Lé Châté Lîzabé
Lé Châté Lîzabé est un châté dans la Baie d'Saint Aubîn (ou la Baie d'la Ville) à Saint Hélyi en Jèrri.
Jusqu'à la fîn du seizième siècl'ye, la grande défense dé l'Île 'tait asseûthée par lé Châté à Gouôrray, mais l'întroduction d'la poudre à canons et la technologie des canons oblyigîtent d'èrpenser la d'fense, viyant qu'les grandes muthâles et les monts au ras du châté sîmplyifiaient les tactiques dé bombardément du châté. L'Vièr Châté 'tait dêmodé et i' 'tait d'mêtchi dé l'rempliaichi par un neu châté hors d'la portée des armes.
Nou décidit d'bâti l'neu châté sus un îlet en d'houors d'Saint Hélyi où'est qu'la vielle Abbaye - pus tard un Prieuthé - d'Saint Hélyi avait 'té êtablyie.
En 1550 duthant l'règne du Rouai Douard VI, Duc dé Nouormandie, la fortificâtion c'menchit par la bâtithie d'eune pliateforme d'artill'lie sus la sîl'ye dé l'îlet. Eune quarantaine d'années pus tard dans l's années 1590s, sa soeu Lîzabé I, Duc dé Nouormandie, envyit s'n înginnieux militaithe Paul Ivy d'l'Angliétèrre à seule fîn d'organnîser la bâtithie du châté. Lé Gouvèrneux d'Jèrri entré 1600-1603, Messire Walter Raleigh, tchi seurvilyait les travaux décidit d'garder l'Vièr Châté au run d'faithe sèrvi ses pièrres dans la construction du châté dans la baie, criyant qu'ché s'sait un pitchi dé l'pitchi bas. Ch'fut li tchi nommit l'châté "Fort Isabella Bellissima", ch'est à dithe lé Fort d'la pus belle Lîzabé.
La pus vielle partie est l'Mont ou la Haute Garde. Acouo eune pliateforme d'artill'lie fut bâtie sus l'Mont bétôt auprès la construction pouor c'menchi du châté, auve eune Porte dé Fé coumme entrée.
Lé pus vièr bâtisse du bas du Mont est la Maîson du Cap'taine. Lé c'mandant ou cap'taine du châté y d'meuthait et nou vait la date 1594 sus la cheunm'née. Les trais-quarts du bâtisse fûtent dêmolis dans les 1700 pouor la construction d'eune pliateforme d'artill'lie.
La Maîson du Gouvèrneux est typique d'l'architectuthe Jèrriaise du seizième siècl'ye. Lé preunmié Gouvèrneux d'Jèrri à y d'meuther 'tait Messire Walter Raleigh, et ch'tait la d'meuthe du Rouai Charles II duthant ses vîsites en exil. Un traîsième êtage fut ajouôté dans l's années 1730s; ch't êtage fut fait sèrvi coumme chapelle du châté en 1842 et restait d'même jusqu'à la fîn du sèrvice militaithe Britannique du châté. Quand l'Châté Lîzabé fut bailli à Jèrri la maîson fut restaurée ès 1920s/1930s à s'n appathence du dgiêx-septchième siècl'ye. Duthant l'Otchupâtion l's Allemands transformîtent la Maîson en bèrrexes mais lus changements fûtent halés en 1946.
Entre 1626-1636 eune tou d'dget fut ajouôtée sus l'Mont, épis les muthâles du châté fûtent rallouongnies à seule fîn d'embarrer les bâtisses du monastéthe au pid du Mont. Chennenchîn, ch'tait la Bâsse Garde ajouôtée pouor l's années 1640s, dé tchi l'entrée 'tait la Grande Garde. La Grande Garde s'adonnait sus eune grève entré les deux îlets, tchi sèrvait d'fôssé dé d'fense. À l'aut' but d'l'aut' îlet en 1646-7 lé Fort Charles fut bâti pouor protégi l'apprèche au châté par lé Pont. Né v'là l'châté coumme il existait au c'menchement des Dgèrres des Trais Rouoyaumes (la Dgèrre Civile Angliaîche).
Au c'menchement d'la dgèrre lé gouvèrnément du Bailli s'èrfugyit dans l'Châté Lîzabé en 1643, et la dgèrre sé caûffit quand des navithes Parlémentaithes vîntent mouoilli au lis du châté et les canons du châté tithîtent sus ieux. Les forches Parlémentaithes fûtent envyées hortes et Jèrri 'tait gardé pouor lé Rouai jusqu'en 1651.
En 1646 lé Prînce dé Galles (tchi d'veindrait l'Rouai Charles II) et san fréthe lé Duc dé York (pus tard l'Rouai Jacques II et VII) arrivîtent en Jèrri et fûtent louogis dans l'châté pouor un coupl'ye d'mais. Charles èrvînt en Jèrri 1649-1650 (ayant 'té procliâmé Rouai en Jèrri auprès l'exétchution d'san péthe) et louogit acouo eune fais dans l'Châté Lîzabé. Pouor chu temps-là Jèrri 'tait l'seul tèrritouaithe du Rouai tchi 'tait acouo en seûth'té pouor li.
En 1651 un moulîn' à vent fortifié fut bâti sus l'îlet du Nord (dêmoli par 1737). Quand chutte partie d'l'îlet 'tait en d'houors du châté ch'tait eune boul'lie.
En 1651 eune fliotte dé navithes Parlémentaithes vailit à l'Île et les troupes prîntent l'Île sénon pouor la dgèrnison Rouoyaliste tchi s'èrtithit au châté.
Les forches Parlémentaithes assiégîtent lé châté, en bombardant lé châté d'la côte. Iun des boulets adèrchit l'lief d'la vielle églyise monastique qué nou faîthait sèrvi coumme poudriéthe. La soûffliéthie dêtruîsit les storres dé mangi et d'poudre. La dgèrnison n'avait pon assez d'provisions pouor continnuer et fut forchis dé s'rendre en lé 15 dé Dézembre 1651. Auprès la soûffliéthie d'1651 chein tchi restaient d'l'églyise continnuait d'usage coumme chapelle, arséna, louogeais d'soudards et gardîn.
Auprès sa restaurâtion au trône en 1660, l'Rouai Charles II, Duc dé Nouormandie, rêalîsant qu'lé tèrrain 'tait sans d'fenses, c'mandit au Gouvèrneux d'Jèrri d'protégi l'îlet et accordit £2,000 pouor la d'fense d'la boul'lie.
Enfîn en 1688 tout l'îlet du Nord fut fortifié et încorpouothé dans l'châte, atout des muthâles. La grève tch'avait sèrvi d'fôssé fut formalîsée coumme fôssé militaithe. Tchiqu's'eunes des pièrres d'l'églyise ruinnée fûtent èrfaites sèrvi dans les muthâles d'la Garde dé D'houors. Eune batt'tie pouor trais canons fut bâtie sus l'Rotchi d'l'Hèrmitage pouor protégi chu bord-là d'la mé.
Au pouorportant d'la muthâle, des Longues Bèrrexes fûtent bâties dans les 1690-1700 pouor louogi quat' compangnies (y'avait dans les huiptante officièrs et soudards dans eune compangnie). Lé bâtisse n'tait pon d'bouonne qualité et fut dêcrit coumme étant en d'lacres en 1737 et en r'nonchiâtion en 1783, auprès tchi i' fut dêmoli et n'y'a rein tch'existe acouo d'ches bèrrexes au jour d'aniet.
La pathade dans la Bâsse Garde fut êtablyie au dgiêx-huitchième siècl'ye. Pouor 1735 quand l'louogeais ès officièrs fut bâti des dreins êqu'sîns d'bâtisses sus l'site avaient 'té clièrgis. Des pièrres fûtent èrfaites sèrvi d'aut' bord dans l'châté.
Un bel dé paûme fut bâti dans la carre. Endrait, les bèrrexes ès soudards fûtent finnies en 1755. Un rapport d'1798 explyique qué jusqu'à 480 hoummes pouvaient êt' louogis dans les bèrrexes. Au but d'la pathade, lé Storre fut bâti en 1746. Y'a eune poulyie au deuxième êtage. Duthant l'Otchupâtion (1940-45) les Allemands fîtent sèrvi l'Storre coumme eune tchuîsinne.
L'aut' bâtisse încorpouothait trais bâtisses, en partie la bibliothèque, en partie eune tchèrquéthie, et en partie la maîson du Maît'-Artilleux.
La Cantinne au but du Nord d'la pathade, bâtie en 1735, soulait êt' pus grande, mais un tchièrs en fut dêmoli par l's Allemands pouor la construction d'un bunkèr.
En 1781 lé r'êffet d'la Batâle dé Jèrri pèrsuadit l's autorités Britanniques qu'i' fallait eune nouvelle fortificâtion à tèrre. Duthant l'învâsion Française, la dgèrnison Britannique au Châté Lîzabé avait 'té copée par la mathée. I' r'fûsîtent dé lus rendre mais n'pouvaient pon prendre part dans la dêfaite des Français. Au c'menchement du dgiêx-neuvième siècl'ye, la bâtithie du Fort Régent c'menchit et, quand l'Fort fut finni, v'là tchi d'vînt la grande base militaithe en l'Île.
Duthant l'dgiêx-neuvième siècl'ye tchiques bâtisses fûtent bâtis dans la Haute Garde (dé tchi les ruinnes fûtent clièrgies auprès la Libéthâtion).
Eune nouvieau corps dé garde fut bâti à l'entrée en 1810. Y'avait un aître pouor blioutchi des soudards ivres ou r'bêles tchi r'vénaient d'la Ville (y'avait étout tchiquefais des niêtholes dé soudards ivres ou tch'avaient mêcartchulé la mathée en r'vénant par lé Pont).
L'hôpita d'achteu fut c'menchi en 1810. Y'avait un hôpita tchiquebord dans l'châté d'vant, mais nou n'sait pon où'est qu'i' 'tait. Driéthe l'hôpita d'1810 y'avait eune êtabl'ye à j'va, un storre ès înginneurs et un aître à tchèrbon.
Jusqu'à dans les 1840 un tabouothinneux battait eune marche avaû l'châté pouor annonchi qu'lé Pont s'sait bétôt couèrt. Épis un cliochi fut bâti au d'ssus d'l'entrée du châté et auprès chenna la clioche en 'tait sonnée pouor dgèrni les soudards qué l'Pont 'tait pouor êt' couèrt par la mathée. Les cheins tch'avaient à rester à tèrre en Ville d'vaient rapporter à la Maîson du Pitchet et attendre lus peunnition.
Ès années 1870s les Êtats d'Jèrri décidîtent dé bâti eune caûchie dg'ieau avante pouor Saint Hélyi auve deux longues caûchies rallouongnies d'La Collette et du Rotchi d'l'Hèrmitage. Pouor aîdgi ès travaux, eune pétite caûchie fut bâtie entre lé châté et l'Rotchi d'l'Hèrmitage. Tout coumme lé couôtage du projet s'haûchissait et en 1873 y'eut eune crise bantchiéthe. Épis des tempêtes d'Hivé avraûnîtent les travaux des caûchies. Lé projet fut laîssi tchaie auve raîque eune partie d'la caûchie du châté ag'vée. Nou r'quémenchit des travaux pouor rallouongni la caûchie du châté en 1887, mais v'là tchi fut la fîn d'l'idée d'eune grande caûchie.
Y'avait acouo eune dgèrnison militaithe au Châté Lîzabé jusqu'en 1923 quand l'châté fut vendu ès Êtats d'Jèrri.
La Chapelle dé l'Hèrmitage fut r'pathée en 1930.
Des travaux d'èrgraiethie c'menchîtent dans l'châté même à seule fîn d'lé prêsèrver coumme monument historique. Tout coumme duthant l'Otchupâtion d'Jèrri 1940-1945 par l's Allemands l'châté fut r'fortifié et nou vait chîn' et là dans l'châté chein qu'les Allemands fîtent et chenna auve un abri d'projecteu, des bunkèrs et d'l'înfrastructuthe d'artill'lie. Chein tch'est pus êvident d'au liain ch'est la tou d'contrôle dé feu sus la sîl'ye du Mont tchi couronne achteu l'châté. Pouor la fîn d'l'Otchupâtion y'avait des parties du châté en d'lacres. Auprès la Libéthâtion, des prisonnièrs dé dgèrre Allemands clièrgîtent tchiqu's'uns des changements Allemands et r'pathîtent des parties du châté.
Lé seize dé Juilet (La Saint Hélyi) 1959 eune crouaix fut înnaudguthée et consacrée dans la pathade à seule fîn d'mèrtchi l'empliaichement d'l'Abbaye dé Saint Hélyi. Pus tard la crouaix fut r'muée à eune pliaiche tchi s'adonne sus l'Hèrmitage.
Viyiz étout:
