Le Ménage ès Feuvres,
St. Ouën.
Lé 7 dé juîn, 1969.
Moussieu l'Rédacteu,
Né v'la qu'j'èrquémenche à m'accouôteunmer à d'meuther au Ménage, et dans la trantchilité d'la contrée des Landes compathée au tîntamârre dé l'Améthique. J'mé d'mande tchiquesfais pourtchi qu'les gens tchi n'ont pon ieu l'honneu et la chance d'êt' nés à St. Ouën l'appellent The Wild West, nouot' pâraisse. Quant à mé, j'la trouve bein trantchile et paîsibl'ye! Et j'n'ai pon 'couo trouvé un St. Ouënnais tchi n'est pon ordgilleux d'êt' du tribu des Gris Ventres!
J'm'èrsouveins que quand j'rencontris un Jèrriais à Paspédgia, à La Côte, y'a à bein près vîngt-chînq ans, j'lî d'mandis tch'est tch'était sa pâraisse natale. J'fus né à St. Louothains!, i' m'dît. Et vous?
Eh bein, j'lî dis, j'ai ieu l'honneu d'êt' né à St. Ouën!
Bon, i' m'dît, eune pâraisse vaut l'autre!
Mais nou-fait, j'lî dis, i' faut sept St. Louothachais pour faithe un St. Ouënnais! Ch'tait tout en fanne, sans doute, et i' prînt l'affaithe en bouanne part et j'eûnmes eune fais à baithe pour célébrer nouot' rencontre. Man fréthe Sydney 'tait auve mé, et d'pis ch'là i' n'a janmais oubliyé la valeu d'un St. Ouënnais!
Jé n'mé mêle pon fort dans la politique, et comme j'né d'meuthe pon longtemps en Jèrri châque année jé n'prétends pon saver la solution ès diffitchultés tchi s'présentent comme problèmes dévant les mêssieux d's Êtats, mais lé r'cit d'lus délibéthâtions dans la gâzette m'întérêsse tréjous assez pour lé liéthe dé but à but, et j'salue Moussieu nouot' Député Èrtu Tchéthée pour aver ieu l'couothage d'entréprendre la tâche dé présider l'conmité enchèrgi d'bâti des maîsons. Jé n'voudrais danme pon être dans sa c'mînse pour autcheune chose au monde! Ch'est eune tâche îngrate tch'il a d'vant li, car tchi sèrt lé publyi sèrt un îngrat, et dans chu cas 'chîn, y'a tellement d'pèrsonnes à arrêter pour bâti ou acater, tch'i' s's'en va pon pouver pliaithe à tout l'monde en mème temps. Sans en saver pus long, i' m'sembl'ye qué les vrais Jèrriais tch'ont bésoin d'eune maîson dév'thaient aver l'preunmié r'fus, mais nou dithait à vaie les noms des locataithes des neuves maisons bâties pous L's Êtats tch'i' n'y en avait pon, d'Jèrriais, tch'en avaient bésoin! Enfin, espéthons qué l'Député Tchéthée s'en va, auve l'aigue dé san conmité et l'appias du publyi, trouver la rêponse et mett' l'affaithe en ordre. Sén honnêteté et s'n întégrité dév'thaient y compter pour tchiquechose là-d'dans!
Lé temps s'en va v'nîn qu'à cèrtaines heuthes du jour nou pouôrra marchi en ville quâsi aussi vite comme nou peut y'aller en moto! Et tch'est qu'l'affaithe s'en va dév'nîn quand l'haut d'l'êté s'en va arriver, et qué l'nombre d'visiteurs étha r'doublié? En r'vénant d'la ville l'aut' arlévée, ch'tait eune affaithe dé cachi deux pas et d'arrêter chîn munnutes tout l'long du c'mîn d'la cauchie à Bieaumont! Ch'est êtonnant d'vaie combein tch'i' y'a d'motos dans un p'tit pays comme ch'tî-chîn. J'allis stâtionner l'mein dans l'grand bâtisse dé stationnement dans La Verte Rue en ville à dgiex heuthes et d'mie avant-hièr matîn, et à ma grand' surprînse j'eus à cachi jusqué sus l'haut du traîsième êtage dévant trouver eune pliaiche viède!
Y'a tchiques sémaines, j'vouos pâlais d'la bouanne soupe dé Jèrri, mais i' n'faut pon oubliyer les nouvelles patates, dé Jèrri! Ch'est mangnifique dé pouver r'vénîn en mangi un fricot touos l's ans. Janmais j'n'en ai mangi dans d'aut' pays tch'ont si bouan goût, mais si l'manque dé la main-d'oeuvre continnue, les pouorres fèrmièrs né pouorront pon continnuer à les tchultiver. Ch'est vrai qu'la dêfouithie s'fait à la machinne, mais il en faut, d'la main-d'oeuvre, pour la siéthe et pour êtèrrer et gliainer souotre lyi!
J'connais un fèrmyi tch'a êprouvé à empliyer des jannes hommes v'nus d'Angliétèrre pour aîdgi au clios. Il a l'esprit large assez pour né s'gêner pon d'lus longs j'veux. Tout ch'tch'i' d'mandait 'tait un raîsonabl'ye jour dé travas, sachant qué ch'n'est pon auve lus j'veux tch'i' gliainnent des patates! Mais tchi faillie boutique, qué ches gas-là! I' n'ont pon d'tchoeu, et i' sont si fichus à la fîn du preunmié jour dans les clios qué ch'est rare s'i' r'veinnent lé lendemain!
Ch'est vrai qu'les jannes d'là ch't heu n'aiment pon chein tch'il' appellent du sale travas. Et ch'n'est pon seulement en Jèrri ni en Angliétèrre. Les garagistes en Améthique ont d'la peine à trouver des mécaniciens pour chutte mème raison-là. I' sont forchis d'ouffri d'si hauts gages pour en tenter à travailli dans lus garages qué iun d'ches jours un motoriste n'pouorra pon affaûrder à aver san moto r'graie!
J'viyais dans la gâzette qué cèrtains d'nouos mêssieux dans L's Êtats veulent pâsser eune louai pour sé payi mille louis par an! J'espèthe qué chutte louai-là n'pâs'sa pon, car un tas d'îndividus, tch'aimethaient mus êt' souô-disant législateurs qué travailleurs, pouorraient s'mett' dans la tête d'êt' êlus membres pour gaffer mille louis, assis en confort, à la pliaiche dé forgi ou d'tchèrpenter! Y'a-t-i' acouo assez d'Jèrriais dans L's Êtats pour voter contre?
George d'La Forge
Viyiz étout: