Fort Lauderdale, Florida,
U.S.A.
Lé 9 dé mar, 1974.
Moussieu l'Rédacteu,
Nou pâle d'un prix fo, mais j'veins d'en vaie un exempl'ye: Dans la gâzette du dgix d'janvyi tchi veint d'arriver ichin, j'vai qué l'Moulîn Nicolle a 'té vendu pour trais chent vîngt-chîn mille louis! Sapresti! I' n'y a ni rînme ni raîson là d'dans!
J'y ai 'té bein des fais, au vièr Moulîn Nicolle, quand l'Juge Francis Vibert Le Feuvre en 'tait propriêtaithe, et s'i' pouvait vaie tch'est tch'i' s'pâsse ches jours ché s'sait assez pour lé faithe touanner dans sa tombe, sustout quand i' ouithait l'moulîn appelé "Harvest Barn". Dans chu temps-là il avait bésoin d'èrpathâtion, l'moulîn, mais l'Juge èrmettait tréjous l'affaithe viyant qu'un bouanhomme tch'était à louage dédans pour presque rein n'pouvait pon affaûrder à payi pus pour un louage ailleurs, et i' n'voulait pon l'mettre à la porte.
Comme les cheins tchi l'ont connu l'savent bein, l'Juge Le Feuvre 'tait un homme dé fortes idées. I' n'avait pon d'pâcienche pour les cheins tch'i' n'considéthait pon méthitouaithes, mais il avait quandmême lé tchoeu tendre pour les gens tch'avaient travailli dû toute lus vie et tch'étaient appaûvris dans lus vieilléche - comme en 'tait l'cas d'san louagi au moulîn. J'allais là auve li dans man moto et j'nouos assiévions au bieau solé sus un vièr banc dans l'gardîn à admither l's alentours en général, et les flieurs tchi craîssaient à dgi l'adèrt un mio partout. I' pâlait d'la restaurâtion du moulîn. Il avait idée d'y r'mettre eune reue, et pus faithe un bieau grand gardîn d'flieurs en d'vant auve eune belle fontaine tchi f'thait l'ieau jailli en l'air, et pis lé louer à tchique moussieu à un prix raisonnabl'ye pour tch'i' pûsse affaûrder à garder moulîn et gardîn en parfait êtat.
Nou dit qué l'homme propose mais qu'Dgieu dispose. Tel en fut l'cas. lé louagi du moulîn vêtchut vyi, et l'Juge étout. Dans ses dreines années i' fut prîns sus ses gambes et i' fallait s'fier sus tchitch'uns pour lé porter dans san moto. Jé n'sai pon s'i' vendit l'moulîn d'vant sa mort, car j'fus absent d'l'Île dé 1953 à 1956, l'année d'san décès.
Auprès la mort du Juge j'lé pèrdis d'veue, L'Moulîn Nicolle, et pour tchiques années quand j'ouiyais pâler dé "Harvest Barn" quand j'allais en Jèrri jé n'savais dgèthe tch'i' y'avait tchestchion du vièr Moulîn Nicolle. A ch't heu j'vai par la gâzette tch'i' y'a trais difféthents appartènements d'aubèrges dédans et qu'nou peut y'assiéthe huiptante pèrsonnes à dîner et qu'nou peut faithe chent mille louis par an. J'n'ai autchune idée si ch'la veurt dithe "en gros" ou profit. Faut-i' tch'i' y'aie des forteunes dêpensées à baithe quand nou vait des chiffres dé même, car j'ai tréjous ouï ichîn en améthique qué y'a pus d'profit dans l'conmèrce d'litcheu qué dans l'conmèrce d'restaurant.
J'fus hardi amûsé un jour en pâlant au bouanhomme Clem Rondé, tchi n'est pus. Un charmant vièr Jèrriais, affabl'ye et hospitalyi, l'bouanhomme Clem. Dans ses dreines années i' n'pouvait pon gabather bein liain. J'lî d'mandis: "Viy'ous nouot' vièr anmîn 'Willie' L'Brun souvent?"
"Jé l'vai touos les Dînmanche matîn," i' m'dit. "I' veint mé qu'si dans san moto et j'allons à l'églyise."
"Bon!" j'lî dis. "L'Églyise d'la Ville?"
"Nou-fait," i' m'dit, "ch'est au 'Harvest Barn' qué j'allons!"
Et pis i' s'mînt à rithe!
Un aut' prix fo mentionné dans la gâzette est l'chein d'souoxante mille louis pour La Librairie Française dans La Rue ès Français. J'ai r'gret d'vaie qué l'Sieur Vautchi né s'sa pus là quand j'îthai en Jèrri ch't êté. I' faîsait la beinv'nue à tout l'monde quand nou-s-allait dans la boutique, et nou s'en va l'mantchi.
Ch'est întérêssant d'liéthe l'articl'ye entouorre la célébrâtion d'la prînse dé Mafeking en l'année 1900 duthant la dgèrre des Boèrs quand Madame Cousinard env'yit eune bouqu'tée d'sale ieau par la f'nêtre d'sa chambre sus la tête des gens tch'étaient à chanter "Rule Britannia" dans la rue. J'mé r'souveins tout à fait bein d'la bouonnefemme Cousinard et d'aver ouï pâler du fracas dans La Rue ès Français dans l'temps. Ch'fut un sujet d'convèrsâtion dans la campagne à St. Ouën pour eune volée, car il 'tait dit qué ché n'tait pon d'l'ieau du pits tch'était dans l'boutchet qu'oulle avait viédgi par la f'nêtre! Et comme j'l'ai probabliément mentionné d'vant, les St. Ouënais 'taient hardi întérêssis dans la dgèrre des Boèrs viyant qu'iun d'lus parouaîssiens, Moussieu Adolphus John Bauche Arthur, dé mémouaithe respectée, 'tait iun des soudards dans l'Armée Britannique au Sud d'l'Afrique.
Les louagièrs des maîsons d's Êtats pathaîssent craithe tchi sont à payi des prix fos étout - pour des louages tchi sont actuellement à bouan marchi viyant tch'i' sont subventionnés par les contribuabl'yes dé l'Île. Quandtchi tch'i' s'en vont tchitter à considéther qu'ch'est lus drouait, quand ch'est, en êffet, un don du publyi?
George d'La Forge
Viyiz étout: