|
Mousieu, Eh bein, mons doux, qu'est qu'chaies Que chutte ligue de Progrès, Organizaie par les villais? Ou viyies, Y s'nomment la Ligue des pi, pi, * Et pis y disent, en deux mots, Qui vont soeingni des John-ots, † Coumme nou disait aut'fais, Des Saint'Ouennais. Et y vont nos montré Coummest qui faut gouverné. L'Président, chest Mousieu L'Docteu Godfré. Y n'a rein à faith', y puourra Lus arranghi bein tout chounna. Pour la canpanne, Jes' s'cea du fanne; Faudra pas s'faithe de bile Tout s'cea fait pour nous en ville. Quand y faudra un candidat Nou z'envièthea A la Ligue, qui choîzithea; Et quand à nous, Nou vot'tea tous Pour chetina. Chest êtounnant Que nou n'y'ait pas pensai d'vant; Je d'vons être bein ercounaissant A tous ches buounnes gens, Car y patheais, le viyous? Y s'dêrangent tous pour nous. Car y craient qu'ils ont pour mission D'mettre ordre dans nt' maison. "Mais la charitai, nou crétheai, Dev'theai quémanchi par siez sé, Et devant se posé pour des sages Faut mettre orde dans ses mênages). J'doute s'y puourront réussi, Nou verra chounna p'tit à p'tit, Yia un êchu à payi, nou pensait Que yiétheait quicq'chose à erchévé. Je cré qu'ils étheaient deu nommé Mousieu... pour les présidé. Ach'teu, dam', San nom dait être truthful Tom. Sus a question du Réfrigateur, Y s'mins à faithe un tas d'teurs, En lus disant, Mes buounnes gens, (Pâlant coumme si ch'tait à d's esfants) Y disait Que devrait, Les buouchiers n'voulaient rein pour glé Lus viande. Et quand tout l'temps Ch'tait sus l'aut' sens. Mess de Faye En a yieu yieun tout exprès Pour li, Et les siens qui veulent payi, Pour s'en servi; De même y n'voudrait pas En vais yieun pour les Etats. Nou pouvait vais Qui n'sagissait qu'des intétheais A Mess de Faye. Achteu nou vein A l'êtrain, Et au fain; Et qu'est que nou n'a pon ouït, Sus chu maudit Coumiti. "Qu'est qui gangnaient d'têtouanghi?" "N'viyaient' ti pon l'île de Gheurnézi!" Ils admithaient Les Gheurneziais; Et pour les arrêt, Fallait lus paullé des Droiets d'Quai; Et s'êcarté un p'tit, Pour n'entendre pas chein qu'était dit. Ils en disaient, ch'tait par achies, Sus le Coumiti des Cauchies; Nou disait Qui n'valaient qu'à pendre ou à brûlé. Ne v'la tout le grand piaizi Qui yia à servi san payï. Quicq' jours devant la malheutheuse affaithe De Gheurnézi, nou z'a d'la peine à l'craithe, Chest pourtant vrai, Chein que j'men vais vos raconté. Des Pétitions 'taient prépatheaies, Pour être colportaies En ville, pour être signaies. Une démonstration hostile De tuous les cochers d'la ville, Y d'vaient v'nin sus l'Vier Marchi, insisté Que l'fain et l'êtrain entrétheai En Jerri, Coumme y fait en Gheurnézi. Chest drôle, et nou s'est d'mandai Qu'est qu'ches batiaux faisaient à Gouorai; Chergies jusq'es hobans, criyious Que nous cherchait à s'fichi d'nous? En disant Que chétait par le mauvais temps, Qui'ils avaient entrai en dedans; La dose était trop forte, Pour nous à craith' rein d'la sorte. Ils' 'taient là, pensant que l's'Etats Ersétheaient venus sus lus pas, Et qu'ils étheaient dounné un pid A la Députation sus l'vier Marchi, Et qu'ils étheaient ordounnai Que tout le fain fut leindai. Chest d'même que nou cherche à s'motchi Du public. Sam'di, d'vant les Etats, nou pouvait vais Mousieu Pains, et les Députés D'la ville à décidé d's'entendre Sus l'attitude qui fallait prendre Dans les Estats. Ch'tait à crévé d'rithe, amusant De les vais cherchi à paraître contents; Quand nous savait bein Que chétait contre l'grain. L'annaie passaie Les Estats ont dit qu'ils 'taient assais Chucraies, Et que nou' n'criait pas une mie A toutes ches sortes de chucrethies. Nou veint à trouvé Pour qu'est que nou voulait Faithe la fortune a deux, aux dépens Du reste des habitants. Le prumi Député de Saint Hélié Est oquo à éprouvé A mettre san petit esfant En avant. Y n'sait pon Que l's'Estats ont déjà dit non. "Y veurs nos attrapé Par le bé; Ou, par le bé ma fé." John-o 1902 |
Viyiz étout: