I' s'adonnit qué l'jour tch'il abattîdrent les toutes dreines brédelles du 'Pav', j'pâssis par là dans la bus en m'en allant en ville et tout tchi restit du bâtisse 'tait eune montangne dé matchiéthe, auvec d'la poussiéthe à voler partout.
Ch'tait hardi triste dé vaie et j'avais l'tchoeu bein gros. J'n'ai pas d'honte dé l'dithe qué j'mé mîns à plieuther et pouor lé reste du jour j'tais à m'ramémouaither des mangnifiques séthées qué j'soulaîmes pâsser à danser là - lé Bal d'Saint Valentîn, les danses du Club des Jannes Fèrmièrs et du Club Social du Téléphone, lé Grand Bal auprès la Batâle dé Flieurs, etc.
Les filles et les femmes 'taient habilyies dans lus belles robes et les hommes en fa et blianche c'mînse auvec cravate. John Layzell, dans sa néthe câsaque et ses braies à rîl'yes, et portant des bliancs gants, 'tait à l'entrée saluant tout l'monde.
Dans chu temps-là nou n'éthait pas mîns san pid en d'dans d'la porte si nou 'tait habilyi en 'jeans' et eune c'mînse tchi traînait en d'ssous des g'nouors, valet! I' n'y avait pas bésoin d'un 'bouncer' pa'ce qué les gens portaient grand respé à John Layzell, tchi counnaîssait tout l'monde. L'moment qué tchitch'uns c'menchaient à s'mal comporter i' lus mouontrait la porte.
Tchi mangnifique 'band' tch'il' avaient, étout! La musique dé Glen Miller 'tait bein populaithe à ch't' êpoque-là, et jé m'rappelle sustout dé l'homme tchi jouait les tambours. A châque danse i' faîthait un solo souos la leunmiéthe d'un projecteu. Touos nous arrêtînmes à danser pouor l'èrgarder, et à la fîn d'la pièche i' y'avait eune ôrage d'appliaudissements. Jé n'mé rappelle pas san nom, mais i' 'tait aucouo par les c'mîns à ches drein. Châque fais qué jé l'vaie j'pense tréjous à ches mangnifiques séthées au 'Pav'. Coumment qu' les choses ont changi dépis chu temps-là!
Lé 'Pav' est hors pouor dé bouon mais ch'est bein seux qué, n'împorte tchi rempliachement tch'i' y'étha, rein né s'en va dêtruithe les bein heûreuses mémouaithes d'la pliaiche, et j'sai bein tch'i' y'a des chents, ofuche des milles, gens tchi pensent dé même.
Ursula Taylor
Viyiz étout: