Un pêtre fait eune ithangnie
Dé fis si fins, si draits,
Qu' atout ses dés nou n'peut même pon
Tàter ch'la comme d'la souaie;
Tout l'tou, tout l'tou i' file sa trême,
En long et en travèrs -
Viy'ous don ch'la, comme i' dêvyie -
Faut-i tch'il ait d'bouons ièrs!
O, qué ch'est bé tout d'même, n'est-che pon?
Un co qu'tout est finni!
Toutes les p'tites moûques veinnent à l'entou
Sans vaie òu'est tch'est l'dangi:
D'allant, dé v'nant i' dansicottent
Tout près, au bieau solé -
En d' ssus en d' ssous i' vont et viennent
Frâsant ch't âffreux drannet!
Lé petre affanmé dans sa carre
A d's ièrs, lé saquétin -
I' vait partout à l'entou d'li
Et dgette tout chu frétin;
Bein vite les eunes appraichent acouo
Trop hardies, dgia, trop près
Et, craque, i' s'enhèrmellent si bein -
Fichu - i' sont happées!
Mais d' aut', pus sages ou pus chancheûthes,
Ont l' idée d' s'estchiver,
I' lus êcartent dé l'ithangnie,
Ailleurs font lus trajet;
Eh bein, né v'là eune bouonne léçon
Tch'i' faut qu'j'apprengions tous -
Ma M'mèe m'la dit, la vie n'est qu'pièges -
Ch'est en tchi, don, méfi'ous!
F. Le Maistre.
|
