Le Ménage ès Feuvres, St Ouën.
Lé 22 d'juîn, 1974.
Moussieu l'Rédacteu,
V'la tchi m'a hardi intérêssi d'liéthe les gâzettes du mais d'mai et d'vaie tch'est tch'i' s'est pâssé dans l'Île - des nouvelles qué j'ai mantchi d'vaie en Améthique viyant tch'i' prend entre quatre et siez s'maines pour les gâzettes hebdomadaithes à faithe lé viage d'ichîn là.
Chein tchi m'gêne lé pus est la mauvaitchi des jannes tchi sont tréjous à endommagi et mème dêtruithe lé bein d'autrui et du publyi. J'liêthais tch'i' y'en a mème tchi sont à dêtruithe les récoltes d'un coupl'ye d'fèrmièrs dans les pâraisses dé l'Êst. Tchi pliaîsi tchi peut y'aver à faithe d'ité saccage? Les cheins tch'en sont coupabl'ye méthitent d'êt' peunnis sévéthement et lus pathents condamnés à payi les frais d'restaurâtion des choses endommagies. V'la tchi les f'thait p't-êt' disciplinner lus mousses et lus apprendre à êt' dé bouanne condite. J'sai bein, sans doute, tch'i' faut qu' la police piêsse l's attraper et qué ch'n'est pon aîsi dé l'faithe. Mais la chose qué j'considéthe d'împortance est qu'la badgette dév'thait êt' faite sèrvi par l's autorités comme peunnition. À m'n idée, ch'est la seule manniéthe dé les d's'encouothagi d'continnuer lus dêtestabl'ye mêché. Ch'est honteux qu' les gens aient à supporter les d'gâts et les saccages dé ches dgaîngues dé malfaiteurs.
Eune chose tchi m'amuse est d'liéthe les pliaintes d'un tas d'gens tch'ont des noms Angliais au sujet d'nouos Êtats. Ch'est drôle comment tch'i' pâlent dé Jèrri comme s'il 'tait lus Jèrri et pays natal. Y'en a mème iun tch'êcrivit un tas d'choses hardi însolantes entouorre les membres d's États dans sa lettre publiyée dans la gâzette du 17 mai. I' nouos dit qu'assis dans la gal'lie publyique dé la Chambre à êcouter les débats, les discours des membres lé fit craithe qué s'n opinnion, dêjà bein faillie, d'la qualité d'lus întelligence, d'vînt acouo pus faillie en l's êcoutant. Qué les Connêtabl'yes mâchent des chucrîns et r'mueuent lus pids quand l'Sénateu Cyril Le Mèrquand mène l'attaque dé l'êtablyissement contre lé progrès, et qu' les Sénateurs sont souvent absents d'lus sièges. Tchil affront! Et san mention du mot êtablyissement m'fait penser à la révolte d'la jannèche Améthitchaine contre l'autorité actuelle dé pathents et d'pays. San r'miède est d'voter pour mett' pus d'candidats du Mouvement Démocratique dé Jèrri dans L's États. V'la tchi veurt dithe tch'i' pense qué ch'n'est qu' dans les membres d'chu mouvement-là qu' nou trouve dé l'întelligence! Ch'est nâvrant pour les Jèrriais d'vaie les pliaintes, jour auprès jour, dé pèrsonnes tch'ont des noms Angliais ou êtranges, et tchi sont v'nus d'meuther ichîn, p't'être dans des louages subventionnés par lé trésor publyi.
Si touos ches gens-là sont si dêtèrminnés qué L's Êtats sont compôsés d'înnouothants et qu' Jèrri est si mal gouvèrné, pourtchi tch'i' continnuent à y d'meuther? Et v'la tchi m'mène au sujet d'l'idée du fanmeux officyi du sŷndicat des travailleurs qué les Jèrriais s'saient mus si Jèrri faisait partie du gouvèrnément du Rouoyaume Uni à la pliaiche d'êt' îndépendant. J'criyais qué j'allions vaie un tas d'lettres pathaître dans la gâzette au sujet. Y'en a ieu deux ou trais, mais pon autant comme j'éthais pensé. Evidemment, l'identité du moussieu tch'avanchit l'idée a fait les gens penser qué s'n opinnion est înfluencée par san mêtchi, et qu' oulle est si riditchule qué v'la tchi n'sèrt dé rein d'y prendre avis. L'êtat des choses en Angliétèrre au jour d'aniet, sujet à la dictatuthe des sŷndicats des travailleurs et la m'niche dé nationalisâtion d'l'îndustrie, n'mé pathaît pon êt' en train dé m'ner l'Rouoyaume dans un miyeu êtat d'prospéthité qué j'n'avons en Jèrri - tchi n'est dêjà pon mal embêté par lé fait qué les sŷndicats Angliais mènent les cheins d'Jèrri par le nez.
J'vai tch'i' n'peuvent pon laissi la Baie d'St. Ouën au natuthé. Dans la gâzette du 23 d'mai la tchestchion d'un aut' empliaichement pour lé jeu d'golfe est r'venue sus l'tapis. Ès Blianches Banques, j'sis bein content d'vaie qué l's autorités ont finnalement creûsé des fosses lé long des routes pour empéchi les motos d'continnuer à envahi et détruithe l'hèrbage et la “flore” des Banques. À ch't heu, n'èrvéla la m'niche d'envahissement d'eune partie des mielles pour lé jeu d'golfe. Ch'n'est pon seulement l'jeu tchi gêne. Ch'est l'fait qué v'la tchi veurt dithe des bâtisses pour lé “club” et l'empiêtement additionnel dé mielle pour stâtionner les motos. Mais i' n'y a pon mouoyen d'faithe l's entrépranneurs laîssi nouot' Baie d'St. Ouën et nouos mielles trantchilles. Si les gens pouvaient lus accouôteunmer à appeler La Grande Route des Mielles par san vraie nom, à la pliaiche de “Five Mile Road”, v'la tchi les f'thait p't-êt' réaliser tch'i' y'a des mielles qué j'voulons prêsèrver comme mielles à la pliaiche d'en faithe d's entréprînses dé conmèrce touristique.
Mais Jèrri n'est pus nouot' Jèrri. J'en sis propriétaithe d'un mio d'mielle mais j'n'en éthai janmais d'bénéfice car il est fait sèrvi par les touristes à londgieu d'jour comme par dé stâtionnement pour lus motos!
George d'La Forge
Viyiz étout: