Fort Lauderdale, Florida,
U.S.A.
Lé 21 dé mar, 1970.
Moussieu l'Rédacteu,
Véthe, et formez vouos bataillons d'résistance contre lé viol des Landes dé L'Éta et d'Gros Nez! L'aut' jour ch'tait pour en faithe un clobe de golfe. Aniet ch'est acouo piéthe : Ch'est pour en faithe eune course pour les motocyclettes et encouothagi les jannes, tchi vont déjà trop vite sus ches machinnes infèrnales-là, à aller acouo pus vite! Et i' font tant d'brit tch'i' n'ont qu'à vouos dêfoncer l's ouothelles! Auve eune vîngtaine ou pus d'ches machinnes-là à êprouver à s'entre-passer en mème temps, pouv'ous vouos înmaginner l'ôrage dé brit qué v'la tchi f'thait pour disteurber l'calme et la trantchilite d'eune belle séthée d'êté? Et lé viage aller r'vénîn dans les p'tites rues! Ché s'sait assez pour faithe sauter les tuiles dé d'ssus l'lief du Ménage ès Feuvres! Et y'a du dangi pour les cacheurs étout : Pouv'ous vouos înmaginner eune machinne prendre sén avo en mauvaise direction viyant qu'san mécanisme dêroute en c'mîn, et sauter par dessus la falaise du Pinnacl'ye?
J'mé d'mande tch'il esprit tch'i' faut aver pour vouler gâter la contrée d'mème et dêtruithe la trantchilité des gens du vaîthinné. Y'a p't êt' quand mème espéthance qué l'dangi ès Landes est passé, car ch'est dans la gâzette du 29 janvyi qu'j'ai veu la nouvelle du projet des courses pour motocyclettes, et y'a dêjà sept s'maines dé passées d'pis ch'la : ch'est en tchi i' faut penser qu'les St. Ouënnais ont combattu l'projet à cor et à crîn et tch'il' ont rêussi à gangni la victouaithe!
J'ai r'gret d'vaie l'décès di Mâjeur F. A. L. de Gruchy. N'èrvélà un aut' mio d'Jèrri dispathu. Un vraie moussieu d'la vielle trempe, lé Mâjeur. J'm'èrsouveins d'li quand j'tais janne et ségrétaithe du Connêtabl'ye Francis Vibert Le Feuvre à St. Pièrre, et qu' san p'pèe, lé Révérend Francis de Gruchy, 'tait l'Recteur dé la pâraisse. Dans chu temps-là, lé Recteu n'était pon trop fanmilyi auve lé Connêtabl'ye L'Feuvre viyant tch'il avait ieu l'toupet d'rempliaichi Moussieu Françouais L'Bro comme Connêtabl'ye. Il 'tait un homme dé doux caractaithe, Moussieu L'Bro, et aimé par touos ses parouaissiens, et l'Connêtabl'ye L'Feuvre, natif dé St. Ouën, 'tait un homme pûtôt sévéthe, et il 'tait considéthé un êtrangi dans la pâraisse. Sachant qué l'Recteur né l'aimait pon fort, i' prannait la précaution d'faithe ses affaithes dé pâraisse auve li par êcrit, et j'allais porter les lettres au probytaithe. J'tais tréjous bein r'chu, et j'vîns à connaître la fanmile de Gruchy gentiment bein. La soeu Amy du Mâjeur, tch'était janne offici et vraie soudard dé carrièthe dans chu temps-là, 'tait eune hardi belle janne fille. Ou mathyit un offici d'l'armée tch'avait nom Hume-Spry et ou mouothit d'eune fièvre typhoide pas longtemps auprès qu'ou fut mathiée. Ch'tait eune trajédie dans la fanmile.
Pus tard, lé Recteur de Gruchy et l'Connêtabl'ye L'Feuvre vîndrent bouans anmîns. Nou v'viyait pon fort du Mâjeur car il 'tait quâsi tréjous à l'êtrangi, l'pus du temps dans l's Îndes. Sans doute, quand jé r'vîns en Jèrri à l'âge dé chînquante-chînq ans j'avions changi en appathence touos les deux, et i' n'mé r'connaîssait pon. Ch'n'est pon pour dithe tch'il 'tait trop ordgilleux - au contraithe, il 'tait affabl'ye quand nou v'nait à l'connaître, et un jour, quand jé l'vis dans l'Vièr Marchi et qué jé l'félicitis pour aver fait un discours dans L's Êtats en faveur dé La Milice Rouoyale et d' l' Empire Britannique, il 'tait prêt à m'donner la leune! Ch'est seux qu' auve lé décès d'sa danme et d'sa fille dans ses vièrs jours, i' s'est trouvé êpithoté.
J'vais qué l's autorités s'en vont hauchi lé louage des maiethons d's Êtats, mais qué ché s'sa seulement les cheins tchi peuvent y'affaûrder tch'éthont à payi la hauche. Tchi drôle dé chose! J'n'ai janmais veu d'ité d'vant ni autchun bord dans l'monde! Tch'est tchi s'en va décider si un locataithe li-mème? Tch'est tchi s'en va empêchi touos les locataithes dé décider tch'i' n'peuvent pon? L's autorités responsabl'yes ont-i' l'drouait ou l'privilège d'exanmînner les rapports dé r'vénu d'îndividus dans l'office dé l'impôt sus l'èrvénu pour un décider?
George d'La Forge
Viyiz étout: