Ch't'année quand j'mèrtchons les huit chents ans d'not' lian partitchulyi auve la Couronne, ch'est întérêssant d'penser qu'lé mot “couronne” fut donné ès Angliais par les Nouormands. Et né v'chîn acouo eune poutchie d'mots Angliais du Nouormand.
Av'ous réalisé qu'un “pocket” 'tait eune pétite pouque, chein qu'nou-s'appell'lait au jour d'aniet eune poutchette? Si j'acatons cat' en pouque, les Angliais préféthent un “pig in a poke”. Et né v'là not' mot Nouormand “acater” tchi donnit ès Angliais lus pathole “cater”.
En Jèrri, j'aimons bein acater et boutitchi, mais en Dgèrnésy il' aiment mus “choppaï” car il' ont gardé l'vièr mot Nouormand “choppe” tchi d'vînt “shop” en Angliais.
Quand nou couque, nou soulait faithe sèrvi un “cauldron” ou un caûdron pouor du fricot tch'est caud. Et lé “can” Angliais est not' “canne” Nouormande, même si j'avons prîns en êchange lé mot “ tinne” ès Angliais étout!
Lé mot “catch” en Angliais vînt du mot Nouormand “cachi” - ch'est la vèrsion Française du même mot tchi nos donnit “chase” et “chasser”. Et les tchians d'chasse d'meuthent dans eune canniche, tch'est en Angliais “kennel”, acouo un mot Nouormand.
Un “causeway” et not' caûchie veinnent d'la même originne Nouormande pa'ce qu' sont pavés auve d'la pièrre dé caux.
Et la caboche et lé cap'taine nouos mouontrent étout lé “c” typique du Nouormand où'est qu'lé Français a un “ch”.
Mais l's Angliais ont gardé l'mot d'originne Nouormande “castle”. J'avons acouo l'mot “câté” dans des noms d'pliaiche: Lé Câté, et pis Les Câtchieaux à La Trinn'té, et Lé Câtillon, et les Dgèrnésiais ont lus pâraîsse du Câté. Tout coumme, j'faîthons sèrvi achteu eune vèrsion înfluencée par lé Français: lé châté.
Assa, y'a un fliotchet d'mots dans la langue Angliaîche tchi vîntent d'la vielle langue Nouormande, mais ouaithe qué j'ayons ieu l'mot “fliotchet” du vièr Norrouais, l'Angliais avait dêjà san mot Gèrmannique “flock” avant la Contchête!
Geraint Jennings
Viyiz étout: