D'la Grosse Gâche
ou Gâche à Pâte Lévée
L's îngrédgiens :
- deux livres d'flieu ordinnaithe
- eune pinchie d'sé
- gros comme deux bouonnes nouaix d'lèveton
- du chucre comme i' vouos pliait (mais pas trop car vl'à tchi f'sait la gâche trop b'sante, ou alitée)
- eune d'mié-livre d'beurre
- un oeu ou deux
- eune d'mié-livre d'gros raisins
- du lait caud
L'èrchette :
Mettez la flieu et l'sé dans eune tèrrinne et faites un creux au mitan. Frinnez bein vouot' lèveton et mettez-lé dans l'creux. Cauffez du bouon lait frais et vèrsez-lé sus l'lèveton et pis faites vouot' pâte en mêlant bein la flieu. Pas trop d'lait à la fais car y'a acouo les oeufs et l'beurre tchi mouoillent, et i' n'faut pon qu'la pâte sait trop molle. S'ou cliute ous éthez eune gâche b'sante tchi vouos donn'na la pons'rêsse!
A ch't heu, cratchiz l's oeufs et fliantchiz-les d'dans et l'chucre et les raisins, et battez quédaine. Couvrez la tèrrinne auve un flianné et mettez-la dans la chaleu, mais pas dans un couothant d'air. Quand la pâte étha monté, battez, mais hardi, eune deuxième fais. I' faut qu'la pâte sait longue et qu'ou n'cliute pas à la tèrrinne. Sans ch'la, malheur!
Mettez ch'la auprès dans un vaissé bein graissi, seulement à la maîntchi du vaissé car i' faut qu' vlà tchi monte jusqu'à haut. (S'i' vouos pliait ou pouvez faithe la gâche sans raisins. Ma grand'méthe faisait les deux sortes pour Noué.)
A ch't heu couvrez vouot' vaissé et laissiz la pâte monter jusqu'au haut.
Nou mettait ch'la au grand fou à la sortie d'la fouônnée d'pain. Nou cauffe lé fou auve du geon bein sé, tch'a 'té copé ofûche dans les falaises, pour la fouônnée d'pain.
La cauff'sie du grand fou prend dans les eune heuthe et d'mie. Ch'est eune tâche tout à fait d'licate et bein importante. Quand nou crait tch'il est caud assez nou l'êprouve en parfénant eune pouongnie d'flieu sus la brique. La manniéthe qué la flieu breunit nouos dit s'il est bein - sait trop caud ou pas assez.
Et pis à la sortie du pain nou r'cauffe atout eune dgèrbe dévant enfouônner la gâche. D'autres tchuisent la gâche acanté l'pain. I' fallait à bein près eune heuthe et d'mie à tchuithe, mais sus les grais d'à ch't heu ch'est difféthent, selon l'grais. Pour êprouver la tchuituthe nou pique eune adgulle à ouvrer cauffée dans la gâche et s'ou sort dé d'dans cliaithe, ch'est bein; la gâche est tchuite. Autrément nou tchuit acouo un quart d'heuthe ou pus.
(Né v'chîn eune bouonne èrchette dêtaillie tchi fut env'yée du Bas Rhîn par Mde. Ritzentaler, née Sarre, dé St. Jean.)
Viyiz étout: