|
Èrvéchîn des batchieaux du côté dé Seymour, patheils à des ouathous sé litchant les babinnes. Le sang va-t-i' couler dès l'assine du jour et rouogi jusqu'au sé les sîllons des varinnes? Nou dithait qué ches loups galopant vièrs la ville comme un russé sauvage au dêbord dé san cours, sont pus dé mille et chent, sont pus dé chent vîngt mille. lé chein tchi les gouvèrne a pouor nom Rullecourt. Par Saint Saûveux, Saint Jean, La Trinneté, Saint Ou né laissons pon les loups entrer dans Saint Hélyi! Par Saint Cliément, Mathie, Martîn, Saint Pièrre étout, les Français n'éthont pon les cliés du Paradis! Mais malgré Saint Brélade et Grouville et Louothains, Corbet a sîngné la dêconfituthe înfâme. Tchi pouôrrait, en Jèrri, espéther en démain si nos Saints les pus saints ont dêlaissi nouos âmes? Nânnîn, par Saint Clièment, La Trinneté, Saint Jean, qué j'embraîche à pînchettes la faucheuse en pèrsonne putôt qué d'èrdonner mèn honneu à un tchian! rêponnit un Mâjeur tchi s'appelait Peirson. I' 'tait tellement charmant qué la mort l'embraîchit et lé posit tout caud dans les mains de l'Histouaithe. Chu moment dé trînmeu fut ainsi tchi forgit les ais dé nouos fouoyièrs, les feux dé nouos mémouaithes. Sén âme en volvotant ralleunma les couothages: Nou vit Jèrri s'léver, patheil au vent d'hivé, et sa louême êtcheunmeuse èrgrossi souos l'ôrage; par dévièrs les Français les vièrs fusis tither. Telle fut en un jour dé Jèrri la Bataille, La foule était bav'rêsse et restait assembliée, les raconteux vantant la batt'tie d'la peûtraille. nou pouvait ouï, sustout, lé mênommé Vauthier: "Oui, ch'est mé tchi baillis la cliamuse à sa goule, la pataöuarre étout, du but d'man grand fusi. V'la quément qu'chu Baron pâssit l'pas et la foule des Français, dêdgueulant sauv'qui peut, sé rendit." 'Y'a du cidre tchoeuthu du côté d'la Folie. Nou vétha les dolents, les vaillants léver l'coute et chanter, d'un seul tchoeu, jusqu'au but d'la baithie: J'avons mîns les Français, n'y a pon d'doute, en dêroute! Nou vétha Saint Saûveux, La Trinneté, Saint Ou et Brélade et Grouville et Louothains et Saint Jean, St. Cliément, Saint Martîn, lé grand St. Pierre, étout et chu bouon St. Hélyi tchi bétha tant et tant. Mais, dis mé, d'en par où qu'est pâsseé la douzième ? - ou s'est mînse à la rade et prie pour les bliessés. La Bataille et ses jouaies sont dêjà des emblièmes mais Mathie sait la mort et né peut qu'la plieuther. Mariane de Bondy Octobre 2003. |
Viyiz étout: