Jamais autchun malheur, nos dit le vièr dicton,
N'arrive à san tout seu;
Et d'annèe en annèe, che r'est la même chanson,
Combein d'fais qu'nou l'a veu!
Châtchun d'nous, d'expérience, pouorrait en dithe autant
- J'n'y pouvons pas c'mander -
Faut que j'prenions les chose en nos y conformant,
Nou n'gagne pas rein d'grounner!
Pourtant, ch'est souvent du d'vaie un malheur suivi
D'un autre en un rein d'temps!
S'nou savait qu'che s'sait tout quand nous a yieu l'prumi'
Nous en s'sait pus contents.
J'vos êcrivais, Samedi, que l'pouorre Prêtro 'tait mort:
J'en avons tous dêpièd,
Et Mess Bisson en 'tait tout triste, chu pouorre corps,
Tant il avait de r'gret.
Annièt, faut que j'vos conte un autr' triste êvenement
Qui nos a mins l'tchoeu gros:
Samedi notr' boëte à s'no, je n'savons pas coumment
Dispathu du Bureau!
Elie
|
