Etbain not couozin Flip je sis ben aise de t'vés,
Il ya un temps hôrible que j'nos som recontrés,
Prend chute scabelle illo et t'apréche tout près d'mé,
Bâille nous de tan caquet, je voudrais té d'visé,
Mais arête, tuest lâsset, dit me quaich que tu bé,
Aiche du rom, une fais d'cidre, ou une bollaits d'chaoudé,
Quéch sé yun ou bain l'aoutre, de chonna i n'importe,
Dit mé ch'que tu souhaite, car j'en ai des trés sortes;
Et oprés qu'je serons un p'tit mio rêcaoufaits,
Je pouôrons bargouêchi des nouvelles de ch'tannaits;
Mais vlo Jeaneton qui vain, je mangejeon une bouôchie
Et oprès not diné je d'visson une achie :
Sans faichon man garçon, aide té d'une tranche de lard,
Guede te bain, n'te presse pon, y n'est pon oquo tard;
Es tu bain grée? Jeaneton, cliergie la table vite
Aporte nous le p'tun et va cherchi des pipes,
Et nos bâille tout d'un co d'la liqueur des trés sortes,
Et si tuan as quique âoutre aporte, aporte, aporte;
Ach'toeu man chier vaizin atrape une fais à bère
Et me mai, un p'tit mio, au couorant des affaires.

LE COUÔZIN FLIP.

Vrainsment man chier Couôzin, jen sai ch'que nou va faire,
Les affaires i m'semble, ne vont que d'piere en piere,
La dette publique s'accrée, nos grosses têtes n'en font notte,
Y vais nos sou allé, maougrait tout y san botte,
Car oprés touos chés louis qu'il ont déjà enfouis
I'ne semble pas en être oquo déscouoragis :
Vlo ti pon l'écliérage et l'pavage de la ville,
Les grand routes, et marchiers, quion couôtait bain des billes.
Il ont ettout envis d'arangi la Parade,
Et d'bâti je n'sé you une muraille dans la rade
De crainte que l'ermitage ne s'écape du châté,
Et, sans quique belle frédenne, se trébuque dans la mé,
Et cachi par les vents, ou dans une forte achie,
Ne s'en venne nos bouchi l'entraits de la caouchie :
Oprès tout, man bouan homme, quêque tout chonna nos sert?
Des follis si couôtoeuses nos font écallé l'zyers.
Je voudrez bain savé, notre anmin, ch'que tuen cré!
Ya ti pon d'aute quifaiche pour nos sou dépensé,
Qui n'couôteté pas le quart de chain qu'il en a fait
Et r'mettré la campangne sus l'pi du temps passait?
Je som remplie d'esprit dans notre isle de Jerri,
Mez chan ès un maouvez, ch'ès l'esprit de parti.

LE COUÔZIN JEAN.

Vrainsment man couôzin Flip, je sis bain êtonnait
De t'entendre pâllé comme un échervellait :
Nou crérai que l'chaudé ta montait à la tête :
Je'n'veur pon t'insulté, més tuest une fier bête,
As tu janmais rêvait qu'aoucun améliorment
A était effectait sans dépensé d'argent,
Et tu si grand bégaout de crére que l'écliérage
Et l'pavait de la ville, sont des desavantage?
Si dans les longues seraits tu vains à t'y landré,
Tes ziers et tes ergots s'ront ben aise d'y trouvé
Du pavait et de la voeux pour ne pon t'êtravlé,
Offuche en t'erlevant, barbouolli de puté,
Capuchi ta pignolle contre un chéteur ouvert
En tâtonnant partout de travert en travert,
Comme faizets nos anciens en pionnetant les rues
Ne pouvant aderchi les clianquets de lus us
Toutes personnes dêvent avoué qu'les marchiers sont utille,
Quiconque le contredit est un fier imbécille;
Quand i furent quémenchis nou les trouvé trop grands,
Je deffie aoucune âme, ach'toeu, d'en dire autant,
Il est r'connu par tous qui sont d'abouan trop p'tits;
Nou zen dira ben d'memme de la nouvelle caouchie!
Au sujet d'la Promnade je n'sé trop ben qu'en dire,
Car les uns en aprouvent les autres en crévent de rire,
Chest un espèce d'atrait pour hâllé l'zétrangiers
A v'nin dans not contraits dêpensé les dédniers;
Chan ès d'dmemme des grands routes, mès touos y'ont profitait
Et personne ne voudrait les r'vêts comme i z'ont tait,
Maougrait tout qu'au qu'manchement il y'avé de têtuognes,
Quien grattais lus chérache, comme s'il avès la rouogne
Ne voulant pas bâilli un pouce de lus terrain;
Il ont ben voeu d'pis que ch'était pour lus bain :
Et si falait ach'toeu les mètre comme ils tais,
Y bârais bain lus pé pour les fère ergrès;
J'espère man chier couôzin que te vlo sans replique,
Et que nonne peut sans sou faire les travaoux publics.

LE COUÔZIN FLIP.

J'tacorde tout chonna, tout ch'que tu dis est vrai,
Mès im parais bain clié que sans tans dêpensé,
Nou pouorai, p'tit a p'tit, avanchi d'temps en temps,
Et sans se métre en détte faire des améliorments;
Chest chonna qui m'englis, et me met en guedon
De vée tant de dêpense de sou que j'navon pon :
Quêque tu dirais d'un homme qui n'a qu'chan louis par an,
Dans l'couorant de douze mais d'en dêpensé doeux chans,
Tu s'rais yun des premiers pour allé d'un bouan qoeu
Persuadé ses anmins d'lis mettre un curatoeu.
Et chu bachin à flio de qui nou fait tant d'train,
Dit mé ch'que chais, j'ten prie, car je n'y connais rain;
Esche vrai q'touos les navires vaindront s'y mettre en r'pos
Comme ferais, dans une mare, un flioquet de Piros?
Non s'gréiet ben aoute fais sans Bachins dans la mé
Pour bouoilli le fricot des matlots a dinné;
I l'apelle un Bachin, chest pustot une grande Pêle,
Depis qu'touos les navires peuvent s'y mettre a Pêle-mêle;
J'en sie tout êtonait, j'nérais jenmais peu crére
Que nou sinmaginné une ausi drôle d'affaire;
Chest pour flanqui nos sou et acrêtre not détte,
Je m'en aperchai ben sans mettre mes lunétte.

LE COUÔZIN JEAN.

Oquo de tes niesseries, nou crérai que jenmais
De ta vie tu nerais sorti de tes Quenvais;
Qui bêtisse de pâllé de Pêle et de Bachins,
Tu n'tis connais pas pus qu'un paisson n'fait des q'mins,
Jenmais j'n'airais pensait que tu'est un si grand sot;
Chest des caouchie frumaits que les Bachins a fliot!
Ou les navires étant constamment a la nage
Peuvent deschergi lus fret a pus grands avantage.
Il est clié comme le jour que touos chais bâtisse la
N'manqueronts pas a couôté de bieaux sou a l'êta,
Mais quand nou zentreprend quiqçéçé a bâti,
Chest une bachouarderie de la faire a mainsqui,
Et si nou ne peut pas le fini tout a fait
I vaoudrait chan fais mus n'yavé jenmais pensait :
Mais si les partisans voulaits bain s'entre entendre
Et bouonement consulté comme y faudrait s'y prendre,
De bain grands avantage, pour Jerri, y pouôrais
Parfaitement accomplir a la mainqui des frais,
Mais touos nos raisonements n'amendedons pon lafaire,
J'ny gangnenons pas un sou y vaout si bain s'en taire
Esperans qu'nos Messieux pouoront p'têtre, oprès tou,
Nos trouvé les moyiens de remboursé nos sou.

LE COUÔZIN FLIP.

Je crai que tuas raison, et je qu'manche a y vais;
Quand j'nos capucherions la tête contre les parais,
J'ny gannons pas une fliuque, laison les choses allé,
Il est déjà bain tard et grand temps de fillé;
Adi man chier couôzin, quand tu vaindras me vais
J'airai un bouan fricot a t'atendre ès Quenvais,
Not femme sera bain aise étout d'y vais Jeaneton,
Amenne la quantait té, j'ten prie d'ny manqui pon.