En 2000, lé Jour d'St. Hélyi 'tait sus un Dînmanche, et ouaithe qu'en génétha nou mèrque la journée sus l'Dînmanche lé pus proche du 16 dé Juilet, ch't'année i' tait pôssibl'ye d'mèrtchi la journée sus l'16. Ch'tait înmportant pa'ce qué l'an 2000 merque 2000 ans d'Chrêtchienneté et ch'fut St. Hélyi tchi apportit la pathole dé Dgieu en Jèrri. J'eûnmes don eune grande célébrâtion millénaithe.
La procêssion c'menchit à l'Églyise Pârouaîssiale dé St. Helyi, et fît san c'mîn par les rues du Centre-Ville.
Ou continnuit par la Pathade et jusqu'au People's Park, où'est qu'nou-s'arrêtit pouor ouï la chant'tie des mousses tchi racontîtent l'histouaithe dé Jésû auve la mûsique.
Nou pouôrrait vaie L'Hèrmitage du People's Park, bein seu.
Nou crouaîsit la rue, et ès Jardins de la Mer j'nos rencontrînmes lé Lieut'nant-Gouvèrneux et sa Danme et la dgaîngue officielle s'n allit vèrs lé Châté par l'Pont.
L's aut's gens 'taient supposés d'attendre Jésû et l'âne - mais les gens 'taient lâssés d'attendre en don tout l'monde s'n allit souôtre lé Douoyen, lé Connêtabl'ye, lé tchoeu et l's aut's.
Ah mais! Y'avait un tas d'cliaque sus l'Pont et y'avait des gens tch'avaient d'la diffitchulté à y marchi sus. Y'avait des gens tchi ôtîtent lus cauches et soulièrs à seule fîn d'pouver marchi nueus-pids au Châté.
Quand nou-s'arrivit au Châté, y'avait des gens en costume pouor èrprésenter des caractéthes d's histouaithes Biblyiques.
Eune partie des gens continnuit à l'Hèrmitage pouor vaie lé liet d'St. Hélyi. Coumme tréjous, lé Connêtabl'ye dé St. Hélyi y mînt un cèrcl'ye d'flieurs - et ch't'année y'avait étout tchiques Connêtabl'yes d'aut's Pâraîsses étout.
Ch'fut eune bouonne opporteunité d'explyitchi l'histouaithe du Saint ès vîsiteurs tchi n'connaîssaient pon la légende.
Sus la Pathade du Châté, j'èrgardînmes des p'tites pièches tchi nos mouontrîtent d's episodes dans la vie d'Jésû et d'St. Hélyi.
Jésû fut condamné par Ponce Pilate à êt' crucifié sus l'Mont du Châté.
I' portit sa Crouaix - accompangné par des soudards Romains - à travèrs la Pathade par la foule dé pèlerîns. Nou n'éthait janmais creu qu'lé Châté Lîzabé èrsembliait tant à Jérusalem!
La Crouaix fut l'vée sus l'Mont du Châté à côté d'la Maîson du Cap'taine.
Pis, la vie d'St. Hélyi fut présentée. Nou viyit coumme tchi san péthe avait fait tuer St. Cunibert tch'avait, s'lon l'péthe à Hélyi, trop d'înfluence sus l'mousse.
St. Hélyi, habilyi coumme un mouaine, crouaîsit la Pathade du Châté pouor èrprésenter san viage en Nouormandie et en Jèrri, et à la fîn i' fut attatchi par des pithates à côté d'la crouaix d'l'Abbaye.
J'eûnmes des priéthes, des cantiques et des feux d'artifices - et même un mio d'solé dans l'arlévée pouor célébrer St. Hélyi.
16/7/2000
Viyiz étout: