Lé 28 dé mai, 1983.
Moussieu l'Rédacteu,
Les Jèrriais du temps pâssé 'taient hospitalièrs. Ch'n'est pon pour dithe tch'i' n'y sont pon acouo au jour d'aniet, mais les temps ont changi. Dans man janne temps châque fanmil'ye connaissait ses vaîsîns. Nou peut même dithe que touos l's habitants d'eune pâraisse s'entréconnaîssaient. À ch't heu, un tas des vaisins sont d's êtrangièrs et nou n'a pon autcheun rapport auve ieux. Et quand nou va en Ville ch'n'est pon souvent qué nou vait eune fache tch'est fanmilliéthe, ouaithe qué les trottouaithes sont si encombrés d'piêtons qu' nou-s-a d'la peine à marchi d'eune rue à l'autre.
Les visiteurs tchi sont à lus lôvier en Ville à la pliaiche d'êt' dans la campangne ou sus les grèves sont à êpier dans les f'nêtres des boutiques comme s'ils y viyaient tchiquechose tch'i' n'ont pon dans les boutiques siez ieux. J'mé d'mande souvent pourtchi tch'i' veulent boutitchi en Jèrri. Cèrtaines articl'yes sont probabliément miyeu marchi, mais i' m'sembl'ye aver ouï qué y'a des marchandises tchi sont pus chiéthes dans l'Île qu' ailleurs. I' pathaît qu'cèrtains boutitchièrs ont fait forteune en vendant un tas d'la même nivell'lie qu' nou vait dans les boutiques et qu' nou n'pens'sait janmais d'acater sé-même. Ch'est bein r'connu qu' la litcheu et les cigarettes sont miyeu marchi qu' ailleurs, et ch'est p't-êt' à cause dé ch'la tch'i' y'a tant d'causes dévant la P'tite Cour pour aver cachi un moto en étant souos l'înfluence dé la bouaisson.
Tchi difféthence lé temps pâssé! Quand j'tais mousse i' n'y'avait pon d'motos ni d'avions. Ch'tait touos des Jèrriais tchi d'meuthaient l'tou d'sé. Les fèrmièrs avaient des j'vaux et i' s'entre'aîdgaient à brîsi et touanner la tèrre dans lus clios. La grand' tchéthue 'tait toute eune affaithe et nou-s-en faîsait quâsi eune fête.
Les fèrmiêrs allaient au vrai ieux-mêmes. Cèrtains tchi n'avaient pon d'fèrme ni d'tèrre et tch'allaient à lus jour acataient un j'va et un hèrnais et allaient au vrai niet et jour. Il' êtendaient l'vrai pour lé stchi, et pis il' en faisaient des tas, ronds et bein tâssés, six ou sept pids d'haut. En saison, les tas 'taient vendus à l'encan. Y'avait tréjous tout pliein d'acateurs ès vendues.
I' m'sembl'ye aver liu dans tchique livre au sujet d'l'histouaithe dé Jèrri qu'à un moment donné dans les vièrs temps les Français voulaient envahi Jèrri. Eune fliotte dé lus navithes dé dgèrre arrivaient dans La Baie d'St. Ouën, et les Français vîdrent plusieurs rangies d'ches tas d'vrai, pliaichis iun à côté d'l'autre et bein en lingne dans Les Blianches Banques. Pensant qué ch'tait des soudards tch'étaient là à l's attendre i' changîdrent d'idée et lus en r'allidrent en France!
Siez nous, à La Forge, j'connaîssions touos les j'vaux du vaîsînné car lus maîtres l's am'naient à la forge pour êt' féthés. Y'en avait tch'étaient catouoilleux à féther, et d'autres tch'étaient trantchil'ye comme un angné. Man p'pèe avait la réputâtion d'pouver féther autchun j'va dêliêment et sans embarrâs, tch'i' fûsse mauvais ou trantchil'ye. La grand' partie des fèrmièrs 'taient bouans à lus j'vaux, mais y'en avait iun dans l'vaîsînné tch'était rude auve lé sien et faîsait sèrvi hardi d'fouët. Pus tard dans la vie quand j'tions vièrs touos les trais, man fréthe Fraînque y'en pâlit et i' li dit: "J'ai travailli dû mé-même et man j'va avait à faithe sa châre. J'lé faisais obéyi et travailli dû comme mé, et j'lé souangnais bein comme rêcompense."
Ouaithe qué l'téléphone 'tait bein êtablyi dans l'Île quand j'tais mousse (j'fus né en 1891), i' n'y'en avait pon ès Landes à ma connaîssance. J'en fis connaîssance en 1903 quand Papa mouothit et qué j'm'en fus d'meuther siez mes parrain et marraine d'Aubert à La Mouaie à St Brélade. Ma marraine 'tait en chèrge au dépôt des téléphones à La Mouaie, et j'apprîns à l'mannipuler. V'là tchi prouve qu' autcheune chose qué nou-s-apprend veint c'mode dans tchique temps, car j'profitis d'chutte expéthience eune fais au c'menchement d'ma carriéthe en Améthique par aver eune miyeu tâche viyant qué j'savais mannipuler un dépôt des téléphones.
Dans ches temps-là, l' "exchange" à La Mouaie avait dgiex êcouteurs. Ma marraine 'tait payie au taux d'un louis par êcouteux par an, et dgiex louis valait la peine dans chu temps-la!
Viyiz étout: