Mousieu,
Hier au sé, oprès avé avalai man souper, je me mins sus un sictin, au coin de l'âtre, et comme i faisait une indag fraid, ma femme fouoti une piessante brachie de plize drière le ticle et ayant happai sen oeuvre, ou s'assit sus la jonquière ov nos deux petits garçons. Le vent bueûlait dans le pertus de la clié, et faisait étout une diverse bourdonnerie dans le po que j'avons sus not chem'naie. Mais i iavait oquo pus de tinné sus not jonquière que dehors. Nos maôudits avers ne voulaient pas se tenin en r'pos ; j'avais biaux les tanchi, oua, i n'en faisaient note. J'avais biaux lus dire que s'il allaient se frazé trop prêt du crasset qui finiraient par l'êtrueûlé, et qui ruinnenaient lus bouans blanchets ; au liy de m'écouter, i continuirent a jouer et a faire une té boucan, que ma fé, la tête en touonait. I iavet deja un p'tit brin que je les r'gardais faire, quand v'la-t-i pas que ma femme s'appréche de la veue pour r'levé un point quoul avait laissi quiès, et justement comme ou r'trouvait san damazai, craque, not garçon Pierre, quiès un veritable ravaôud; fouote un co d'ailelon au crasset, et étrueûle hièle et toute la pêque sus un bouan cotillon de droguet quoul avait sus la corpe, et mé quiavais tait à une pare de neuches, et quiavais oquo mes brés du Dimanche, j'en amendis de deux ou très bouans clappets, de manière qui sont vilannais. Mais che n'est pas tout, ches maôudits avers qui'avaient des blianchets que je lus avions fait faire d'piès naguères, et qu'etaient oquo tout fin fliambant neufs; il en furent si ben saôuçais que nous les érait sentis de d'dans la Grand Rade ! sou z'aviez veu dans qui marrisson es que j'tais ; je lus en dis pus qu'à pendre ; tant et si ben qu'enfin i se minrent à braire comme si le fortune les eussent diguis. Ou pouvais ben pleurer, se lus fis-je, ach'teu que le ma est fait. I fallait m'écouter quand je vos lichonnais, mais ou z'êtes si oinnâtres qu'ou ne voulais jamais sière les avis des cheins qui savent mus que vous. Enfin, ou z'avais fait le dro, et ou patirez pour. Tésous, ou n'ête pas su ravé de bouans blianchets a gâté :- oprès lus avé bailli mille vitupères, lus mère s'en alli les couochi, et mé, je halli mes brés, et les fouoti dans not grand pêle, et quand ma femme fut r'devalaie, ou li claquit blianchets et cotillon ov eu, et comme j'avions fouoniai hier matin, nou s'en fut tréchi un sièstonnii de bouanne chendre dans la founoaise, pour tachi de hallé chutte puasine ; mais que nou faiche che que nous voudra, je pense ben, qui nessont jamais comme ils taient.
Je v'nais justement de couler une vieille pare de brés de cordéré, oué seulement ma femme venait d'y mettre un cliut, quand not couosin Thomas Roui entre, et dès qui se fut claqui dans une quière que nou l'ioffrit, je nos minmes à pâlé d'affaires et d'aôutres. Oprès une volaie, i me dit, sem fit i : avous veu le Concionnel des drains Samedis? I parait donc que la Police s'en va être enviaie to de rait about? J'ai oui dire étout, mais je ne sais pas s'il est vrai, que le Gouvernement s'en va changi not Cour, et que Mousieu Picot s'en va être nommai Bailli. Si font d'itait, quès que Mousieu Le Sueux dira li, car chest à li que la plièche vein. I dient étout que le Gouvernement s'en va nos envié une fliotte ilo, et que chest le Chent'nii Ch'valii qui dé en avait le qu'mandement mais j'ai de la peine à crère chonna mé. Mais pour la Police, je me siès laissi dire qui s'en va iavé quique changemens. Et à quest la faôute? Et quement, chest à ches interdits aigrefins, ches ennemins de Jerri. Sans ieux tout 'ssait ben. Avaient-i affaire de se pliaindre ? Chest lus maôudite goule quia ruinai tout .... Quand je vi qui s'écaouffé, et que sa varvette qu'menché a l'iallé quasi ossi vite comme un moulin à côneille, je me mins à pâlé d'aôutres choses et ma femme qui n'a pas l'esprit en écharpe, li d'mandi pour ses gens ; si sans grand fils était 'rvenu de la Baie d'Hendorés, et l'aôutre de Livrepool, tant et si ben que je fininmes par passé oquo une moyenne bouanne seraie ; mais s'il avé continuai dans une tait guédon, je m'en 'ssais étout bétôt mêlai, car mé qui'aime tant ches saints apôtres de Rosiers, je n'erais peu m'empêchi de l'iouvri man fieillet. An, je l'iérais tenu un discours quiéré valu autant pour le p'tit mains comme les sermons du Père Nardin.
Eh ben, Mousieu l'Editeur, je n'ai fait que ruminé toute la niet sus l'accident de chu maoudit crasset et de l'affront des Rosiers, et je me disais, sem faisais-je : i faôut que ches Rosiers là 'ssaient une drôle de race. I sont aussi piéres que les avers. Nou za biaux lus bailli des avis, i n'en veulent mèche. Iavé de ches vieilles têtes qui ne manquent pas de chervelle ni de boudins, qui ne cessaient de lus dire : ou z'êtes à faire des bêtises, ou vos en allais justement vos rompre le co ; bah, ch'tait justement comme quiéré chantai au vent. I s'en allaient touos le bé levai, comme un flioquet de coquantins, se dréchant et se prélassant, comme s'il avaient tai maitres et aôuniers de Jerri et quand les gens comme i faôut les viaient, i ne pouvaient s'empechi de dire : "allais, allais tréjous, mes mignons, quand ou zérais fait le tou de vot lian, ou n'irais pas pus loin." Et pis ach'teu quil ont peu lus terraie, et qui vaient qui sont souos le fou, v'la ti pon qui mènent pus de vie qu'un couochon quia la rouogne ès deux ouoreilles. Le milleur avis que j'érais a lus donné essé de se tenin en r'pos, car quand nou za ma au coeu, si nou baille rtrop de sa varvette, nou z'est sujet à renversé. Vos priant de faire ben nos r'quemandations a not couosine vot femme.
Je siès, etc.,
PIERRE MAILLARD.
St.-Jean, Mouori, Déc. 28, 1846.
Le Constitutionnel 2.1.1847
Viyiz étout: