Fort Lauderdale, Florida,
U.S.A.
Lé 13 d'avri, 1968.
Moussieu l'Rédacteu,
J'vouos pâlais, y'a tchiques sémaines, du diton tchi nouos dit qu'nou n'peut pon enrichi un publyi. Lé chein tch'înventit chu diton-là (un Gris-Ventre, tout probabliément!) avait des p'tits boudîns dans sa tête, car ch'est absolûment vrai!
L's Améthitchains sont r'nommés pour vouler aîdgi à tout l'monde. Tchiquesfais j'crai tch'il en sont bêtes! Quand nou donne des sou au monde pour rein, v'la tchi lus hale l'ambition d'vouler travailli, et i' y'a, à ch'tchi pathaît, trais généthâtions d'gens dans l'pays tch'ont vêtchu sus la pâraisse, comme nou dîsait en Jèrri l'temps passé, sans faithe un coup d'travas! Eune manniéthe bein seûthe dé r'chéver d'la pâraisse en Améthique est pour eune femme d'êt' méthe sans êt' mathiée. Eh bein, i' s'en trouve dé mème dans des successives généthâtions, et s'i' y'en a pus qu'ieune dans châque généthâtion i' peuvent èrchéver assez d'sou pour les bésoins d'eune fanmile sans travailli. Ch'est quâsi încriyabl'ye, mais ch'est d'mème!
Nouot' gouvèrnément vote un tas d'sou - des billions d'dollars - touos l's ans pour aboli la pauvrété, mais eune partie d'ches sou-là né va janmais jusqu'ès pauvres. Ch'est la bureaucratie tch'en profite lé pus! J'liêsais dans la gâzette d'ichîn l'aut' sé (Fort Lauderdale News du dgix d'avri) qué d's agents du gouvèrnément sont à faithe l'examen d'la manniéthe qué ches sou-là ont 'té faits sèrvi dans eune grand ville - eune cité dé deux millions d'habitants - qué j'connais bein. I' sé d'mandent pour tch'est qué chînquante millions d'dollars n'ont bénéficié qu'à peine tchînze pour chent des pauvres dé la cité. Ch'est à dithe qué sus 349,718 pauvres i' n'y en eut qu' 53,283 tchi fûdrent soulagis!
À c'menchi, l's agents (auditeurs ou Officiers Comptables" du gouvèrnément à Washington) ont dêcouvert qué l'administration du projet Anti-Pauvrété dans la ville en tchestchion a s'n office dans un bâtisse loué d'iun des parchonnièrs dans eune association d'hommes d'affaithes dé tchi l'Connêtabl'ye d'la ville est membre, et qu'lé louoyi payi dans l'couothant d'deux ans est quâsi êgale ès chent huiptante mille dollars tch'était l'prix d'atchêt du bâtisse. Et ch'n'est pon viyant qu'ch'est un bâtisse tch'a toutes les c'modités modèrnes, car i' y'a quarante ans tch'i' fut bâti!
Il' ont dêcouvert, étout, qué l'administration acatit, en mié-1966, à huiptante mille dollars dé machin'nie pour lé dentiste du projet enchèrgi d'êrachi et d'èrgraie les dents des pauvres, et qu'au mais d'dézembre, 1967, exactément quatre pèrsonnes avaient ieu lus dents d'èrgraies!
En d'ssus d'chutte gavach'chie d'sou-là, l's auditeurs ont trouvé qu'l'administration est en r'tard à payi ses comptes!
Eune aut' partie du projet est d'payi les maisons d'îndustrie pour donner un apprentissage ès jannes garçons tchi sont sans vocation et sans travas, et ès cheins tch'ont tchitté l'êcole dévant aver finni lus êducation. Ch'est sans doute dans l's êcoles s'gondaithes qué ch'la s'arrive, car la louai fait touos les mousses finni l'êcole êlémentaithe. Eh bein, l'Administration est si néglyigente qué l's auditeurs trouvent qu'un tas d'sou ont continnué à êt' payis pour d's apprentis tch'avaient tchitté l'projet dépis longtemps!
Quand j'pense à touos les sou tchi sont gavachis ichin, et à la malhonnêteté tch'aîgue à les gavachi, i' m'veint à l'idée qu'Jèrri est ieune des pliaiches au monde où'est qu'l'administration est aussi honnête comme nou peut trouver autcheun bord, et qué s'i' y'a telle chose comme dé gavachi honnêtement, ché s'sait en Jèrri qué v'la tchi s'sait fait!
Comme ou' d'vez l'aver veu dans les gâzettes Angliaîches, et à la télévision, un moussieu négre, lé Révérend Martin Luther King, pasteur Baptiste, veint d'êt' assâsinné. V'la tch'a fait les négres èrquémenchi d's êmeutes dans eune demié-douzaine dé grand' villes, où'est qu'les maîsons d'habitation et d'conmèrce ont 'té mînses à feu. Les soudards ont 'té appelés à aîdgi à la police à rêtablyi l'ordre, et dans l'procédé i y'a ieu entre trente et quarante pèrsonnes tuées. En grand' partie, ch'tait des pèrsonnes tch'étaient à voler les marchandises dans les boutiques où'est qu'les f'nêtres avaient 'té d'pichies par les pièrres, des briques et des boutelles. Eh bein, pour èrvénîn à la malhonnêteté, nou créthait qu'les gens tchi s'abûsent à voler d'mème en temps d'êmeute es'saient des pauvres dans l'bésoin et tchi n'peuvent pon affaûrder à acater l's objets tch'i' volent. Ch'est ch'là qué j'criyais mé-mème, mais la gâzette nouos dit qu'eune analyse faite par la Cour dévant tchi qu'les voleurs fûdrent présentés, dans la capitale dé Washington, montre qu'un tas d'ieux 'taient mathiés et vivaient largément. Y'en avait mème tch'étaient empliyés par L'Êtat et tchi gangnent dé bouans sou, et y'en avait tch'avaient 'té au Collège! Ch'n'est don pon la pauvrété tchi les poussent. I' n'y a pon d'doute tch'i' sont en r'volte, les gens d'couleu, et viyant qu'les boutiques sont généralement la propriêté des bliancs, ch'est ieux tchi sont les victînmes dé chutte violence. L'av'nîn pathaît troublié en Améthique!
George d'La Forge
Viyiz étout: