Les Pages Jèrriaises

Eune Séthée d'Dézembre

Les boulants scodent dans la Pathade;
lus rouoges veues touônnent en dgiâbliotîns
ches embonn'tés tchi halent en rade,
maîntchi tîthon, maîntchi brûlîn.

Les nièrs trous d'bouais mâtés tout l'tou
atotent un liet ès fielles pièrcheuses;
lus entré-siévant paque-à-coue,
les vaituthes vressent en carpéleuse.

I' valsent et vressent et vèrsent du rouoge
tch'envitoue les fraides faches dé tchuivre.
Ch'n'est pon eune hyie du vent tchi clioge;
ch'est l'nièr êtibotchant tch'enivre.

Avaû la Pathade, il' aboulent
des blios gliaichis attînfés d'feurs.
Les cos d'vent dansent et droquent et droûlent...
et l'monde à tchaquenarder et tcheûrre.

Geraint Jennings
Dézembre 2014

 

Viyiz étout:

 

Les Pages Jèrriaises