Quand j'fit la r'merque au boss que l'affaithe était morte dans les paraisses
Quand j'fit la r'merque au boss que l'affaithe était morte dans les paraisses et que d'politique nous n's'occupait pon achteu, y s'fit que n'v'la qui n'le gênait pon en touot et que ch'tait à mon touor d'mettre des balivernes dans la gazette.
N'v'la qu'est la véthithèt èttout qu'nos gens s'préocupent pus de caltchuller les billets du bridge que de saver tchès qui s'ra Chantgni, Député ou Connaitable. Et en caltchullant chès tichets combein qu'il y en a qui voudraient que deux et deux fasse chinq viyant que quatre n'est pas assez pouor payi et encouore moins pouor aver un miot d'profit.
* * *
J'n'crais pon que le couosine Trachy sait d'viser en vièr patois et j'en si grand r'gret pouor ly mais n'v'la qui n'fait rein et mé qui comprends un miot l'angliais j'sis bein aise de lièthe chein qu'oulle met sus la gazette.
L'nouviau Connétable d'la Ville qu'est un vièr garçon s'ra bein aise de saver que le couosine Trachy ly bailly un raide buan coup de main dans s'n'élection car ch'est la couosine elle même qui l'a dit. Elle a dit ètout qu'oulle s'rait candidat à la préchaine élection pouor députés dans l'mais de Decembre de l'année tchi veînt et si d'ichin la nous accorde vouaie ès bêtes j'plumperai pouor ly, bé seur, fouai d'Marie Hibou.
* * *
Nennin, j'n'sis pon invitée ès grandes neuches qui s'en vont aver lieu Lundi tchi veint à la sinette du jour, à chein que j'ai oui.
J'n'crais pon que j'aurais de gâche de neuches viyant que Moussieu est mârri quant à mé et qu'il aime mus râter l'gravi dans sa cache que de lièthe mon bagoulage et mon gnollin.
Mais n'v'la qui n'fait rein en tout et au nouviau couple j'souhaite j'ouaie et une grande lune de miel!
* * *
Si l'rât dans sa paraisse est à un êtchu le quartier, ch'n'est pon la faute à Phlip du Moulin qui fait son d'vé pouor limiter des dépenses pouor les routes.
Il y a tchiques s'maines, le célèbre George, qui a commenchi chutte année a fermi dans chutte paraisse, criyait qui s'en allait faithe coumme bon ly plaisait mais chest que dans chutte paraisse ch'n'est pas coumme du bord de l'Etacq et qui prenne garde à ly.
Chu George, viyant l'dangi de d'vâler l'ptit mont avec une chèrge de patates, s'mint à amather ieune des reues d'san van, l'brake n'étant pas fort assez. Et d'même y descendi avec sa chèrge.
N'v'la qu'était bein pouor George mais les reues du van en draguant d'même auraient bêtôt mis en bel état la ruette si Phlip du Moulin, un vièr patriote ayant à tchoeur les intérêts d'sa paraisse, n'tait aller trouver l'Maître d'la paraisse pouor ly dithe chein qu'il avait veu!
J'sais bein tchès que l'grand Maitre d'la paraisse dit à Georges mais si vous voulez en saver pus long d'mandez ly.
* * *
Ch'tait Dimanche l'arlevée, dans la baie de St.-Brelade.
Une jeune hardelle était à montrer des photos à jeune gars quand notre gallant happi ieune des photos et s'mint à couorre. La jeune hardelle s'mint a couorre souotre et happi san galant par la manche d'sa casaque: L'autre fit mîne d'vouler s'écapper mais notre jeune hardelle t'nait bain la manche... qui l'y resti dans la main! fouai de Marie Hibou.
La manche d'un casaque, n'v'la qui passe encouore, mais si oulle l'avait happé par l'bas des brais avec dithet résultat, tchi qu'aurait paru biau gars dans la photo qu'notre hardelle aurait pu prendre avec son camera!
Honni soit qui mal y pense.
* * *
Il y a des gens qui sont tréjous dans l'embarras et d'autres qui trouvent r'medes à touot.
C'h'tait dans l'office. Un fermi était à s'pliaindre d'la faillie saison et y' n'savait tchi faithe de ses moyennes viyant que les marchands n'voulait pus les acater.
Un autre fermi qui s'trouvait là, ly d'mandi s'il en avait beaucoup.
- Ver, des cabots et des cabots, de tchi bé p'tit.
- Ch'est justement chunna. Couonnais-tu Jack d'la rue à l'Ieau, à St.-Ou.
- Vèr, tu veur dithe l'Chantgni.
- Justement. Eh bein, il acatera l'touot pour... son carnaval!
- Son carnaval?
- Vèr, pouor la bataille de confettis!
>Marie Hibou
1924
Viyiz étout: