Un jour, il y a tchiques temps, j'tais du bord de siez Mac, lorsque j'ouï un homme qui disait : Il est bein trop haout dans la pâraisse. Je l'verrons bétôt souos nos pîds.
Le sien qui dis chounna est pourtant bein grand dans sa pâraisse, et si voulait mettre un houmme coumme Fraînque souos ses pîds, i' d'veindrait si grand qu'i' faoudrait haouchi l'portico à Mac.
I' n'y'a pas bein des s'mainnes, j'en fut avec Charles dans eunne office d' 'Ill Street, mais ou' comprennez, v'là qu'est trop près d'la Cohue, et pour vos dithe le vrai, j'n'aime pas chu bâtisse là ou savèz y'a eunne cage bein solide dans ieunne des quârres foué de hibou, j'aime mûs taithe ma bec sûs chein qu'j'ai entendu chu jour-là, et ch'n'est pon mé qui voudrais mettre ma griffe au but du papi qu'est dans iunne des p'tites câses de l'office.
Chein que j'veur vos dithe annièt, ch'est chein qu'j'ai ouï au meetin' de la s'mainne passèe.
J'entendit des Sts. Cliémentais d'mandé si l'caouan était muchi d'tchique bord. J'y'étais, bouannes gens, et s'ou' n'm'avèz pas veu, ch'est que l'bouanhoumme Ph'lip ne vé pas bein clliai, car quand i' brinji l'appartément et mins les bancs en ordre, j'tais là.
J'vit touos les bouans samarèstains arrivé ensemblle.
Les cheins d'la grand' vingtaine 'taient en force, et j'pense bein qu'la pûs grande partie 'taient des dreadnoughts à Sid. Nou disait qu'i s'n'allaient y'avé opposition, mais i' n'en fut rein. L'ennemin eut paeux des dreadnoughts.
J'sait bein qué tchiqu'uns éthaient bein voulu veîs le fils à Joe comme candidat et j'comprends que bein des visites furent faites ès êlecteurs, mais n'y'avait pas moyien d'y mordre.
Chein qui me surpreins, ch'est que les Chant'niers n'taient pas là. Je sai' que T.P. tait un miot malade, mais pourtchi que Dolly n'tait pas à côté de san chef.
Pour de mé, je n'en sai' rein quoéque duthant l'meeting, j'vit un houmme près du portico et ma fé i' r'semblliai hardi à un monsieu que je connais bein qui d'habitude va à touos les meetings.
Quand je ouï Sid inviter les électeurs à bèthe de la limonade sièz Field, j'pensi en mé-maîme : Sid, tu n'est pas patriote coumme pouorrait te l'dire Monsieu le Protchuleux. D'la limonade, mais v'là qui ne paie pas d'impôt. Ch'est-t-i' pour chunna que tu veur lus en payi.
J'tais sièz Field devant ieux. Tchi tintamarre, garçons. I' y-avait des gens qui s'amusaient sus des p'tites macheines à quatre rouollettes, chein qu'ils appelent des skates.
Je r'gardi partout pour la limonade et j'nen vit pon. Ch'tait un autre sorte d'bèthe qu'ils eutent. I' faut craithe que la bèthe de la tempérance n'était pas assèz fort, car ne v'là qui fut décidai d'allé sièz man vièr anmin Mac, li qu'a r'gardé bein des fais à l'entou de san portico et ne m'a jamais veu.
Je savais qu'nou allé d'mander à Charles de raconté san p'tit viage à Monte-Carlo et j'pensi, coumme tchique fais, i' pouorrait m'escrasé souos les pîds, i' faut que je m'muche âyeur que souos la tablle. J'vit unne tithette et vite me v'là d'dans.
Tchicun d'mandi si le caouan tait là. I' règardirent dans la cage au pèrrot, dans une bouête à cigares, souos la tablle, mais occuo bein pour mé qui n'ouvrirent pas la tithette, et le caouan put entendre tout.
Le boss de la pâraisse fit un speech et c'menchi par dithe que le combat était si fort siez Field que maîmme la vouaix de Daniel n'éthait pas peut s'faithe entendre. Tchi Daniel ? Le Chantnyi qui ne s'ça pas Chantnyi ? L'anmin du peuple ? Celui qui a eunne p'tite vouaix qu'nou peut entendre sus la place du vièr marchi quand y pâsle dans l'mitan d'Halkett Place.
Tout à coup, ne v'là le boustre d'pèrrot qui s'mint à poussé des cris. P't'être qui m'avait veu entré. Un moussieu s'mint à dithe : Ne v'là le caouan ! J'pense bein qu'ch'est la limonade qui l'y fit dithe chounna, car mé caouan je n'ressemblle pas à un pèrrot. Si j'peux éscrithe tchiques mots avec mes piummes, je n'peux rein dithe avec ma bec.
Y'eu a iun qui r'gardi dans la cage, puis dans l'armouéthe, criyant d'm'y trouvé.
De toute chutte histouèthe, j'vos dithai que l'fils à Joe fit bein d'resté chez li, car je sait qu'y'avait asséz de Dreadnoughts pour défendre Fraînque et Sid.
A bétôt.
Caouain
16/4/1910
Viyiz étout: