Les Pages Jèrriaises

En pativouothant dans des fielles secques


Lé long du trottouaithe, des fielles, chuchotant,
sont des patholes pilvâtchies souos nos pids.
Dé même, lé S'tembre a fliantchi ès sept vents
lé destîn dé l'Êté en mannuscrit.

Les fielles pap'sent lé pavé en brun et or.
Les coffîns dé châtaines sont des vèrtes mèrques
dé ponctuâtion tchées par touos les bords.
Dans la brise la vèrduthe s'touônne et s'renvèrque,

sinnant les clios pouor en pâsser contrat.
Sén êcrituthe d'ordgi est organnique
et griffouoillie sus l'tchêne, lé seu, l'bouôlias,
lé chât'nyi et touos les bouais tchi lus siquent.


Geraint Jennings
Octobre 2005

 

Viyiz étout:

 

Les Pages Jèrriaises