Les Pages Jèrriaises

À l'Editeur du Constitutionnel



Monsieur,

Vendredi au soir dernier, j'observai deux de mes voisins qui se rencontrèrent tout près de ma porte, et je les entendis prononcer le dialogue suivant. Si vous avez l'obligeance de la publier dans votre journal Samedi prochain, vous obligerez

UN ELECTEUR.

Mont-à-l'Abbé, ce 8 Octobre 1845

 

Bon soir Maitte Flippe, d'oie qu'ou v'nais si tard? Quest quechais qui vain dyavé, don? Pourquais qu'nou za tiret?

 
Me. Ph. Oh! man pouore Maitte Jean, j'vains d'la ville, yavait une assembiais des Constituans pour concilly au Connétable commais quid vait voter dans l'zétats pour l'affaire du bachin de fiot; mais yen avait y du monde; y lys faisait si caux; nous z'était tout en Sueur des qu'nous za qu'menchi, mais chez qu'nou n'est pas d'même acheteure, car les gens disaient en sortant qu'ils avaient fret, et qui craignaient que lus Sueur ne lus fit du ma; mais tréjoux nous za decidet qui faut que l'bachin sait basti en dehors de la cauxchie du Nord, car ysça pus grand et couote ta mains que l'chain deddans, si nou rabat la valeur des terrains gangnis, et la valeur de la cauxchie actuelle qui restera, et s'ça oquo pus grande qu'ou n'est acheteu. V'la pour qui qu'nou za tiret du cannon, tappait sus la table, et criet houras; pour quesques qu'ou niètes pon v'nu ossin? v'la qui valait la peine de vais et d'oui, car ya yeu des discours quairaient fait rire les cats, particulièrement yun quiatet lu par Moussieu Josué Le Bailli, il a quemenchi par dire que bain du monde avait fait des calculs sus les despenses du bachin, mais quine yen avait pas yun d'bain, rec le sien, il a paslet des quattes pians de Mr. walker, et il a dit que personne n'avait oquo penset à bâti numero quatre, qu'est le pus grand, car il errait couotait tro de sou, et d'pis qu'nonne pouvait pon bâti ch'tinsna, y fallait bâti l'pus p'tit, que si nou zen bâtissait un autre, nousse sait oquore en dette dans l'an de grâce mil huit chants septante chinq; et pis y nos a asseuxrés que l'bachin intérieur essé suffisant pour la navigation jerriaise presente et future, chain qui veut dire jusqu'a la fin du monde. Quand il à tait fini de liere, les gens ont criet Amen; et il à restet, sou l'aviez veu, le papi dans ses mains, des yiers comme des souostasses et la bouoche ouverte, ou leriez raisvet chutte niet.

 
Me. Jean J'ai grand r'gret d'niavé pas tait pour le ouïr, chu pouore Joe, il est trejoux à la ris'lais du monde; esche pon ly qu'nou pasle de mette Chane-gni, quand y yen manquera yun?

 
Me. Ph. Nou zen pasle, mois jenne votte-tait pon pour ly, j'sai bain, et pis y d'meure ta Saint Sauveux acheteure, y sen va yêtes mins au rât.

 
Me. Jean Y n'a donc paslet de chu pians, de qui il avait fait tant de trains à la Chambre de Commerce, y ya quique mais, qui ne d'vait pas couôter un sou à bâtir, et que le Concionnel touanna en ridicule dans des versets?

 
Me. Ph. En mais nen dia, y nen a pas dit le pus p'ti mot, j'conte qu'il en a yeu honte.

 
Me. Jean Et y yen a ti yeu d'autre qui vos aie fait du fonne?

 
Me. Ph. Oh mais y yen à yeu bain des piéches, M. Geo. Enmin entr'autres, nos a fait bain rire quand y nos à dit qu'nou pouorra porter le bachin extérieur dans les magasins à M. De Quetteville, au moyen d'un quai et d'un pont, et je pense avec des chainnolles, ou bain de la vapeur; jenne sait pas commèche, mais nou za rit assets tréjous.

 
Me. Jean Et M. De Quetteville quest qui disait?

 
Me. Ph. Oh ly, chest un homme comme y nian a pon, y paraissait masri en quemauchant, mais à la fin y riait comme touos l'zautres, et il à criet houras quand il a veu que presque tous avaient fait d'même.

 
Me. Jean Et l'Connétable quest qui disait ly?

 
Me. Ph. Oh pour ly, il avait grand despiet, ou savez il a fait touche qui la peu contre, il avait même fait inmprimer un livre quil a donnet à tout l'monde, la oui yavait des calculs monstres quaitais hors de la portez de bain du monde, ossin sans pouorre livre atait mepriset, et y yen avait dans la craude qui disaient qui s'rait oquore bon pour quique chose.

 
Me. Jean Ha! ha! ha! mais quest qui disait?

 
Me. Ph. Il a dit qui préferait le p'tit bachin au grand, mais que d'pis que tout le monde était pour chu bachin extérieur, y votte-tait pour dans l'zétâts.

 
Me. Jean Si j'sis Connétable, donc, il errait deu dire, car je crai bain qui nisse ça pon dans chu tems la, je sai bain que mé et mes vaisins vote tons contre ly: il est trop orguilleux, jenmais inne nos pasle, nou za peux d'apprechi d'li, j'sis seux qu'nonne nappelle la pon chu bachin là d'sen nom.

 
Me. Ph. J'crai bain; y l'appelle deja en ville le “Bachin Nationnal”

 
Me. Jean Eh bain chest un bouan nom.... Ecoutez.... ma fé, v'la minsniet qui sonne, quest-que Betty dira, j'sis seux qu'oulle est couochie et sou dort, chès fichu pour enniè, admain.

 
Me. Ph. Admain, Maitte Jean.


Le Constitutionnel 11/10/1845


 

Viyiz étout:

 

Les Pages Jèrriaises