Le Ménage ès Feuvres,
St. Ouën.
Lé 19 d'août, 1978.
Moussieu l'Rédacteu,
En liêsant les gâzettes j'vai tant d'mention d'gens tchi sont “on strike” ou en train d'lus y mett' pour pus d'sou et mains d'heuthes dé travas qué j'ai r'gardé dans l'dictionnaithe Jèrriais-Français pour trouver l'mot Jèrriais pour “strike” - et pis i' m'est v'nu à l'idée tch'i' n'y'en a pon car les vrais Jèrriais d'ma génethâtion n'éthaient janmais pensé d'èrfuser d'travailli pour autcheune raîson. Il' avaient trop d'respé pour ieux-mêmes et trop d'èrconnaîssance pour aver l'opporteunnité d'trouver du travas, et trop d'confianche pour les cheins tchi lus en donnaient, pour sé mett' “on strike” pour un pet d'travèrs. Né v'la l'vrais caractéthe Jèrriais du temps pâssé quand l'monde avaient bein p'tit d'sou mais tch'i' savaient tch'i' fallait quand-même mett' deux sou d'côté pour en cas d'maladie et pour les vièrs jours. Ch'est en tchi i' n'avaient pon înventé un mot pour “strike” dans l'sens d'tchitter d'travailli, ou comme i' disent à ches drein, “industrial action”, probabliément viyant tch'i' c'menchent à aver honte dé dithe “strike”.
Lé dictionnaithe Français “Petit Larousse” nouos donne lé mot “grève” pour “ceux qui se coalisent pour faire cesser le travail”, mais nouot' mot grève en Jèrriais veurt dithe aut' chose, ch'est en tchi j'sis à adopter l'mot Français dépis qu' nou l'fait sèrvi en Français. Et en r'gardant les gâzettes nou-s-est frappés par lé nombre d'gens tchi sont en grève ou tchi veulent s'y mettre.
Eune chose tchi m'fait pester est d'liéthe, dans les mêmes gâzettes, qué le “Trades Union Congress” en Angliétèrre a l'idée dé d'mander au Parlément Angliais d'faithe les gouvèrnéments d's Iles dé La Manche et l'Ile dé Man pâsser des louais pour protégi l'ouvriyi. Tch'il affront! Comme si l'ouvriyi dans nouos îles était pèrsétchuté! Ch'est pûtôt l'publyi, tch'est pèrsétchuté par les grévistes, et tch'a bésoin d'êt' protégi!
Et même les “civil servants” s'craient oblyigis dé voter pour vaie s'i' dév'thaient accepter eune affaithe dé 11.7 pour chent d'haûchissement d'salaithes, ouaithe tch'il en r'chûdrent neuf pour chent d'haûchissement l'année pâssée. Ch'est quâsi încriyabl'ye! I' pathaîssent oublier tch'il' ont eune seûtheté d'empliai pour la vie, des vacanches payies et eune bouanne pension pour lus vièrs jours. Si les fèrmièrs, tchi n'ont autcheune garantie d'eune bouanne saîson et tchi sont sujets à l'înjuthe du temps, sé m'ttaient en grève tch'est que l'monde f'thait pour mangi?
Et ch'n'est pon seulement en Jèrri qué la maladie d'grévistes d'veint eune êpidémie. Acouo dans les mêmes gâzettes nou vait qu' les empliyés m'nichent dé s'mett' en grève dans l'train souôtèrrain d'Londres, et qu' les êtchipes des “car ferries” du Danemark y sont dêjà!
En Améthique, les grèves ont 'té responsabl'yes pour lé haûchissement des gages des travailleurs dans les fabriques dé motos au point qu' les fabriques êtrangiéthes peuvent vendre lus motos, délivrés en Améthique, à miyeu marchi qu' les leurs. Et les politiciens ont peux d'admettre qué les grèves en sont responsabl'yes viyant tch'il' ont peux d'pèrdre les vouaix des unions grévistes à la préchaine êlection!
Et les grévistes chouaîssissent trejous eune êpoque împortante pour lé publyi, affaithe dé fête ou viage ou d'export dé récoltes, pour sé mett' en grève et înc'moder tout l'monde et causer des pèrtes êffriabl'yes. I' n'ont autcheune considéthâtion pour lé publyi. Ni même pour la seûtheté du rouoyaume. La preuve en est tch'i' r'fusîdrent dé prépather et ravitailli les souos-mathîns si nécessaithes pour la d'fense du pays.
George d'La Forge
Viyiz étout: