Le Chef se permins l'aut'e jour, de faithe des r'merques à m'n êgard, viyant que j'n'avais pas contribué m'en articlye comme d'habitude dans la gazette de l'aut'e Samedi.
Mais i' savait bain tch'est qu'en 'était la cause, et il aithait peut aver donné des explications s'il avait voulu.
Nou n'peut pas brûler la chandelle des deux buts, sapresti!
Si ch'est qu'i' m'permettait d'êcrithe dans l'couothant du jour dans des moments qu'i' n'y a pas grand chose à faithe dans la boutique, mais n'ennin, i' m'trouve tréjous du travas, li! Si je n'sis pas à êcrithe les comptes à nos nombreux clients, i' m'met à êpousseter touos les livres de d'sus l's ais, car il est pour la propreté not'e Chef, ch'est comme tchi dithait, un "Spring Cleaning'' continuel par siez-nous.
Et pis i' m'envie à faithe toutes sortes d'commissions dans la ville.
Toutes les heuthes i' faut qu'j'aille vaie combain qu'il a passé d'cherges d'patates sus l'Weighbridge et interviewer les fermiers pour pouver li rapporter d'la copie pour sa "Causerie Agricole.''
A cause de la grande chaleur qu'i' fait tout chu temps je sis obligi d'aller gentiment souvent cherchi d'la biéthe pour nos imprimeurs, et pis en outre chenna je vais faithe toutes sortes d'commissions pour la d'mouaîselle de dans l'office, li acater du chocolat et ainsi d'suite. Mais quant à chute partie-la, je n'm'en pliains pas; j'aime chent fais mus travaillyi pour lyi que pour le Chef, par exemple, sustout comme ou m'a promins un biau gobin d'gâche de neuches quand ou s'mathiêtha.
Ou comprendrez don, que la seule chance que j'ai d'êcrithe, est de bain bouanneheuthe ou bain au sé, opprès man jour. Mais à ches dernyi i' m'a 'té impossiblye de l'faithe, ni je n'sais pas comment que j'm'en vais mênagi duthant les préchains trais mais.
Et j'm'en vais vos dithe pourtchi.
I'y a tchique temps la Marie Hibou, sans m'consulter, s'en alli prendre à St. Cliément, un grand bétchèt d'tomates à souogni. Je crai qu'i'y en a dans les vingt mille. Jamais d'sa vie ou n'avait fait chu genre-là d'travas, et pour vos dithe la véthité, oulle est aussi capablye de souogni des tomates comme je sis de jouer l'piano.
Ch'n'est don pas êtonnant qu'au but d'deuxtrais jours san maître enviyi pour mé, me d'mandant d'aller vaie le couochonage qu'oulle 'tait à faithe.
Je r'fusi mé, tout d'abord, en li disant qu'il aithait deu aver ieu pus d'avis que d'l'emplier à chu travas-là, et qu'i' pouvait s'dépliaûtchi du mus qu'i' pusse.
Mais j'vins à penser que v'là tchi pouorrait fini dans une affaithe de Cour, et pour l'honneur de la famille, i'valait p't-être mus que j'm'en mêlisse tout d même.
Et don je m'y en fus.
Quand j'arrivi là, je m'jutchi sus un bamboo et je m'mins à contemplier sans travas.
Ch'en était du propre!
La pouore innocente ne r'connaissait pas les tomates d'avec la serclye et à bain des bords, le long du rang oulle avait êraichi la pliante et avait amathé une ortchie ou une snille à la pliaiche.
Et pis ch'en était de l'amathethie!
Oulle avait êtreint san raffia si du que la pliante était à la maintchi êglianmie contre le bâton, de sorte que la sève ne pouvait pas cirtchuler, avec le rêsultat qu'une grande quantité d'pliantes étaient mortes par aver 'té êtranglyies.
J'êprouvi à li montrer comment qu'i' fallait faithe, mais dame, ou s'mins à faithe san train d'habitude et me d'mandi ouest qu'j'avais apprins, mé, la tchultuthe de la tomate pour aver l'toupet d'êprouver à lui enseigni san travas.
Je m'en fus tout-d'suite trouver l'propriêtaithe du clios et j'li dis qu'i' valait bien mus la renvier siez-lyi, mais i'n'vouli pon en ouï pâler, et i'm'dit qui si j'allions casser l'contrat, ou que l'travas n'était pas bain fait, i's'en allait ervenin sus nous pour des dommages.
V'la don la position dans tchi que je m'trouve.
Touos les matins je si dans chu maudit clios-là de quatre heuthes jusqu'à sept heuthes et d'mie, quand je tchitte pour être à la boutique à huit heuthes, et pis au sé, j'y r'sis jus qu'à naithe nièt. Marie y va dans l'jour quand je n'sis pas là, car il est impossiblye que j'y séthions ensemblye, che s'sait un potin continuel et je finithions par donner une job à la police de St. Cliément.
Le Chef peut continuer s'i' veurt à m'donner des picagnes dans ses "Nouvelles Locales'' et à d'mander "Où est-il,'' mais i' sait parfaitement bain comment que j'sis situé, et qu'avec toute la bouanne volonté du monde, je n'peux pas être à êpinotchi des maudites tomates et à êcrithe pour des gâzettes en même temps. I'y en a bain qui dithaient "Eh bain, pourtchi pas êcrithe au Dimanche?''
Mais je vos asseuthe que j'sis trop meûthi par la fatigue, et pis d'ailleurs, ch'est contre mes principes.
Caouain
30/6/1923
Viyiz étout: