Les Pages Jèrriaises

Eune tape à l'us

Lé mais d'Janvyi prînt san nom d'Janus, lé dgieu Romain d's us. Viyant qu'nou peut entrer ou tchitter par autcheune porte, Janus avait deux faches et coumme dé raison fachait en avant et en arriéthe. San mais ouvre don la Nouvelle Année, mais ch'est l'temps étout d'èrgarder en arriéthe et d's'amender en faîthant des rêsolutions.

Janvyi est l'pas d'l'us d'l'année, et y'a eune vielle crianche qué la preunmié pèrsonne tch'entre dans la maîson auprès mînniet d'la Sèrvelle du Jour dé l'An apporte lé bonheu ou l'malheu au mênage.

Un mathié dait porter la mathiée l'travèrs du pas d'l'us auprès les neuches, mais acouo eune crianche nos dit qu'un ouaîsé tch'entre la maîson par l'us, ch'est un avèrtissement qu'tchitch'un s'trouv'tha au pas d'l'us d'la mort.

“Pâsser par lé grand us” veurt dithe aver d'la chance, mais nou n'est pon chanceux s'nou trouve l'us clios.

Faut aver l'nez dans l'mitan d'la fache, et s'lon la couôteunme Orientale dé feng shui, ch'est împortant d'pliaichi vos meubl'yes souongeusement par rapport ès portes. Lé grand us dait êt' pus grand qu'l'us d'driéthe. Eune porte tchi fache à l'Êst dév'thait êt' peinte en vèrt, mais i' faudrait couleuther en rouoge la cheinne tchi fache au Sud. Ieune tch'est blianche est bouonne pouor fachi au Vouêt, et pouor vot' porte tchi fache au Nord ou dév'thêtes chouaîsi sait l'nièr ou sait l'bliu.

Mais ch'n'est pon seulement les cheins d'l'Êst tch'ont à dithe entouor les portes et l's us, car la Bouonne Nouvelle s'lon Matchi nos dit: “Entrez par l'us êtrait; car l'us d'la pèrdition a d'la laîze, et lé c'mîn tch'y mène est grand, et y'en a hardi tchi y'entrent.”

Faites vos rêsolutions don, bouonnes gens!

Geraint Jennings

 

Viyiz étout:

 

Les Pages Jèrriaises