprits?"
"N'té gène pon, mother," que m'dit m'n'èsfants, en m'sautant au co; "ch'est tout a fait 'all-right'; ch'est des gens d'Eglyise qu'on organisé la chose."
Nos v'la don a chu show. Coumme j'entraîmes la band se mint a joué, les gens s'dèstouonites pour nos r'gardé, et chatchun de se d'mandé tchès qu'était chutte belle grosse hardelle la avec sa réspectablye mémée. Avec bin d'la minzethe j'finîmes pat trouvé eune petite tablye sus tchi q'avait eune carte, "Reserved" (chose seuthe qu'y'avait yeu patholles passé que j'nos envnaîmes), et en l'heu me v'la eune demouezelle a bourdounné a l'entou d'nous: "Vos pliéthait-y eune tassée d'tée?" et né v'la du tée, des beurrées, et d'la gâche, assez pour touos les Vautchiers. Ch'tait pas gratis, d'ja! n'allez pas l'créthe! Ch'tait djix-huit sous par tête, "eat all you want." J'n'y mantchîmes pas, Lonôre en souffliat!
Tandi qu'nous manjeait la musique jouait, des filles en chabots (j'ethais pas la chose d'en faithe autant endrét un fliotchet d'monde) s'mintes a dansé, d'autres a dithe des recitations. Et pis y'eut eunne pièche (coumme Jack Luce en èscrit pour les distributions d'prix) ou-ès qu'eunne fille en rouoge, ov les bras nus, 'tait en prison pour avé fait tchiq' dro. Sen galant vint la vaie, et les v'la a s'ent embréchi, a s'ent cadliné, a s'ent t'né par la talle; et pis, a la pliéche de s'met a plieuthé, coumme nous éthait creu sous les circonstances, les v'la qui s'mettent a chanté a tue-tête, tell'ment haut que l'gardien d'la prison entri d'un embron pour lus dithe d'avé a s'taithe, et de dithe lus priéthes car la fille s'n'allait avé l'co coppé en l'heu. La pouôre garçe en tchi bas raide morte, et s'èstrueûlli sus l'fagot d'èstrain qui lis servait d'liét - pas trop morte, tout d'même, car j'la r'vîmes tchiq' minutes après, manji un gros gobbin d'gâche pas bin loin d'not tablye; oul avait sans doute trouvé moyen d'éscappé d'prison.
Et pis v'la a bas pour allé vaie chès fameux Tableaux Vivants de tchi qu'Lonôre ne cessait d'pâslé. Ch'ait douze sous - et faut que j'dis dé suite que j'n'en eûmes pas pour nos sous! A peine entrés, ch'tait "Move on, please, move on faster." Ch'tait au trot que j'passîmes a travers du Show, et j'n'y vit qu'bliu. J'me souvins seulment d'un houmme qu'etait a catouollyi sa servante tandi qu'les mousses 'taient a èspié driethe eunne porte. Y'etha yeu du bri dans chu mènage la! Et pis étout, yun des derniers Tableaux: un terriblye grand soudard, tout couert de sang, avec un long sabre au bu de s'n'arme, qui s'mint a faithe des clyins a ma fille! La pouôre fille n'eut qu'd'en tchée, ses g'noux s'mintes a tremblié, ses ouothelles vintes toutes rouoges. J'm'en allais justément m'pitchi endret li pour en savé pus long la d'sus, quand né r'véla chutte fichue "Move on, please, move on," et tchiq'un qui m'pousse dans l'dos avec un paraplyie - et nos v'la en l'heu dans la rue!
Laizé Pain
Viyiz étout: