L'Êpitre ès Hébreux
Chapitre 1
Dans l'pâssé l'Bouôn Dgieu nos pâlait par les prophètes bein des fais et dans des difféthentes manniéthes, mais à ches drein i' nos a pâlé par san Fis qu'il appouaintit l'héthitchi d'toute chose, et par tchi qu'il avait grée l'unnivèrs. Lé Fis est la lithie d'la glouaithe du Bouôn Dgieu et l'împression exacte dé s'n êt', en souôt'nant toute chose par sa pathole piêssante. Auprès qu'il avait grée la puthifiéthie des péchés, i' s'assiévit au dêtre dé la majesté divinne dans les lieux bein hauts. Et chenna en dév'nant supéthieux ès m'sagièrs coumme il a héthité un nom tch'est pus haut qué l'leu.
Ch'est en tchi autché des m'sagièrs qu'lé Bouôn Dgieu a janmais dit:
"Tu'es man Fis; aniet j'sis dév'nu tan Péthe"?
Ou acouo:
"Jé s'sai san Péthe et i' s'sa man Fis"?
Et acouo, quand l'Bouôn Dgieu porte san preunmié-né dans l'monde, i' dit:
"Qu'touos les m'sagièrs du Bouôn Dgieu l'louangent."
En pâlant des m'sagièrs i' dit:
"I' fait ses m'sagièrs des esprits, et ses sèrvants des fliambes dé feu."
Mais entouor lé Fis, i' dit:
"Tan trône, oh Dgieu, enduthe à tout janmais; un scèpt' dé justice s'sa l'scèpt' dé tan rouoyaume. Ous avez aimé la justice et détesté l'ma; et don L'Bouôn Dgieu, tan Dgieu t'a onguenné atout l'hielle dé la jouaie pouor t'êtablyi au d'ssus d'vos compangnons."
Épis acouo i' dit:
"Au c'menchement, Seigneu, tu'êtablyis les fondâtions dé la tèrre, et les cieux sont chein qu'tes mains ont grée. I' péthithont mais tu'enduth'thas; tu l's enrouôl'las coumme eune robe; coumme un habit i' s'sont changis. Mais tu reste lé même, et n'y'étha pon d'fîn à vos années."
Et autché des m'sagièrs l'Bouôn Dgieu a dit: Assied-té à man dêtre jusqu'à ch'qué j'faiche tes ennemîns eune scabelle pouor tan pid"?
Ch'n'est-i' pon qu'touos l's anges sont d's esprits pouor minnistrer envyés sèrvi les cheins tch'héthit'tont l'salut?
Chapitre 2
Jé d'vons don faithe la pus souongneûthe attention à chein qu'j'avons ouï, à seule fîn qué j'n'en séyons pon emportés. D'pis qué lé m'sage annonchi par les m'sagièrs nos a lié, et châque contravention et d'sobéïssance a r'chu sa juste peunnition, coumme tchi qu'j'allons êcapper en néglyigeant un si grand salut? Chu salut tchi fut annonchi preunmiéthement par lé Seigneu, nos fut confirmé par les cheins tchi l'ouîdrent. Lé Bouôn Dgieu l'têmouongnait étout atout des sîngnes, des mèrvelles et des difféthents mithacl'yes, et par les dons du Saint Esprit distribués s'lon sa volanté.
Ch'n'est pon ès m'sagièrs qu'il a assujetti l'monde à v'nîn, entouor tchi qué j'sommes à pâler. Mais tchique bord tchitch'un a têmouongni:
"Tch'est qu'est l'humannité qu'tu t'en d'mente, et un fis d'houmme qué tu l'souongne? Tu l'as grée un mio pus bas qu'les m'sagièrs; tu l'couronnis dé glouaithe et d'hounneu. Tu mîns tout souos lus pids."
En m'ttant tout sous ieux, l'Bouôn Dgieu n'laîssit rein tchi n'lus est pon assujetti. Mais pouor achteu jé n'viyons pon tout assujetti à ieux. Mais j'viyons Jésû tchi fut abaîssi pouor eune pause en d'ssous des m'sagièrs achteu couronné d'glouaithe et d'hounneu par cause qu'i' souffrit la mort, pouor qué par la grâce dé Dgieu i' pûsse gouôter la mort pouor tous.
En m'nant bein des fis et fil'yes à la glouaithe, i' conv'nait qu'lé Bouôn Dgieu pouor tchi et par tchi tout existe faiche lé Preunmyi d'lus salut parfait par chein qu'i' souffrit. Lé chein tchi sanctifie lé monde et les cheins tchi sont sanctifiés sont touos ieux d'la même fanmil'ye. Jésû don n'a pon d'honte dé l's app'ler les fréthes et les soeurs. I' dit:
"J'dêcliath'thai tan nom à mes fréthes et soeurs, dans l'assembliée jé chant'tai tes louanges."
Épis acouo:
"Jé m'fiéthai à li."
Et i' dit acouo:
"Mé v'chîn, et né v'chîn l's êfants qu'lé Bouôn Dgieu m'a bailli."
D'pius qu'les êfants ont la chai et l'sang, li étout i' chârait dans lus humannité à seule fîn qu'par sa mort i' pûsse bûchi l'pouver du chein tchi tcheint l'pouver d'la mort - ch'est en tchi l'dgiâbl'ye - et libéthîsse les cheins tchi 'taient tînt en escliavitude toutes lus vies par lus peux d'la mort. Pouor lé seux ch'n'est pon ès m'sagièrs qu'il aîgue mais ès d'cendants d'Âbréhan. Né v'là pouortchi qu'il avait à êt' grée coumme ieux, plieinement humain dans toutes les manniéthes, à seule fîn qu'i' pûsse dév'nîn un grand prêtre mînséthicordgieux et fidèle dans l'sèrvice du Bouôn Dgieu, et qu'i' pûsse expier les péchés du peupl'ye. Ch'est en tchi ayant souffèrt quand il avait 'té tenté, il est capabl'ye d'aîdgi ès cheins tchi sont tentés.
Chapitre 3, vèrsets 3-4
Car ch't houmme-chîn 'tait pus r'nommé qu'Moïse viyant qu'lé chein tch'a bâti la maîson est honothé pus qu'la maîson. Car châque maîson est bâtie par tchique houmme, mais l'chein tch'a bâti toute chose est l'Bouôn Dgieu.
Chapitre 3, vèrsets 3-4
Et v'là tchi 'tait juste qué ch't houmme-chîn fûsse honothé pus qu'Moïse, dé même qu'lé bâtisseux d'eune maîson a pus d'glouaithe qu'la maîson. Ch'est en tchi châque maîson est bâtie par un houmme, mais l'chein tchi bâtit tout est l'Bouôn Dgieu.
Chapitre 5
Châque grand prêtre est chouaîsi d'parmi l'peupl'ye et est appouainté pouor èrprésenter l'peupl'ye dans l'sèrvice du Bouôn Dgieu, pouor offri des dons et des sacrifices pouor les péchés. I' peut traiter douochement les cheins tchi sont înnouothants et êdgéthés, viyant qu'lî-même il est sujet à la fouaiblièche. Né v'là pouortchi qu'i' dait offri des sacrifices pouor ses propres péchés, coumme pouor les cheins du peupl'ye. Et fis d'âme né prend pouor sé ch't hounneu, mais i' l'èrchait quand app'lé par lé Bouôn Dgieu, coumme Âron l'fut.
Dé même l'Onguenné n'prînt pon pouor lî-même l'hounneu dé dév'nîn un grand prêtre. Mais l'Bouôn Dgieu lî dit:
"Tu'es man Fis: aniet j'sis dév'nu tan Péthe."
Et d'aut' bord i' dit:
"Tu'es un prêtre pouor tréjous, s'lon l'ordre dé Melchisédek."
Duthant les jours d'la vie d'Jésû sus la tèrre, il offrait des priéthes et des supplyicâtions auve des grands brais et des plieurs au chein tchi pouvait l'sauver d'la mort, et ayant 'té êcouté par cause dé sa vouêthie révéthente, ouaithe qu'i' fûsse lé Fis, il apprînt l'obéïssance dé chein qu'il avait souffèrt. Un co, ayant 'té êl'vé à la pèrfection, i' d'vînt la r'ssource du salut êtèrnel pouor touos les cheins tchi l'obéïssent, et fut nommé par lé Bouôn Dgieu pouor êt' lé grand prêtre s'lon l'ordre dé Melchisédek.
J'avons un tas à dithe entouor chennechîn, mais ch'est dû d'vos explyitchi par cause qu'ou n'êprouvez d'aut' à comprendre. Dé vrai ouaithe pouor chu temps-chîn qu'ou daiviez êt' des maît', ous avez qu'faithe d'aver tchitch'un pouor vos ensîngni dèrché les preunmié êléments d'la véthité d'la pathole dé Dgieu. I' vos est d'mêtchi d'baithe du lait, au run d'mangi d'la nouôr'tuthe solide. Mais la nouôr'tuthe solide est pouor les cheins tch'ont aveint à la matuthité, tch'ont pratitchi coumme tchi distîndgi à la longue l'bein d'auve lé ma.
Chapitre 6, vèrset 10
Lé Bouôn Dgieu n'est pon înjuste; i' n'oubliétha pon vot' travas et l'amour qu'ou li'avez mouontré coumme ous avez aîdgi à san peupl'ye et continnuez à lus aîdgi.
Chapitre 7, vèrset 12
Car si les prêtres sont changis, nou-s'étha coumme dé raison à changi la louai
Chapitre 7, vèrset 25
I' sauv'tha les cheins tchi s'appraichent du Bouon Dgieu par Li.
Chapitre 8, vèrset 12
Car jé pardonn'nai lus mauvaîtchi et jé n'mé souveindrai d'aut' dé lus péchés.
Chapitre 8, vèrset 16
N'oubliez janmais dé faithe la charité car ch'est patheil sacrifice tchi fait pliaisi au Bouon Dgieu.
Chapitre 9, vèrset 14
Épis l'sang d'l'Onguenné, tchi par l'Esprit êtèrnel s'offrit sans ohyi au Bouôn Dgieu, d'abouôn pus nettitha nos conscienches d'actes tchi mènent à la mort, à seule fîn qué j'piêssêmes sèrvi l'Dgieu vivant!
Chapitre 12, vèrset 1
Viyant don qué j'soummes entouothés d'un si grand fliotchet d'têmouains, dêfrâlîndgons-nous d'tout tch'empêche et du péché si enhèrmèle si aîsîment. Et couothons auve d'la pèrsévéthance la course tchi nos est mèrtchie.
Chapitre 12, vèrset 22
Mais tu'es v'nu au mont d'Sion, siez l'Dgieu vivant, au Jéthusalem tch'est au ciel, et à eune armée d'anges qu'nou n'pouôrra pon cartchuler.
Viyiz étout: