Je sis à êcrithe ch't articlye ichin dans la solitude de ma mansarde.
V'là bétôt tchinze jours que je n'ai pas sorti.
I' n'faut pas penser que j'ai la rouogeule, ni l'flu, ni rain comme chenna.
Je sis en parfaite santé.
La raison pourtchi que je n'ai pas min l'pid d'hors ches jours ilo est bain facile à comprendre.
J'ai peux !
Ous avez lu dans les gâzettes touos les aut'es jours des accontes d'une tithethie générale dans toutes les parties de l'Ile comment qu'des gens paisiblyes qui rentraient trantchillement siez-ieux au sé, que ch'fusse à pid, en motor-bike ou même en automobile étaient êpouvantés de oui des détonations tout près d'ieux et des balles de pistolet qui lus râsaient les ouotheilles.
Eh bein je sis v'nu à saver que ch'tait mé, le pouore Caouain, quiétait l'innocente cause de tout chenna.
V'là des années que mes ennemins cherchent à m'tither et comme i'n'ont pas peu en r'pather ils ont imaginé que l'miyeu plian était de faithe une battue générale d'un but d'l'île à l'autre.
Heutheusement que j'ai 'té djerri en temps et que j'ai peu me mettre en seutheté.
Mais chennechin ne peut pas continuer pour tréjous.
I'm'ennyie comme tout de rester enfrumé comme chenna, je sis à mantchi toutes les fêtes ouest que j'étais tréjous invité.
Je n'ai pas 'té à un seul ''Show'' ni à un seul Carnaval, mains les prisonniers sont laissis en paix.
Mé j'ai Marie Hibou à m'persétchuter à longs jours. Ou m'traite de tout, et m'dit qu'oulle est enniée de m'aver souos les pids à londgeur de jours, et que j'dev'thais montrer un p'tit pus d'couothage. Je sais bain que v'là tchi n'la dêrang'geait pas du tout de oui pâler que j'avais 'té fûsillyie.
Le Chef est continuellement à m'êlourder ettou, li. I'dit que ch'est bain amusant de vaie un ouaisé comme mé un état d'êpouvante justement viyant que deustrais mousses font êcliater des pétards dans les routes.
Vaithe ! Ch'est de tchuthieux pétards cheuses-là, qui vos font des balles sûfflier alentou des ouotheilles.
Mais l'Chef a biau pâler. I'n'est pas si rêsolu comme tout chenna ninnetou, li !
A la tombée d'la niet i'rentre siez-li et fait la mîne d'aver toutes sortes d'êcrituthes importantes à faithe.
V'la tchique temps qu'i n'a pas 'té veu par les c'mins opprès solè couochant, et pas pus tard qu'avant-hier quand une motor-bike passi dans Charing Cross et que l'tuyau cratchi comme un traite d'arme, not'e vâlient Chef se muchi souos l'conteux à faithe la mîne qu'il avait perdu tchiquechose.
Mais pétards ou pistolets, j'ai grand r'gret de vaie que des gens qui n'ont rain à craindre es'saient devenus si nerveurs.
Opprès qu'les gâzettes avaient publié touos ches rapports-là, entouor des gens qu'avaient mantchi d'être tithés et des femmes qu'avaient trouvé d's hommes dans lus chambres et ainsi d'suite, i'y en avait hardi qui lus imaginirent que che s'sait lus tour le préchain.
Alice Fidelaine qui va couôtre siez Maît's Tom Podêtre, eut l'malheur de lièthe tout chenna dans la ''Post'' en bévant san thée ... Oulle a tréjous couôtume de s'en r'aller siez lyi toute seule, mais chute sethée-là ou r'fusi de sorti d'la maison à mains que Maît'e Tom ne fusse la conduithe.
Ou criyait qu'ou s'en allait être tithée dans l'prumié carrefour.
Le pouore Laiesse Ernon, li, s'était couochi d'bouanneheuthe et dormait bain paisiblyement.
Sa femme s'en allait justement se mettre au lièt quand ou s'imagini qu'i' yavait tchiqu'uns à bas dans la tchuisine.
Ou v'nait d'oui la porte ouvri !
Ou s'mins à pêtri Laiesse dans les fliancs pour le rêveillyi.
Laiesse n'était pas content d'être disteurbé comme chenna et li dit de s'couochi et de l'aissi trantchille mais ou n'li donni pas un moment de r'pos.
I' fallait absolument aller vaie tch'est qu'était là.
Alors i' print sa lampe et d'cendi en bas.
Sa femme le suivi avec une bringe qu'ou t'nait à ses deux mains, prête à fendre l'crâne de l'individu qu'avait osé entrer siez-ieux.
Mais i'n'trouvithent personne.
Toutes les portes étaient barrées et l'tchan, qu'est grand comme une ourse et qu'éthait dévoré autchun malfaiteur, ronfliait trantchillement sus la natte.
La missice n'était pas convaintchue ; i'falli explorer toute la maison dépis la cave jusqu'ès mansards devant qu'ou permisse à Laiesse de se r'couochi.
Et l'rêsultat de tout chenna a 'té que Laiesse Ernon a d'fendu qu'i' rentre une autre gâzette à la maison !
Cahouain
22/10/1927
Viyiz étout: