Séyiz tréjous heutheurs dans l'Seigneur! Jé l'dithai acouo eune fais: séyiz heutheurs!
Mouontrez vot' toléthence à touos les gens. Lé Seigneur s'en va bétôt v'nîn.
I' n'faut pon vos gêner entouor rein, mais faîtes toutes vos d'mandes à Dgieu auves des priéthes, et d'la supplyicâtion et des r'mèrciements.
Et la paix dé Dgieu, qu'pèrsonne né peut comprendre, souongn'gna vos tchoeurs et vos esprits auve Jésû Christ.
Et pis, mes fréthes, chein tch'est vrai, chein tch'est honorabl'ye, chein tch'est juste, chein tch'est pur, chein tch'est aimabl'ye, chein tch'est grâcieux, tout chein tch'est excellent et dîngne d'êt' louangi: contemplez ches choses-chîn.
Chein qu'ous avez apprîns et r'chu et oui et veu dédans mé: faîtes-lé. Et l'Dgieu d'paix s'sa auve vous.
Mais j'sis bein heutheux dans l'Seigneur qu'vot' attention pouor mé a 'té ravigotée; ouaithe qu'ous eûssyiz eune pensée entouor mé, et ou n'pouvêtes rein faithe. Tout coumme jé n'dis rein entouor mes bésouains, ch'est en tchi j'peux mênagi mé-même autchun bord qué j'sis. Si j'sis mêprîns ou honothé, ch'est tout iun - partout et en tout j'ai lé s'na pouor êt' rassasié ou, affanmé, aller sans, aver du bein ou êt' au d'sans. J'sis pouor tout faithe par l'chein tchi m'renforche.
Né vos troubliez d'autcheune chose, mais exposez vos bésoins à Dgieu... et la paix dé Dgieu tchi surpâsse toute compréhension gardétha vot' tchoeu et vot' esprit en Jésû-Christ
Du reste, mes fréthes, qué toutes choses tchi sont vraies, toutes choses tchi sont honnêtes, toutes choses tchi sont justes...
Tout coumme ous avez 'té compliaîthants d'prendre souain d'mé.
M's anmîns Ph'lippiens, ou savez qué quand la bouonne nouvelle vînt preunmiéthement siez vous, quand jé m'dêhalis d'la Macédouaine, i' n'y'avait pon d'congrégâtion tchi s'en d'mentait d'tcheûter pouor les bésouains, sénon vous. Ch'est en tchi même à Thessalonnique ou m'en env'yîtes et r'env'yîtes chein tchi 'tait d'mêtchi. Ch'n'est pon qué j'voudrais en r'chéver mé-même, ch'est ou d'vez en gângni acouo pouor vos-mêmes. Mais j'ai tout chein tch'i' faut et acouo; j'sis rassâsié, ayant r'chu par Épaphrodite les présents qu'ou m'env'yîtes. Vos présents sont un onguent apaîsant, un sacrifice acceptabl'ye et pliaîthant au Bouôn Dgieu. Mais man Bouôn Dgieu vos rêcompens'sa d'san trésor d'glouaithe en Jésû Chri. Glouaithe sait au Bouôn Dgieu, not' Péthe, à tout janmais, véthe! Dites bouônjour à touos les saints en Jésû Chri, et les fréthes tchi sont d'compangnie auve mé vos dithent bouônjour là-bas, et touos les cheins ichîn vos dithent bouônjour, sustout les cheins du mênage dé l'empéreu. Qu'la grâce dé not' Seigneu Jésû Chri sait auve touos vous. Âmen.
Viyiz étout: