Entr'-aim'-ous acouo coumme des fréthes et des soeurs. N'oubliez pon d'faithe la beinv'nue ès vîsiteurs, ch'est en tchi en faîthant d'même y'en a tch'ont atchilyi des m'sagièrs sans l'saver. Souv'n'-ous acouo des prisonnièrs coumme s'ous 'têtes acanté ieux en prison, et les cheins tchi sont maltraités coumme s'ou 'têtes vos-mêmes à souffri.
Tout l'monde dévthaient honother l'mathiage, et n'faut pon enteuther l'liet d'mathiage, ch'est en tchi l'Bouôn Dgieu jug'gea l's adultéthes et les dêvèrgondés. N'séyiz pon haitchis des sou; content'-ous d'chein qu'ous avez, ch'est en tchi l'Bouôn Dgieu a dit: jé n'vos laîss'sai janmais ni n'vos abandonn'nai.
J'pouvons don dithe auve d'la confianche: L'Seigneu est acanté mé, et jé n's'sai pon êffrité: tch'est qu'l'houmme peut faithe contre mé?
Souv'n'-ous d'vos chefs, tch'ont pâlé la pathole dé Dgieu auve vous. Considéthez la fîn d'lus manniéthe dé vivre et înmitez lus fouai. Jésû Chri est l'même hièr et aniet et à tout janmais.
N'vos laîssiz pon êt' enhèrmélés dans des doctrinnes bizarres. Ch'est bein qu'nos tchoeurs saient renforchis par la grâce, par en mangeant du mangi d'cérémonnies tchi n'sèrt à rein ès cheins tch'en mangent. Nous j'avons un auté d'tchi les chein tchi font l'sèrvice au tabèrnacl'ye n'ont pon l'pouver d'mangi.
Lé grand prêtre porte lé sang d's annimaux dans l'sanctuaithe coumme un sacrifice pouor lé péché, mais les corps sont brûlés hors lé camp. Et d'même Jésû souffrit hors l'us d'la ville à seule fîn d'sanctifier l'peupl'ye atout san propre sang. Sortons don pouor aller à li hors lé camps en portant la disgrâce qu'i' suffâtchit. Ch'est en tchi ichîn j'n'avons pon eune cité tch'enduthe, mais jé chèrchons pouor la cité tch'est pouor v'nîn.
Par Jésû don offrons tréjous au Bouôn Dgieu un sacrifice dé louange ch'est en tchi l'frit des lèvres tchi procliâment ouèrtément san nom. Et n'oubliez pon d'faithe lé bein et d'chârer auve des aut', ch'est en tchi ches'-chîn sont des sacrifices tchi pliaîthent au Bouôn Dgieu.
Obéïssiz à vos chefs et souômett'-ous à lus autorité, par cause qu'i' vil'yent sus vous coumme des responsabl'yes. Faites chennechîn pouor qué lus d'ver lus sait eune jouaie au run d'un suffât, car chenna n'vos s'sait pon d'profit.
Priez pouor nous. J'soummes seurs qué j'avons la conscienche cliaithe et lé d'si d'vivre honothabliément en tout. J'vos prie d'prier pouor qué j'vos sai renvyé l'pus tôt qu'pôssibl'ye.
Qu'lé Dgieu d'paix tchi par lé sang d'l'alliance êtèrnelle ram'nit des morts not' Seigneu Jésû, chu grand Gardeux d'brébis, vos bâle tout chein tch'est bouôn pouor accomplyi sa volanté, et faiche en nous chein tchi lî pliaît, par Jésû l'Onguenné à tchi sait la glouaithe à tout janmais. Âmen.
J'vos prie, mes fréthes et soeurs, d'accepter ches patholes d'exhortâtion; j'vos ai êcrit raîque tchiques buts.
Sachiz qu'not' fréthe Tînmothée a 'té lâtchi. S'il arrive bétôt, j'veindrai acanté li vos vaie.
Saluez touos vos chefs et tout l'peupl'ye du Seigneu. Les cheins d'Italie vos envyient lus salutâtions.
Qu'la grâce sait acanté touos vous.
Entr'aim'-ous acouo et tréjous. N'oubliez pon d'faithe la beinv'nue ès înconnus, car y'en tch'ont atchilyi d'chutte manniéthe des m'sagièrs sans réalîser. Souv'n'-ous des cheins en prison, coumme s'ou 'têtes en prison d'compangnie auve ieux, et des cheins tchi sont engis, coumme s'ou 'têtes engis, vous. Respectez les mathiages à touos, et qu'lé liet ès mathiés n'sait pon d'shonothé; car l'Bouôn Dgieu jug'gea l's adultéthes et les dêbaûchis. Séyiz libéthés d'l'agravâtion, et content'-ous d'chein qu'ous avez; car i' l'a dit, "Jé n'vos laîss'sai ni tchitt'tai." Don j'pouvons nos y fier en dîthant, "L'Seigneu est acanté mé, et jé n's'sai pon êffrité: tch'est qu'l'houmme peut faithe contre mé?"
N'oubliez pon l'hospitalité, car ch'est par lyi qué tchiqu's'uns ont louogi d's Anges sans l'saver!
Gardez vos vies libres d'l'amour des sou, et séyiz contents d'chein qu'ous avez, ch'est en tchi l'Bouôn Dgieu a dit, "Jé n'vos lâqu'thai janmais; jé n'vos dêdgèrpissez janmais."
Jésû-Christ est lé même hièr, aniet et d'main.
Viyiz étout: