Les Pages Jèrriaises

Achteu qu'il n'y a pu de titherie

Achteu qu'il n'y a pu de titherie et que les gens sont rasseurés que les mousses en fute pouor tchique chose avec les crackers, m'v'chein débarrassé du Sieur Caouain, qui avait si grand peux d'être tithé que pendant quassiment tchinze jours y fut souos mes pids, chu peule.

J'pourrais vos en raconter éttouot à l'entouor de chutte titherie et je sais bein que nos jeunes hardelles futes bein sages pendant un temps et qu'il n'y ieut pon d'extchuse pouor sortir au sé car nous avait hate de rentrer sièz les vièrrs pouor être à l'abri.

J'sais bein éttouot qu'il y en ieutes qui furent obligis de rester siez ieux au lieu d'aller lus divertir en ville viyant que la servante n'voulait pon rester à san touot seu et que pus d'une Missis, en apprenant que l'buanhomme avait à sortir alli avec ly, chein qui n' 'tait pon de coutûme pouor seur. Et combein futes réveilli au milieu de la nièt criyant qu'il y avait tchique malfaiteur dans la maison!

J'pourrais vos en raconter de bein des sortes mais j'aime mus dithe chein qui arrivi à iun de mes amins qu'est offici dans une paraisse de l'Est.

Ch't'est l'amin Laisse qui s'tait muchi dans une touffée de jong pouor happé le gun-man. Chutte séthée, touote la police de la paraisse était sur pid et nous avait buan espoir d'happer l'oisé cause de touot mais tchi qui failly être assouomé sinon l'amin Laisse car le cacheux du moteur dans tchi s'trouvait l'chantgni, aperchut tchique chose qui bouogeait dans chutte touffée. Pouor seur ch'tait l'oisé et nous approchi pouor l'happer quant tout à coup Laiesse criyi: Ne tappez pon, ch'est mé qui si ichin. Et notre chantgni de r'connaitre notre offici du Connétablye ly qui aurait si bein voulu happer l'oisé tant recherché.

Chunna est la pure, pleine et entièthe vérithèt, foi de Marie Hibou et nous peux l'd'mander à Laiesse qui l'écappi d'près, pouor seur.

****

Dans la paraisse de St. Ou, du bord de la Ville au Bas, Louisa et ses filles Florie, Gladys et Dorothy, passites l'autre jour une séthée assez pouor tourner les sens à un grenadier de la garde du Rouai.

Touos nos gens étaient trantchillement à la maison quant touot à coup nous entendi rattler à l'ozanne.

Tchès que chunna voulait dithe? Nous écoutti et au but de tchiques minutes n'v'la qui ercouommanchi d'pus belle. Dame opprès chein qu'nos gens avaient lus sus les gazettes à l'entouor de femmes qu'avaient trouvé d's hommes dans lus chambre au milieu de la nièth et oprès touot chein qu'nous disait à l'entouor de titherie dans différentes parties de l'Ile, nos gens devintes hardi nerveux.

Pouor seux ch'n'tait ni tchique galant ni tchique vaisin qui tapait d'même à l'ozanne, car la porte était là pouor gens respectables.

Et encouore une fais puis deux ou trais nous endendit rattler.

Savous chein que ch'tait ? Savous tchi qui mins dans l'épouvante touote une famille des pus respectables ?

Mé, j'l'ai oui dithe. Ch'tait une farche de jeunes corps qui avaient amarré un bouton au but d'un miot de filain fixé à l'ozanne et à chaque fait qui tithaient sus la ficelle l'bouton chaquait contre l'ozanne.

Pouor dithe la vérithèt ch'n'est pon des farches à faithe.

Cahouain
29/10/1927
 

Viyiz étout:

 

Les Pages Jèrriaises