Angoulême,
Lé 25 d'août, 1965.
Moussieu l'Rédacteu,
La s'maine passée, j'vouos dîsais qu'les dgèrres dé religion (1562-1598) avaient troublé L'Angoumois, mais en 1534, dgiex-huit ans d'vant ch't êpoque-là, lé fanmeux Jean Calvin, né à Noyon en 1509, allit s'èrnarder à Angoulême. Appathemment il avait bésouain dé s'muchi d'tchiquebord pour eune volée, car i' s'fit à connaître ès gens du pays souos l'nom dé Déparcieux. Il avait un anmîn à Angoulême dans l'églyise Catholique Romaine, lé Chanoine de Tillet, et ch'tait siez li, au nunmétho 24 rue de Génève, tch'il allit d'meuther.
I' faut penser qué l'Chanoine s'associait ès idées réformatistes dé Calvin, car il' 'taient bouans anmîns et dans ches temps-là y'avait tréjous un certain dangi pour un orthodoxe catholique à attriotchi un homme tchi voulait boulevèrser les cérémonies, la tradition et la crianche dé pré-destination d'l'église. I' d'meuthit trais ans à Angoulême, et ch'tait là tch'il êcrivit L'Institution Chrétienne tch'est r'connue comme eune oeuvre èrmêrquabl'ye d'l'ancienne littéthatuthe Française. J'mé d'mande où-est tch'il allit l'amâsser l'mênom dé Déparcieux. Y'a ieu un fanmeux mathématicien Français d'chu nom-là, mais i' fut né près d'Uzès dans l'départément du Gard en 1703, quâsi deux chents ans pus tard!
Quandis tch'i' d'meuthait à Angoulême, Calvin fut visité par François Rabelais, un aut' fanmeux Français et auteur tch'avait d's idées tchi n'taient pon orthodoxes à s'n êpoque. I' faut penser qué l'identité d'Calvin fut en fîn d'compte dêcouvèrte, car il eut à s'muchi dans des caves là l'tou, et ch'tait là qu'eune grand' partie d'ses êcrituthes fûdrent faites. L's églyises d'Angoulême, et sustout la cathédrale, souffrîdrent hardi des d'gats des dgèrres dé réligion pus tard, mais Calvin n'tait pus là. I' s'en' 'tait allé à Génève, où-est tch'i' mouothit en 1564.
L'Hôtel de Ville d'Angoulême, style Renaissance, fut bâtie sus l'empliaichement du vièr châté dé Hugues Le Brun de Lusignan (un moussieu qu'j'ai dêjà mentionné) dé 1282 à 1303, et dé la ronde tour dé Marguerite d'Angoulême, bâtie dans l'temps d'Jean le Bon et d'Marguerite de Savoie entre 1445 et 1467. Ch'tait dans chutte tour-là qué Marguerite d'Angoulême (tchiquefais appelée Marguerite de Valois ou d'Artois), soeu d'Françouais l'preunmyi (rouai d'La France dé 1515 à 1547), fut née lé 11 d'avri, 1492. Eune femme dé grand' capacité, Marguerite mathyit l'Duc d'Alençon en preunmié neuches, mais oulle 'tait dêjà veuve en 1527. Ch't année-là, ou' mathyit Henri d'Albret, rouai d'Navarre. Oulle avait un goût r'mèrquabl'ye pour les belles lettres et la poësie, et oulle 'tait grande admithatrice de Dante et d'Virgile et êcrivit Les Marguerites de la Marguerite des Princesses. En prose, oulle 'tait l'auteur de l'Heptaméron. Sa statue est dans l'bieau gardîn d'l'Hôtel de Villa.
La Cathédrale dé St. Pierre est d'architectuthe Romano-Byzantîn et ieune des pus belles églyises de France dé chu style-là. Oulle est la quatrième des églyises bâties sus s'n empliaichement. La preunmièthe fut c'menchie en l'année 350. Dêdiée à St. Saturnin, ou' fut endommagie et profanée par les Ariens Wisigoths tchi ravagîdrent La Gaule en 412. La deuxième fut c'menchie en 508 dans l'temps du rouai Clovis lé preunmyi, auprès la dêfaite des Wisigoths, et finnie dé vièrs 560 dans l'temps d'Caribert, rouai d'Paris 561 à 567. Chette-là fut dêdiée à St. Pierre lé 19 d'août, 570, mais ou' fut brulée et dêtruite par les Nouormands lé 18 févri, 981. La traîsième fut bâtie par l'êvêque Grimoard de Mussidan dans l'temps dé Dguillaume deux Taillefers dé 991 à 1015, et dêdiée en 1017. Il en reste les deux-tchièrs de la façade de chette-là, et la preunmié coupole. La quatrième fut c'menchie en 1110 et finnie en 1128 par l'êvêque Girard deux. Souos l'nouvieau plian, eune coupole, un mangnifique transept et deux tours fûdrent ajouotés à la cathédrale.
Dans l'quatorzième siècl'ye des chapelles fûdrent ajouotées, et la façade fut amendée, mais en 1568 les Protestants la saccagîdrent et abattîdrent la grand' tour tch'êcrâsit l'églyise dé St. Jean et la chapelle de St. Gelais à côté, mais la façade né fut pon endommagie. La cathédrale, tch'est en forme d'crouaix latine, fut restaurée dé 1628 à 1634. Dans l'temps d'la révolution Française, l's agents d'Napoléon en fîdrent iun d'lus Temple de la Raison, et chu nom-là fut gravé sus l'porta. Heutheusement, v'la tchi n'duthit pon longtemps, et ch'est un privilège dé pouver entrer d'dans et admither la bieauté dé chutte belle et vénéthabl'ye Maîson du Bouan Dgieu, dêdiée, aujourd'aniet comme d'ancienneté à Saint Pierre, lé Prînce des Apôtres dé Notre Seigneur.
George d'La Forge
Viyiz étout: