Angoulême.
Lé 18 d'août, 1965.
Moussieu l'Rédacteu,
M'érvéla dans chutte belle vielle ville, capitale dé La Charente, aut'fais capitale dé l'Angoumois, ancient pays d'La France rêuni à la couronne souos Charles V tchi l'avait prîns d's Angliais dans 1373, et annexé absolûment souos Charles l'preunmyi en 1515. L'Angoumois 'tait formé en partie par lé département dé Charente et La Dordogne.
Angoulême est eune ville plienne d'histouaithe, bâtie sus l'haut d'eune pétite montagne dé granit. Auve ses ramparts oulle 'tait eune vraie fortérêsse dans san temps, et ou' dominnaît l'terrain tout à l'entou. V'la tch'en faîsait eune ville dé grande împortance dans l'temps des dgèrres. Pas bein liain d'là y'a les ruinnes d'un mangnifique théâtre Romain, et i' pathaît qu'y a des ruinnes dé travaux des Romains un mio souos tèrre dans cèrtains clios tchi n'ont janmais 'té mînses à veue.
Au c'menchement du huitième siècl'ye l's Arabes saccagîdrent la contrée. I' fûdrent là eune bouanne volée, et y'a un tas d'gens dans La Charente dé nouos jours tchi sont d'scendants des Maures dé chu temps-là. Nou les r'connaît par les noms dé Moreau, Moraud, etc. Charles Martel (630-741) les battit, et Charlemagne les chassit et ch'tait à Angoulême tch'il assembl'yait ses soudards.
Auprès l's Arabes, les Nouormands lus y mîndrent à cor et à crîn, et en l'année 845 i' dêtruisîdrent la grand' partie d'la cathédrale et d'L'Abbaye dé St. Cybard. En 981 un grand feu fit un tas de d'gâts dans la ville. Comme s'i' n'y avait pon ieu assez d'êtrangiers dans la contrée, i' fallait qué l's Angliais lus y mett'. L'Angoumois d'vînt provînce Angliaîche par lé mathiage d'Aliénor d'Aquitaine (1122-1204) à Henri Plantagenet, tchi d'vînt rouai d'Angliétèrre en 1154, et la fanmile des Taillefers, tch'avait donné quatorze comtes à L'Angoumois entre 886 et 1217, les battîdrent contre la domination Angliaiche auve ênèrgie et détermination.
Y'a eune histouaithe întèrêssante entouorre chutte fanmile-là dé Taillefers. Ou' fut fondée par un Dguilliaume lé preunmyi (fis Vulgrin, fis Aldoin), tchi fendit, d'un seul coup d'sâbre, un chef Nouormand nommé Stonius, dé la tête jusqu'ès pids! Eh bein : Lé 26 d'août, 1200, ieune des filles Taillefers, tch'avait nom Ysabel, 'tait supposée mathier Hugues Le Brun de Lusignan. San p'pèe învitit Jean Sans Terre (fis de Henri deux et d'Aliénor d'Aquitaine), san souvérain, et d'aut' seigneurs, au mathiage à l'Abbaye dé St. Cybard. Quand lé rouai Jean Sans Terre vit Ysabel Taillefers il en fut enmouothachi sus l'coup, et il ordonnit l'êvêque dé la mathier à li-même à la pliaiche d'à Hugues Le Brun de Lusignan! L'êvêque n'ôsit pon r'fuser l'ordre du rouai, et i' l'mathyit à Ysabel! Jean fit couronner sa femme à Westminster lé dînmanche dévant la St. Denis 1200, et ou' lî donnit chînq êfants dans l'couothant d's années. À la mort du rouai lé 12 octobre, 1216, ou' s'en r'vînt à Angoulême et mathyit sans preunmié galant, Hugues Le Brun de Lusignan, et lî donnit chîn' garçons et quat' filles. Ou' mouothit en 1245. N'en v'là, eune femme! Eune vraie Taillefers, chette-là. En passant, ch'est întérêssant dé noter qué ch'tait chu mème rouai-là (Jean Sans Terre) tchi sîngnit la fanmeuse Grande Charte (Magna Carta) à Runnymede en Angliétèrre en 1215.
I' iut un tas d'batâlles dans l'pays duthant la dgèrre dé chent ans (1337 à 1453), et y'a les ruinnes d'un vièr fort acouo appelé Le Fort des Angliais pas bein liain d'Angoulême aujourd'aniet. Il est couvèrt dé bouais et d'vèrduthe, et nou n'en vait qu'un mio des remparts dé la route, mais i' pathaît qu'nou-s en vait la forme tout à fait bein en avion quand nou passe par dessus. Comme dans toutes les dgèrres, i' iut un tas d'soudards dé tuées des deux côtés, et les fèrmièrs dé là l'tou trouvent acouo d's os humains dans lus clios quand la bêque ou la tchéthue va un p'tit pus avant qu'd'amors.
La ville changit d'mains pus d'eune fais. En 1345 ch'tait l's Angliais tch'en 'taient les maîtres. Ou' fut r'prînse par Jean l'Bon (rouai d'La France dé 1350 à 1364), mais Edouard, lé Nièr Prince, fit Jean l'Bon prisonnyi quand i' gangnit la batâlle dé Poitiers, et l's Angliais r'prîndrent Angoulême et y restîdrent jusqu'en 1373. Edouard, fis du Nièr Prince et nommé comme san p'pèe fut né là.
Pus tard, ch'fut les dgèrres dé réligion tchi troubl'yîdrent Angoulême et L'Angoumois et l'Duché changit d'mains bein des fais. Lé grand des fis du Comte d'Artois, pus tard rouai d'La France souos l'nom dé Charles dgix, fut l'dèrnyi Duc. En 1790, quand l'Départément dé La Charente fut formé, la ville d'Angoulême fut nominée la capitale du nouvieau département.
Viyiz étout: