Les Pages Jèrriaises

Tant pus qu j'viéyis

Tant pus qu j'viéyis, tant pus que j'trouve qu'i y-a d'drôles de gens sus chutte grôsse football qu'est le monde.

I' y'en a tréjous de mârris contre chu boustre de caouan maîme parmi les siens qui sont dans la jouaie quand chu drôle d'oïsé piconne un miot les aoutes du contre parti.

Pour de mé, j'men fiche coumme de ma premièthe qu'minse, que je n'ai jamais ieu parce que les caouans n'ont que des plieumes. Et pis ou viyîs coumme j'nai pas l'drouèt d'vouais et que je n'sis pas un viau qu'nou peut acaté, qu'ou siyis rouoge ou blius, n'v'là qui n'fait pas de difféthence pour mé. Chein que j'raconte, ch'est chein que je ouï ou veu de mes yiers et ce que j'raconte, ch'est chein que je veur raconté. Je sai' bein qui y-a des gens qui sont hardi court de pé, principalement les siens qui n'vais pon trop clié. Pour de mé, caouan, je s'rais coumme chu grand handy man, - dans l'temps qu'nou pâslait des èslections – j'en chantetais Dolly Gray. Qu'on les grattent, v'là qui lus f'rait hardi d'bain.

J'vous ai racontai la dernièthe fais que j'tais au meeting à St. Cliément. Quand j'men fut me muchi souos l'portico, après le meeting, j'en entendit de toutes les sortes, car Tom tais mârri.

Je n'vos en souffliéthai mot. N'v'là qui ne me r'garde pas et pis quand nous est en colèthe, nou conte un tas gnollin qu'nou n'pense pas.

Quand j'entends du monde en colèthe, j'me muche dans un bouais bein à l'abri, hors de la tempête ! si j'ai unne chance.

Dolly 'tait content, car ch'est l'i qu'a scorèt dans ch't'histouète. Il 'tait prêt à s'battre ..... en êlection, bein entendu – mais i' n'se battit pas, puisqu'i' n'y avait pas d'oppôsition. L'i èttou, coumme Sid, ne dèshalli pas ses dreadnoughts qu'il avait dans ses pouchettes.

***

J'fut au mannyi Jeudi au sé et j'vit eunne jeune hardelle qu'eut l'malheur de tches dans l'vivi.

Ou' n'y fut pas bein des minutes, mais dans l'estat qu'oul en sorti, les caouches et cotillyions touos verdâtres, j'vos dithai que je n'cré pas qu'ou fut fort à s'n'aise le restant d'la séthée.

Tchi biau show, bouannes gens. Nou, n'avait jammais veu ditèt.

J'n'y vit pas Frainque, où-est qu'il 'tait, j'mé d'mande. S'il avait exhibèt, y'éthait fallu avait eunne tente de pûs, au meins grande comme la sienne à Mess Couillard. Ch'est là l'moussieu qu'en a fait de sous ! V'là tchi l'i paie mûs que d'faithe des toumates.

***

J'ai entendu tchique chose dé bein drôle dans la pâraisse au Bouan Berger.

Nou dit que Maîte Sam est raide mârri occouo eunne feîs.

Si tout va bein, j'vos en racont'ait un bu la s'mainne tchi veint.

Caouain
3/9/1910
 

Viyiz étout:

 

Les Pages Jèrriaises