Moussieu, - I ya quique temps je lus sus une gazette que un Anglaiz avé profaitizai que la fin du monde vaindrait chette annaïe.
Je crai que les Estats de Gerri daivent avé lu chut article là et tou, (pas seulement lu, mais qu'ils ont tai assais niez d'y craize), car, comme ils ne veulent pon payi lus dettes, chounna montre qu'ils y craient. Chais bain vrai, Moussieu, que si ou vain chette annaïe, lus créanchiers n'aizont pon besoin de sous.
Mais si par chance que chu grand esvennement là n'allai pon venin, les pouorres malheuzeux qui ont fait du travas pour ieux (les Estats), il faudra don qui crévent de faim! Mais, (God dai well), ché séza affreux!! Ché séza les Estats qui sézont la cauze qu'une partie du genre humain de Gerri mouorra!!!
Je ne sai pas, Moussieu, si la raison pour qui les Estats crais à la fin du monde, pour chette annaïe, sézai à cause des signes des temps. Nou voudrai le craize. Ou savais bain qu'il est dit que dans les derniers temps l'Evangile séza praîchi partout. Et bain! chez chain que nou vai de nos jours. Ergardais en Espagne; - la libertai de conscienche y existe à chette heuze! Qu'est qu'aizé jamais creu di tai!!!
Et pis, dans un autre endrai, il est dit et tou, que "y veindrai une race de gens qui gouvernezont le peuple comme avec une vergue de fé."
Si j'avais lieu de craize à la fin du monde, ché sézai à chutte dernièze affaize ichin. Car pour n'allé pon pus lien que l'aûte jour, les Estats (qui sont sançais gouverné le peuple), ont décidai qu'à l'avenin, il faudra ne pas manqui d'allé à l'Eglize le Vendredi-Saint. Oh! Moussieu, oprès chu coup-là, esche qu'ou ne craizais pon et tout à la fin du monde!!!
Je vos sézais obligi, Mou., de mettre chuttre espitre ichin dans votre bounne et respectable Gazette de Mescredi qui vain, et en le faisant, je démeuze
Votte serviteu,
Yeun qui ne crai pon à la fin du Monde,
Du mains pour chette annaïe ichin.
Béquet es Cas, chu 3 Mai 1869.
Viyiz étout: