Les Pages Jèrriaises

En Ville

Trenton, Michigan,
U.S.A.
Le 30 d'octobre, 1971

Moussieu l'Rédacteu,

Ch'tait eune aventuthe bein pliaîsante d'aller en ville à St. Hélyi quand j'avais acouo les talons jaûnes. Quand Manman annonçait dans la s'maine que ''J'îthons p't êt' en ville sanm'di!'', les jours pathaîssaient comme des mais en attendant. À c'menchi, y'avait l'pliaîsi d'pouver mett' ses habits du Dînmanche lé sanm'di, et aller et r'vénîn tout l'long du c'mîn en ville dans la beusse à Mess Lé Boutilyi, Harry.

Arrivés en ville, ch'tait mangnifique dé pouver r'garder dans les f'nêtres des boutiques et d'vaie les jouëts et un tas d'choses qué nou n'viyait pon dans la campangne. Les trottouaithes n'étaient pon encombrés par des mille touristes comme dé nouos jours.

Nou-s-allait acater du s'no à la boutique dé Mess Simonet, et d'la méd'cinne pour la toux à eune apotiqu'thie tchi s'appelait ''La Croix d'Génève''. Y'avait des grand' boutelles arrondies comme des topies, plieinnes dg'ieau couleuthée en rouoge et bliu dans la f'nêtre.

Siez Albert Hunt dans La Banque (''Conway Street'' à ch't heu) nou pouvait acater eune boutelle de méd'cinne pour èrdgéthi l'mal ès dents pour douze sou. Oulle 'tait garantie d'faithe la douleur dispathaître aussi vite qu'oulle 'tait arrôsée sus la dent tchi faîsait ma! Y'avait tant d'monde qu'en acataient qué quand nou d'mandait au Sieur Hunt si ch'tait vrai, i' vouos rêponnait; ''S'ou n'avez pon ouï pâler du soulagement sus l'coup quand nou-s-en met sus la dent, ou n'avez qu'à d'mander ès chentaines dé pèrsonnes tch'en font sèrvi!'' Quand nou-s-allait en acater, nou pouvait entrer dans l'appentis siez Hunt et vaie tout la vieillâqu'thie tch'il avait à vendre. Y'avait des chiffons, d's os, du vièr fé, des cordes et du canevas et des boutelles dé toutes les sortes, des baleines dé cor pour les femmes, d's ôtis dé s'gonde main, et Bouan Dgieu sait tchi.

J'faîsais tréjous Manman aller par la Rue Halkett pour vaie la statue d'l'Êcossais à l'entrée d'la boutique à p'tun au Sieur Belford, et par La Faithe pour vaie l'bieau grand j'va en bouais dans la f'nêtre à Mess Podger. Et y'avait la boutique à Mess Mêsservy, dans la Rue Halkett étout, l'tchincailli tchi vendait des grélots pour mett' sus les collièrs des cats et tchians, et des lapins apprivouaîsis.

Ch'tait à eune boutique appelée ''La Belle Jardinière'', nunmétho 19 dans La Rue d'Driéthe (''King Street'' à ch't heu) dans chu temps-là, et nunmétho 59 dans La Grand' Rue (''Broad Street''), qu'un tas d'campangnards allaient acater d's habits touos faits pour les mousses. Manman n'pouvait pon m'acater un neu fa bein souvent, mais j'aimais bein aller vaie les fas dans la f'nêtre. Mais y'avait tant d'choses à vaie dans la ville qué jé n'peux pon les mentionner toutes. Enfîn, j'finissions tréjous par aller baithe du thée siez m'n oncl'ye Ph'lippe et ma tante Mélie L'Feuvre, dans ''Great Union Road''. M'n oncl'ye Ph'lippe 'tait l'fréthe à Manman L'Feuvre.

Dans chu temps-là la population d'la ville 'tait 27,975. Septante ans se sont êcoulées, et nous n'créthait pon qu'ch'est la même ville au jour d'aniet. Un tas d'bâtisses et d'boutiques ont dispathu. Dans La Rue d'Driéthe y'avait la couôtuth'thie à Mess Bisson, un couôtuthyi pour des habits d'hommes. Ma couôthinne Hilda L'Feuvre, fille dé m'n oncl'ye Ph'lippe et pus tard femme dé Walter L'Gros, qué j'allais tchiquesfais vaie à Calgary, Alberta, au Cannada (ou mouothit à Ottawa en 1967 à l'âge dé 85), c'menchit sa vocâtion comme couôtuthiéthe d'habits pour hommes là. Pus tard ou fut seurvilyante (''forewoman'' en Angliais) dans la couôtuth'thie dé R. B. Colley et Fils, eune aut' couôtuth'thie dans la même rue, tch'a dispathu étout. La cheinne à Mess Bisson a 'té abattue et rempliaichie par la grand' boutique dé la compangnie Woolworth. À côté, ch'tait les boutiques, côte-à-côte à Mêssieux Noël et Porter. Il' ont 'té abattues étout et rempliaichies par eune seule grand' boutique appelée British Home Stores. Chette-là et la cheinne dé Woolworth ont des côtchiéthes dé d'vant absolûment modèrnes.

Enfîn, nou peut dithe qué toutes les côtchiéthes dé d'vant lé long d'toute La Rue d'Driéthe et d'La Rue d'Haut (''Queen Street'') ont 'té modèrnisées et qu'un r'vénant dé y'a septante ans n'les r'connaîtrait pon.

Un tas d'maîsons ont 'té bâties tout à l'entou d'la Ville et des nouvelles rues ont 'té crêées où'est qu'les vielles né pouvaient pon êt' allouangnies, et la supèrficie d'la ville a grandi divèrsément.

Dans l'êté i' n'y a presqué pon mouoyen d'marchi dans les rues, car motos et touristes en ont prîns possession. I' faut bâti en faichon ''gratte-ciel'' à ch't heu pour fourni des louogements ès habitants et des garages pour les motos. La belle pétite ville dé ma jannèche n'est pus!

George d'La Forge

 

Viyiz étout:

 

Les Pages Jèrriaises