Les Pages Jèrriaises

La Fête des Méthes

Au jour d'la Fête des Méthes, dans toutes les églyises dans l'Rouoyaume Unni, les méthes èrchèvent un touffet d'flieurs d'lus êfants, et disent mèrcie au Bouan Dgieu pouor lus méthes.

En Améthique, au Cannada et en Australie, la Fête des Méthes sé fait pus tard, au deuxième Dînmanche dé Mai.

En Améthique i' c'menchîtent à célébrer la fête en dgiêx-neu chents huit, quand la d'mouaîselle Anna Jarvis voulait mèrtchi l'annivèrsaithe dé la mort dé sa méthe.

Malheutheusement, coumme toute aut' chose aujourd'aniet, la fête est dév'nue eune aut' occâsion conmèrciale, et eune grand' mâjorité dé pèrsonnes n'savent pas même qué ch'est eune occâsion èrligieuse, et qu'l'églyise est la méthe dé tout l'monde.

Eune méthe est l'tchoeu d'eune fanmil'ye, et ch'est d'nos méthes qué j'apprannons des choses hardi împortantes.

Ma méthe m'apprînt à coutchi, ou 'tait hardi bouanne dans la tchuîsinne, ou m'apprînt étout à couôtre, et à r'graie des cauches et braies, et pouor eune femme dé fèrmyi ch'tait bein c'mode.

Ou soulait dithe souvent en riant, “Tu m'manquéras quand jé s'rai horte.” Et coumment vrai qué ch'est.

Ah, tch'est qué j'donn'nais dé pouver donner un bieau touffet d'flieurs à ma méthe lé Dînmanche dé la Fête des Méthes!

 

Ursula Taylor

 

Viyiz étout:

 

Les Pages Jèrriaises