Les Pages Jèrriaises

Vive la Lumière!

(Nouvelles Locales, Nouvelle Chronique, 31 Janvier 1906)

Oui, vive la lumière
Et lé "gaz" dans lé mont,
Vive châque réverbère
N'ou n'y est pûs à tâtons;
En r'vénant dé la ville;
Ou bein en s'yien allant,
N'ou vait ouèqué n'ou pile,
Ch'n'tait pon d'maîme dé d'vant -

N'ou n'y vyiait pon la nièt
La main dévant sé,
Et si n'ou mantchait l'pavè
N'ou tchiait dans l'canné,
Au risque dé dèslotchi
Sa pouore qu'ville ou l's'ortés,
Mais n'ou a'tait seûre d'y mouôllyi
Les bottes et les braies.

Car y'ia des sourcins la l'long
Tchi deshallent de terrain,
Et, moussieu, jé vos en rèsponds,
L'iaue y rouôlle bel et bein,
Grossis par la plyie,
Ch'est un dou' dé moulin,
Et châque botte bein vernie
Y perd vite le biâtchin! -

Si lé malheur en restait là,
Si n'ou n'avait qué bottes sales,
Mais ou pâslez d'un autr' mâ
Dans vos Nouvelles Locales!
Bouschuirie d'innocents,
Dé chès chiers pétits tchoeurs,
Tchi s'arrêtent dé temps en temps
Pour s'ent'dire des douôcheurs! -

Profitant du temps sombre,
Lyien des yiers indiscrêts,
Y sont à l'abri à l'ombre,
Et s'entre content lus sécrèts
Mais arrive un pâssant
Tchi marche d'un pas prêssi
Y boutte bein raide dédans
Et trébuque lus plaisi.

Che n'est pas par exprès
Bein seûre qu'y fait ditet,
Mais ch'est manque dé les vais,
Et manque dé cliairtè.
Chanceûx s'sa lé pâssant
Si dans la maîme minute,
La fillette et lé galant
Né lé traitent pon dé "brute!"

Dé pareils accidents
N'arriv'ront pon achet'eu,
N'ou peut vais dé tout temps...
Ouèquè sé trouve la mucreu.
Les amouôreux, étout, sans autchun doute,
Trouv'ront dé l'ombre par aillieurs,
Pour y'ieux, par là, y'ià pus d'unn' route
Sans "gas," lumière ni bouschuleurs!

J.P.
1906

 

Viyiz étout:

 

Les Pages Jèrriaises