Quand j'ouï la nouvelle, l'aut'e jour, que les hommes du gaz v'naient de lus mettre en grève, je dis à mé-même, "Ah! j'allons aver du fun chute feis! Nos garçons dans l'imprimethie s'en vont être bain contents. Pas moyen d'y vaie à faithe lus travas! Pas moyen d'faithe l'engin marchi! Les machines s'en vont être toutes arrêtées! Pas d'Chroniques pour nos clients ni pas d'autre travail'lie overtimepour avanchi chu maudit Almonas, qui pathaîtra acheteu en temps pour Pâques ou à la St. Jean.
Je m'en r'vins bain vite à l'imprimethie pour apprendre la bouanne nouvelle à nos garçons et lus annoncer que je nos n'allions aver un long holiday jusqu'à qu'la strike es'sait finie.
Ils en dansaient d'jouaie.
Iun d'ieux dêcliathi qu'i' s'en allait passer tchinze jours en Dgernési, un autre dit qu'i' s'en allait pêtchi du chervin pour aller vaûler du muler, un traisième s'attendait fête en allant à la campagne aidgi à san biaufrèthe à faithe san cidre, enfin, i' n'y en avait pas iun qui n'avait pas san p'tit programme.
Mais touos ches biaux rêves-là furent de bain courte duthée.
Le sien qu'était le pus près d'la f'nêtre adonni à r'garder d'hors pour vaie tchi temps qu'i' faisait, quand i's'êcriyi tout d'un coup "Ah dame! i'n'fallait qu'ch'la!"
"Tch'est qu'i'y a don?" se firent les autres.
"I'y a que j'sommes tchuits! Ergardez chennechin!"
Là-dessus, j'êpyîmes tous par la f'nêtre et je vîmes un spectaclye qui nos rabbatti bain vite les esprits.
Le Chef s'en v'nait avau l'Vier Marchi avec deux gros patchets d'chandelles souos san bras!
I'n'tait pus besoin d'nos explitchi de tch'est qu'i's'agissait.
Djaix minutes opprès le foreman me dit, "Caouain, va don à bas vaie tch'est qu'i'y a en allant."
Je d'valli tout d'suite, et tch'est qu'ou criyiz que j'vi?
Une douzaine de boutelles étaient rangies sus l'conteux et Frainque Amin et l'Chef étaient à fitter une chandelle dans l'goulet d'châtchune.
Je r'vithi d'bord mé, pour ramonter les d'grets pour le dithe à nos garçons, mais l'Chef m'avisi et i' m'dit "Caouain, porte ches lampes ichin dans l'imprimethie et donnes-en iune à châtchun d's hommes. Le gaz s'en va être dêtouâné dans un quart d'heuthe."
Eh bain, les chandelles firent assez bain souos les circonstances, mais nou se d'mandait coumment que l'Chef s'en allait s'prendre pour faithe fonctionner les machines à imprimer. Che n'tait bain seux pas avec ses chandelles qui' pouvait cachi l'engin.
Mais l'Chef n'est pas l'homme pour se laissi vaincre par une bagatelle.
Dans bain p'tit t'emps je ouïmes une capuchechie abominablye sus du méta et j'pensions qu'i' s'était emporté tout-à-fait et qu'il 'tait à mettre les machines en minchons.
Je r'dévalli bain douchement pour dêcouvri t'chest qu'tout chu tintamarre-là voulait dithe et j'les trouvi, li et Fraînque, avec lus casaques hortes et lus manches de c'minse ertroussées a dêmonter les "pulley-wheels" et à fixer des chanoles qu'ils avaient dênichi de je n'sais iou.
"Ah! j'pensi, v'là du travas pour nos hommes à saissé opprès lus jour. Ch'est comme siez Maît'e Cliément d'Caen opprès souper. I' faut s'mettre à chaffer!"
Et je n'me trompi pas.
Le Chef aithait voulu que je me s'sais mins à touâner la chanole ettou mé, mais je r'fusi net! "Chenna n'est pas dans man contrat," j'li dis, "je sis un skilled workman mé, et je n'prétend pas opprès un fort jour de travas, que nou m'mette sus un treadmille! I' y a des pats sus l'Weighbride, allez rammasser!
Viyiz étout: