Fort Lauderdale, Florida,
U.S.A.
Lé 5 d'avri, 1969.
Moussieu l'Rédacteu,
J'sommes en deu dé d'pis eune semaine - en deu pour un moussieu tch'était aimé et respecté par touos ses concitouoyens - lé Général d'Armée et ex-Président d's Êtats-Unis d'Améthique Dwight David Eisenhower. Comme soudard, ouaithe tch'il 'tait Général il 'tait aimé par lé simpl'ye soudard, et en politique il 'tait respecté - et généralement aimé étout - par les Démocrates ouaithe tch'il 'tait Républitchain. San souôri et san charme faîsaient pliaîsi a tout l'monde.
Y'en a tchi dîsent tch'i' y'avait des Généraux dans l's armées alliées duthant la deuxième grand' dgèrre tch'étaient bein pus aufaits qu'li et tch'éthaient deu aver sa pliaiche comme Commandant-en-Chef, mais admettant qu'ch'est p't êt' bein vrai tch'i' y'en avait tch'étaient pus expèrts et rûsés qu'li en stratégie militaithe et dans l'mêtchi d'dgèrre, il est acouo pus probabliément vrai qu'autchun aut' Général n'éthait pon fait mus qu'li en faisant preuve d'aver un esprit large assez pour faithe touos l's aut' - dé difféthentes nations - lus soumettre à un seul c'mandement et gangni la victouaithe!
Comme Président d's Êtats-Unis, nou n'peut pon s'attendre tch'i' pliaîsait à tout l'monde, sustout comme i' m'ttait tréjous l'întéthét d'san pays d'vant l'întéthét d'san parti politique. Et pis, viyant qué l'Président et l'Vice-Président sont êlus directement par l's êlecteurs, à la pliaiche d'êt' chouaisis par lé parti gangnant comme est l'Preunmié Minnistre en Angliétèrre, i' s'adonne tchiquesfais qué l'Président n'est pon du mème parti comme les deux Chambres du Congrès - la Chambre des R'présentants (ou Députés) et l'Sénat et quand ch'la s'arrive, lé Président a souvent d'la peine à s'accorder auve san gouvèrnément. Duthant les huit ans d'sa gestion, l'Président Eisenhower, Républitchain et consèrvateur li-mème, jouit d'un Congrès d'san mème parti pour deux ans seulement. Duthant l's aut' siex ans, l'Congrès 'tait, en majorité, du parti Démocrate - tch'est à bein près la mème chose comme les partis travaillistes et libéthaux d'Angliétèrre. I' fut quand-mème ré-êlu par lé peupl'ye pour sa deuxième gestion auve eune supèrbe majorité d'vouaix.
Si l'passage du temps n'lé met pon dans l'rang des pus fanmeux Présidents, ch'est bein seux tch'i' n'y en a pon un autre, à mains qu'ché s'sait Washington ou Lincoln, tch'a jouit pus qu'il d'la confianche et du respé d'la majorité d'ses concitouoyens, tch'i' fûssent Républitchains ou Démocrates en politique, et ch'est viyant tch'i' savaient en ieux-mèmes tch'il 'tait un homme sobre, près d'la natuthe, intégre et honnête et d'eune sîmplyicité et manque d'ordgi èrmèrquabl'ye.
Sén histouaithe mé fait penser qu'j'ai p't êt' ieu raison d'craithe, avau l's années, qu'ch'est eune bénédiction d'êt' nés pauvres et d'aver à apprendre à travailli pour gangni san pain et s'faithe êdutchi. Dé mème, eune pèrsonne apprend à couoyer et à apprécier la valeu d'un sou! L'Général Eisenhower fut né l'quatorze d'Octobre, 1890, à Dennison, Texas. Il 'tait iun d'eune fanmile dé sept garçons, et ses pathents n'taient pon riches. San p'pèe n'rêussit pon en commérce et i' s'en fut d'meuther à Abilene, dans l'Êtat d'Kansas, où'est tch'i' travaillit pour la compangnie du “train”, et les garçons avaient à travailli au matîn et au sé auprès l'êcole pour aîdgi à péthe et méthe. Lé janne Dwight mênagit à passer l's examens pour sén entrée à West Point - lé Sandhurst d'Améthique - et d'vînt offici dans l'înfanterie. Pus tard dans la vie i' dîsait qué l's êpreuves dé sa jannèche, et la disciplinne apprînse dans sés p'tits jours siez ses pathents avaient aîdgi à l'prépather pour les responsabilités tch'il avait accepté comme étant san d'vé à san pays.
Quand j'vai l's êmeutes tchi s'passent dans les collèges ches jours, j'pense souvent à ma conviction qu'ch'est eune bouanne chose d'êt' pauvre dans ses p'tits jours. À la pliaiche d'êt' êrconnaissant d'aver ieu des pathents à les maint'nîn et l's env'yer à l'êcole jusqu'à l'âge dé pus d'vîngt ans, ches êtudiants-là craient qu'lus pathents lus niaisent et tch'i' sont si arriéthés tch'i' n'ont mème pon l'avis d'saver qu'ch'est lus d'vé d'les garder à l'êcole dé mème!
Lé gaspillage dé sou par les jannes ichîn en Améthique est formidabl'ye. I' y'a dgiex-huit mille filles et garçons êtravelés sus la grève dé Fort Lauderdale à londgieu d'jour à lus fricachi au solé et lus r'fraidgi dans la mé! I' sont quâsi tous d's êtudiants dans l's univèrsités d's Êtats du Nord, et il en veint d'mème touos l's ans pour les vacanches dé Pâques. La grand' partie sont v'nus atout lus motos. Faut-i' qu'les pathents aient des sou! Mais ches jannes-là n'apprécient pon l'fait tch'i' n'peuvent pon y v'nîn ieux-mèmes, les pathents, s'ensoliyi sus la grève - car le p'pèe travaille pour gangni lus pain!
J'ai tchiquesfais ouï qu'la prospéthité d'un pays peut dév'nîn telle qué san peupl'ye, amollié dans l'confort, pèrd lé d'si d'combattre contre l's êpreuves dé la vie, et qu'ch'est d'mème qué l'pays fait faillite et d'vale au bas d'l'êtchelle. Espéthons qu'eune telle avârie n'nouos attend pon en Améthique!
George d'La Forge
Viyiz étout: