Dans les légendes Grècques nou trouve lé caractéthe du Minnotouauthé, eune criatuthe ou un monstre tchi 'tait mié-houmme, mié-touauthé, et tchi d'meuthait à Crète.
Minnos 'tait dév'nu rouai d'Crète atout l'aîgue du dgieu Poséidon, dgieu d'la mé. Minnos avait promîns au dgieu d'lî sacrifier un bieau blianc touauthé, mais quand Minnos vit l'touauthé i' l'trouvit si bé qu'i' trotchit chutte bête d'auve un aut' touaûthé qu'i' sacrifyit. Poséidon s'mârrit d'chutte trique-là, et pouor sa r'venge i' fit la bouonnefemme à Minnos, tch'avait nom Pasiphaé, tchaie amouotheuse du touauthé.
Pasiphaé c'mandit à Dédale, l'înginnieux du rouai, d'graie un mannetchîn d'vaque en bouais, couèrt dé pé d'vaque et sus des reues, dédans tchi qu'ou pouôrrait s'muchi à seule fîn d'séduithe lé touauthé. Dédale griyit l'mannetchîn tchi fut pliaichi dans l'pré où'est qu'lé touauthé paîssait. Pasiphaé grîmpit d'dans et espéthit êt' sèrvie par lé touauthé. Et v'là tchi s'adonnit.
Bétôt, nou viyait qu'Pasiphaé 'tait pouor porter un êfant, mais quand l'êfant fut né, ch'tait eune êmânue auve lé corps d'un p'tchiot et la tête d'un vieau. Sa méthe lé nossit, tout coumme, mais coumme lé Minnotouauthé grandissait, i' d'vînt sauvage et 'tait affanmé pouor d'la chai humaine.
Lé Rouai Minnos consultit un oracl'ye épis c'mandit à Dédale dé bâti un labyrînthe à seule fîn d'y'enfreunmer l'monstre.
Pus tard, par eune malédiction, l's Athéniens fûdrent forchis d'envyer des jannes (des hardelles, ou des hardelles et des hardgieaux) par bordée coumme des victînmes du Minnotouauthé. Thésée, un héros d'Athènes, décidit d'tuer l'Minnotouauthé et d'libéther les jannes gens d'Athènes d'la malédiction. Acanté les victînmes i' viagit à Crète et dans l'palais du rouais i' rencontrit la fil'ye à Minnos, tch'avait nom Arianne. Arianne tchit en amour dé Thésée et n'voulait pon qu'i' fûsse tué dans l'Labyrînthe (ch'est en tchi les victînmes poussés dans l'labyrînthe n'arrivaient janmais à lus en dêhaler sans êt' mangis par lé monstre tch'y d'meuthait au tchoeu). Arianne baillit à Thésée eune p'lote dé fi qui dêvyit driéthe li en entrant dans l'labyrînthe. I' tuit l'Minnotouauthé et siévit l'fi d'èrtou à l'entrée. La malédiction mouothit acanté l'Minnotouauthé.
Viyiz étout: