Les Pages Jèrriaises

Jé sis Charlie

Nou tithe au blianc papi
des sornettes coumme un trait
en pliomb au pilôsi...
la main laîsse la plieunme tchaie.

Nou tithe au blianc papi;
les dés laîssent lus êtampes
en gris et vieillâqu'sies
et la cliaithe lîngne y lampe.

Nou tithe au blianc papi;
la véthité, hampionne,
happe la pathe d'un clyîn dgi.
L'encre et l'sang dêgouglonnent.

Nou tithe au blianc papi,
mâté ou sus ses g'nouors,
raîque des pièrres à fûsi -
Nou vit... et l'crèyon couort.

Geraint Jennings
Janvyi 2015

(Des membres d'l'êtchipe du magâsîn Charlie Hebdo fûdrent assâsinnés à Paris)

 

Viyiz étout:

 

Les Pages Jèrriaises