Fort Lauderdale,
Florida, USA
Lé 3 d'févri, 1979
Moussieu l'Rédacteu,
Liêsant l'articl'ye entouôrre l'Ecole des Tchennevais dans la gâzette du sept dé dézembre, 1978, mé donne envie dé r'quémenchi à aller à l'êcole. J'ai tréjous admithé les gens tch'ont eune bouanne êducâtion et r'gretté l'fait qué j'n'en ai pon ieu ieune mé-même, n'ayant 'té qu' siex ans à l'êcole dans ma vie.
Quand j'fus né en 1891 jé n'sai pon si l'êcolage 'tait obligatouaithe. J'pense qué ch'tait à bein près dans chu temps-là qué la louai fut pâssée, mais étant bein liain d'Jèrri et d'ma biblyiothèque jé n'peux pon m'en faithe seux pour lé moment. Enfîn, quand j'avais sept ans et qué jé d'meuthais siez Papa L'Feuvre à la forge, i' dît: “Il est temps d'env'yer l'George à l'êcole, et d'pis qu' Miss Mabel Maugi s'en va garder êcole à Greenfield, près d'l'Eglyise dé St. George, né v'là chance dé lî mettre.”
La raîson qué jé n'y'avais pon 'té d'vant, à l'êcole, est qu' la pus près dans chu temps-là 'tait au Haut du Mathais, trop liain pour un p'tit mousse à marchi, sustout comme j'avais l'opprêssion mauvaisement. J'fus asthmatique dès mes p'tits jours jusqu'à l'âge dé quatorze ans, quand v'là tchi dispathut mystéthieusement.
Chose assez drôle, j'n'ai janmais souffert d'asthma d'pis sénon pour eune niet sus l'camp d'batâle à la dgèrre dé 1914-18. J'avais 'té mouoilli, dans l'pité du “secteur” d'Ypres, en Belgique, pour trais mais d'afiles et j'attrapis fraid et j'eus l'opprêssion toute eune niet sans dormi. J'm'accliâssis dans les chîntch'heuthes du matîn et j'tais mantchant pour la parade dé chîntch'heuthes et d'mie pour netti, abréver et souangni les j'vaux (j'tais dans l'artill'lie). J'fus endgeulé à plieine couôtuthe! Y'avait d'la disciplinne par les c'mîns dans chu temps-là, man bouanhomme.
Mais, pour èrvénîn à l'êcolage, comme nou peut s'y'attendre, j'n'apprîns pon fort d'Angliais ni d'mathématiques duthant mes trais ans à l'êcole siez Miss Maugi, mais j'sis r'connaîssant à sa mémouaithe pour m'aver apprîns mén ABC et eune bouanne condite. A dgiex ans j'm'en fus à l'Ecole Wesleyenne où'est qu' la disciplinne, supportée largément et librément par la badgette au maître, Moussieu Harry James Carter, nouos faîsait apprendre comme i' faut. Là, j'apprîns l'Angliais et l'Français. La maitrêsse pour le Français 'tait eune Miss Lé Rossigno (pus tard Mdme. Southern). Les d'mouaîselles Lé Rossigno 'taient fanmeuses comme êcoliéthes et maitrêsses d'êcole.
Après la mort de Papa L'Feuvre en 1903 j'm'en fus d'meuther siez mes Parrain et Marraine à La Mouaie, à St. Brélade. J'tchittis l'êcole dé La Mouaie à l'âge dé treize ans pour m'en aller dans l'office à Moussieu Charles Ouoyamme Binet, Ecrivain, et iun des miyeurs hommes tch'ait marchi la tèrre. Heutheusement, lé manque d'êducâtion n'm'a pon empêchi d'gângni ma vie largément. J'm'èrtithis d'affaithes y'a trente-deux ans ichîn en Améthique à l'âge dé 55 ans. Mais, comme j'vouos l'disais d'vant, j'ai tréjous admithé les cheins tch'ont d'l'êducâtion et des lettres majuscules au but d'lus noms.
Ch'est un mangnifique privilège pour les Jèrriais d'pouver aller à l'êcole au sé, à autchun âge, comme i' nouos l'est explyitchi dans l'articl'ye entouôrre l'Ecole des Tchennevais dans la gâzette, et si jé n'tais pon vyi assez pour aver un pid dans la tombe, j'éthais quâsi envie d'm'en r'aller en Jèrri pour bouan et r'aller à l'êcole. Ch'est bein seux qu' nou-s-a bésoin d'êcolage à tout âge.
Eune chose tch'est d'grand danmage, dgia, est qu' l'êducâtion s'gondaithe en Jèrri est à changi la vielle couôteunme et mode dé vie Jèrriaise. Les jannes gens n'sont pus à apprendre à continnuer la vie d'nouos anchêtres. I' lus trouvent dans d's offices en ville à la pliaiche d'êt' sus les fèrmes ou à apprandre des vocâtions. Comme la vie a changi! A m'n idée, lé changement n'a pon engendré l'bonheu et la jouaie d'vivre. Ch'est pûtôt l'contraithe.
Jé n'sai pon si ch'est la même turlutte dans l's êcoles en Jèrri comme ichîn en Améthique, mais j'ai dêcouvèrt ichîn qu' un tas d'jannes tch'ont des BA au but d'lus noms n'peuvent dgéthe additionner eune colonne dé chiffres. I' sont si accouôteunmés à cartchuler à la machinne tch'il' ont à lus fier d'ssus pour cartchuler autcheune chose. Tout s'fait à la machinne, et ch'est vrai tch'i' faut saver comme tchi les mannier. Est-ch' pus aîsi d'apprendre ch'là qué d'apprendre à cartchuler? Jé n'sai pon. J'n'y connais pon grand' chose, entouôrre ches machinn'nies, et j'pense bein qué j'sis trop vyi pour m'en d'menter à ch't heu. Comme mé l'disait eune bouannefemme l'aut' jeu: “I' veulent faithe tout à la machinne ches jours, mais bailliz-mé la vielle faichon autchun temps!”
George d'La Forge
Viyiz étout: